Jeremia 39 - KITABU KITAKATIFU1 Mala kuvugulwa, (mu muhiga gwe gyitano na gyine gwelyameha lya Zedekia mwami wa Yuda, ku mweli gwelikumi, Nebukadirezaru mwami wa Babuloni yadza halala nelihe lilye lyosi a duke kulwana na Yerusalemi, naye ya li kumbiridza; 2 ku muhiga gwelikumi na mulala gwelyameha lya Zedekia, ku mweli gwegyine, ku lidiku lya gatano na gane agomweli, va hudula lidigi lyelidala), 3 avanene vosi avomwami wa Babuloni vingira mugati, na vikala mu kiribwa kya hagati, navo ni yava, Nerigalisharezeru, na Samgarinebo, na Sarisekim, na Rabisarisi, na Nerigalisharezeru, Rabimagu, halala navanene vo mwami wa Babuloni ava tigala. 4 Na ga duka, Zedekia mwami wa Yuda na avelihe vosi lwa va va lola, hene yaho viruka, na va twula mu lidala ubudiku, ku inzira yommulimi gwomwami, mu kiribwa kya hagati kyamadigi gaviri; naye ya tsia kyova ku inzira ye kereremu. 5 Navutswa lihe lya Vakalidei lya va londerera, na va nyola Zedekia mu vireremu vya Yeriko: na lwa va mu gumira va mu hila ku Nebukadirezaru mwami wa Babuloni wa li ha Ribila mu kivala kya Hamathu; naye ya mu kalagira. 6 Hene yaho mwami wa Babuloni yiita avana va Zedekia mu Ribila, imbiri wetsimoni tsitsye: kandi mwami wa Babuloni yiita avanene vosi va Yuda. 7 Na kandi ya hudula tsimoni tsya Zedekia, na a mboha nevisambo, a duke kumuhila Babuloni. 8 Avakalidei va samba inyumba yomwami, halala netsinyumba tsyavandu, nomuliru, na va sasugula madigi ga Yerusalemi. 9 Hene yaho Nebuzaradan munyampara wavalindi wa hila vahambe na a tsia navo Babuloni yavo avatigala ku vandu mu lidala, na viruki, yavo va tsia kuye, nelitigala lyavandu va tigala. 10 Navutswa Nebuzaradan munyampara wavalindi ya leka avadaka mu avandu, ava li bugira kindu, ya va leka mu kivala kya Yuda, ya va ha milimi gyemizabibu, nemilimi inyinga zana yeyo. 11 Ma Nebukadirezaru mwami wa Babuloni ya laga Nebuzaradan munyampara wavalindi ku makuva ga Jeremia, na a mu volera, 12 U mbugule u mu linde ligali, u ta mu kolera kindu kidamano mba, navutswa u mu kolera kuli a ku volera. 13 Ma Nebuzaradan munyampara wavalindi, ya tuma, na Nebushaziban, na Rabisarisi, na Nerigali sharezeru, na Rabimagu, navanene vosi vomwami wa Babuloni; 14 va tuma avandu, na va vugula Jeremia ni va mu twulidza mmugidzi gwavalindi, na va mu vika mmukono gwa Gedalia mwana wa Ahikam, mwana wa Sha fan, na a mu hile yengo wewe. Na ndiyo ya menya hagati ha vandu yavo. 15 Ma likuva lya Yahova lya duka ku Jeremia, inyinga ya ya li mu libofwa mmugidzi gwa valindi, kuvola 16 Tsia, u volere Ebedimeleku Muethiopia, u mu volere, Yahova wa mahe, Nyasaye wa Israeli, a vola: Henza, nda leta makuva gange ku lidala yili ku budamano, na si ga veye ku bulahi mba; nago ga la dukidzwa imbiri wowo ku lidiku yilyo. 17 Navutswa nda honnya ive ku lidiku yilyo, Yahova a vola; na ive u la vula kuvikwa mu makono gavandu va u tidzanga. 18 Kigira inze ligali nda honnya ive, na ive u la vula kugwa ku kivavi, navutswa livamwoyo lilyo u la va nalyo kuva kilanye ku ive: kigira wa suuvira inze, Yahova a vola. |
©Bible Society of Kenya, 1967
Bible Society of Kenya