Jeremia 36 - KITABU KITAKATIFU

¹ Na ga duka ku muhiga gwa gyine gwelyameha lya Jehoiakim mwana wa Josia, mwami wa Yuda, likuva yili lya duka ku Jeremia kutwula ku Yahova, kuvola,

² Vugula lilinga lyekitabu, na u ng'ode mukyo makuva yaga gosi aga nda ku volera ku Israeli, noku Yuda, noku tsihiri tsyosi, kutwula ku lidiku lya nda ku volera, kutwula ku madiku ga Josia, kali kuduka lero.

³ Namusia inyumba ya Yuda i la hulira makuva gobudamano yibu bwosi bwa nda saavira kuvakolera; va duka kwirana sa mulala kuleka inzira yeye indamano, nduke kuvasameha ubudamano bwavo nobwoni bwavo.

⁴ Hene yaho Jeremia ya langa Baruku mwana wa Neria, na Baruku ya ng'oda makuva gosi ga Yahova, aga twula mmunwa gwa Jeremia, ga veye amakuva ga Yahova ya mu volera, va ga ng'odn mu lilinga lyekitabu.

⁵ Na Jeremia ya laga Baruku, na a vola, Inze mboheywi; si nyala kwingira mu inyumba ya Yahova:

⁶ kunangwa ive u tsie, u some mu lilinga zana, lya wa ng'oda kutwula munwa gwange, u some makuva ga Yahova mu amatu gavandu mu inyumba ya Yahova ku lidiku lyelihonga lilya; kandi u la ga soma mmatu ga Yuda gosi, vosi ava twula mu madala gavo.

⁷ Namusia va la leta lisaala lyavo imbiri wa Yahova nokwirana sa mulala kuleka inzira yeye indamano: kigira livihirirwa nobutima bwa Yahova bu veye bunene ligali, bwa ya vola ku avandu yava.

⁸ Ma Baruku mwana wa Neria ya kola kuli gosi agomprofeti Jeremia ya mu laga, na a soma mu kitabu makuva ga Yahova mu inyumba ya Yahova.

⁹ Na ga duka mu muhiga gwa kola gyitano gwa Jehoiakim mwana wa Josia, mwami wa Yuda, ku mweli gwegyitano na gyine, avandu vosi ava Yerusalemi na vosi ava twula mmadala ga Yuda kuduka Yerusalemi va landidza lihonga lilia imbiri wa Yahova.

¹⁰ Kunangwa inyinga yeyo Baruku ya soma mu kitabu makuva ga Jeremia mu inyumba ya Yahova, mu inyumba ya Gemaria mwana wa Shafan mung'odi, mmugidze gwegulu, ha bwingiriru bwekiribwa kihya kyenyumba ya Yahova, mmatu gavandu vosi.

¹¹ Ma Mikaia mwana wa Gemaria, mwana wa Shafan, lwa ya hulira makuva gosi ga Yahova aga somwa mkitabu zana,

¹² yika nokwingira mu inyumba yomwami, yingira mu inyumba yomung'odi: henza, avanene vosi vikala ho, navo ni yava, Elishama mung'odi, na Delaia mwana wa Shemaia na Elinathan mwana wa Akibor;, na Gemaria mwana wa Shafan, na Zedekia mwana wa Hanania, navanene vosi.

¹³ Hene yaho Mikaia yilwadzira avandu yavo makuva yaga gosi aga ya hulira, lwa Baruku ya soma mu kitabu mu amatu gavandu.

¹⁴ Kigira yaga avanene va tuma Jehudi mwana wa Nethania, mwana wa Shelemia, mwana w'a Kushi, a tsie ku Baruku, kumuvolera, Ginga mu mukono gugwo lilinga lyekitabu kya wa soma mu amatu gavandu, udze nakyo. Ma Baruku mwana wa Neria ya ginga lilinga lyekitabu mmukono gwigwe, na a tsia ku avandu yavo.

¹⁵ Navo va mu volera, Yikala kalunu, u ki some mmatu getu. Ma Baruku ya ki soma mu amatu gavo.

¹⁶ Na ga duka, nonoho lwa va hulira makuva yago, gosi, va henzana sa mulala nowakye, nobutii, na va volera Baruku, Kwinye ligali ku la volera mwami makuva yaga gosi.

¹⁷ Na va teva Baruku ni va vola U ku volera kalunu, Ga li ndi wa ng'oda makuva ga twula mmunwa gwigwe?

¹⁸ Hene yaho Baruku ya tivula, na a vola, Uyu ya mbolera makuva yaga gosi nomunwa gwigwe, na inze nda ga ng'oda mu kitabu nobwino.

¹⁹ Hene yaho vanene va volera Baruku, Tsia, wivise, ive na Jeremia halala; kandi mu ta leka mundu kali mulala a manye ha mu veye.

²⁰ Vingira mu mugidzi ku mwami; navutswa va vika lilinga lyekitabu mu inyumha ya Elishama mung'odi: na va vola makuva yaga gosi mmatu gomwami.

²¹ Ma mwami ya tuma Jehudi a tsie kuleta lilinga lyekitabunaye ya ki vugula mu inyumba yomung'odi Elishama. Na Jehudi ya ki soma mmatu gomwami, nomu matu gavanene vosi ava singira ho imbiri womwami.

²² Ma mwami ya li ni yikaye mu inyumba i tumekirangwa inyinga yobukindu, gwa li mweli gwegyitano na gyine: ha zana ha li nomuliru gwokwaaka ku mahiga imbiri wewe.

²³ Na gaduka, Jehudi lwa ya mala kusoma miliango gyivaka kinga gyine, mwami ya li kalaga na kabano, na a li ta ku muliru gwa li gwaakanga ku mahiga, kuduka ni li mala ku hya lilinga lyekitabu kyosi mu muliru gwa li ku mahiga.

²⁴ Navo si va tia mba, kinga kutandula tsingubo tsyavo, mwami, kinga mulala ku avatumekiri veve ava hulira makuva yaga gosi.

²⁵ Navutswa Elinathan na Delaia na Gemaria va goonya mwami a vule kusamba lilinga lyekitabu; navutswa si ya bugirira kuvahulira mba.

²⁶ Na mwami ya laga Jerameeli mwana womwami, na Seraia mwana wa Azirieli, na Shelemia mwana wa Abideeli, va vugule Baruku mung'odi na Jeremia muprofeti; navutswa Yahova ya va visa.

²⁷ Hene yaho likuva lya Yahova lya duka ku Jeremia, inyima womwami ya samba lilinga lyekitabu, na makuva ga Baruku ya ng'oda aga twula mmunwa gwa Jeremia, lya vola,

²⁸ Vugula lilinga lyekitabu kindi, na u ng'ode mu amakuva agokutanga gosi aga li mu lilinga lyekitabu lyokutanga, kya Jehoiakim mwami wa Yuda ya samba.

²⁹ Ka ndi ku makuva ga Jehoiakim mwami wa Yuda u la vola, Yahova a vola: Ive u sambi lilinga lyekitabu yikyo, nokuvola, Kigira ki ive u ng'odi mu kyo, kuvola, Mwami wa Babuloni ligali a ladza nokudividza kivala yiki nokuheridza avandu netsinyama?

³⁰ Kigira yaga Yahova a vola ku makuva ga Jehoiakim mwami wa Yuda: Uyu si a la va nomundu wikala ku intebe yobwami ya Daudi: na mubiri mukudzu gwigwe gu la tebwa kyova ku uluya lwombasu, noku bukindu bwobudiku.

³¹ Na inze nda mu ha mageli, uyu nekisukululwi kikye navatumekiri veve kigira bu damano bwavo; na nda leta kuvo, noku vamenyanga Yerusalemi, noku avandu va Yuda, ubudamano yibwo bwosi bwa nda vola kuvo; navutswa si va bugirira kumbulira mba.

³² Hene yaho Jeremia ya vugula lilinga lyekitabu kindi, na a ha mung'odi Baruku, mwana wa Neria, naye ya ga ng'oda mukyo, makuva gosi ga twula mmunwa gwa Jeremia, ga Jehoiakim mwami wa Yuda ya samba ku muliru; kandi ya meda makuva gandi manyingi ku lugano lwa yago.