Jeremia 35 - KITABU KITAKATIFU

¹ Likuva lya duka ku Jeremia kutwula ku Yahova mmadiku ga Jehoiakim mwana wa Josia, mwami wa Yuda, kuvola,

² Tsia mu inyumba ya Varekabu, u va volere makuva, u va lete mu inyumba ya Yahova, mu inyumba indala, u va he iwaini va nwe.

³ Hene yaho nda vugula Jaazania mwana wa Jeremia, mwana wa Habazinia, halala navamwavo veve, navana veve vosi, navenyumba vosi va Varekabu;

⁴ nda va leta mu inyumba ya Yahova, mu inyumba yavana va Hanan, mwana wa Igidalia, mundu wa Nyasaye, ya li ahimbi nenyumba yavanene, nayo ya li igulu ku inyumba ya Maaseia mwana wa Shalum, wa li mulindi wekiliango.

⁵ Nda vika vituva vizula iwaini, nevikombe, imbiri wavana venyumba ya Varekabu, ni mba volera, Mu nwe iwaini.

⁶ Navutswa va vola, Kwinye si ku la nwa iwaini mba: kigira Jonadabu mwana wa Rekabu, guga wetu, ya ku ha lilaga, na a vola, Mu ta nwa iwaini mba, mwinye kinga avana venyu kuduka mihiga nemihiga:

⁷ kandi mu tombaka inyumba, kandi mu ta midza bugutsa, kandi mu ta simika milimi gyamazabibu, kandi mu ta va nagyo: navutswa mu la menya mu mahema madiku gosi; mu duke kuhindira mu kivala kya mu menya mu avamenyi madiku manyingi.

⁸ Na ku huliye mwoyo gwa Jonadabu mwana wa Rekabu, guga wetu, ku yago gosi aga ya ku laga, ku vule kunwa iwaini madiku getu gosi kwinye navakali vetu, navana vetu avayai navakana;

⁹ kandi ku vule kwombaka tsinyumba tsyokumenya mu: na si ku veye nemilimi gyamazabibu, kinga mulimi, kinga ubugutsa:

¹⁰ navutswa ku menyi mu mahema, na ku huliye nokukola kuli gosi ga Jonadabu guga wetu ya ku laga.

¹¹ Navutswa ga duka, lwa Nebukadirezaru mwami wa Babuloni, lwa yanegira nokwingira mu kivala yiki kwa vola, Hamba, ku tsie Yerusalemi kigira ubutii bwelihe lya Vakalidei na kigira ubutii bwelihe lya Vasiria, ni ndiyo ku menya Yerusalemi.

¹² Hene yaho likuva lya Yahova lya duka ku Jeremia, kuvola,

¹³ Yahova wa mahe, Nyasaye wa Israeli, a ku volera: Tsia, u volere avandu va Yuda, na avamenya Yerusalemi, Si mu bugirira kuvugula megidzo mu hulire amakuva gange? Yahova a vola.

¹⁴ Makuva ga Jonadabu mwana wa Rekabu, aga ya laga avans veve, va vule kunwa iwaini, ga dukidzeywi; nokuduka lero si va nwedzanga mba, kigira va hulira lilaga lya guga wavo. Navutswa mboleye mwinye, ni mbuka mabwebwe nokuvola; na si mu mbuliye mba.

¹⁵ Kandi nda leta ku mwinye avatumekiri vange vosi avaproieti, ni mbuka mabwebwe nokuvatuma, ni mbola, Mwirane kalunu sa mulala a leke inzira yeye indamano, mu lombe vikolwa vyenyu, kandi mu ta tsia kulonda avanyasaye vandi kuvatumekira mba, na mu la menya mu kivala yiki kya nda ha mwinye na vaguga venyu; navutswa si mwa tegidza gutu, kinga kuhulira ku inze.

¹⁶ Kunangwa kigira avana va Jonadabu, mwana wa Rekabu, va dukidza lilaga lya guga wavo ga ya va laga, navutswa avandu yava si va hulira inze mba;

¹⁷ kigira yaga Yahova Nyasaye wa mahe, Nyasaye wa Israeli, a vola: Henza, nda leta ku Yuda noku vosi avamenyi Yerusalemi ubudamano bwosi bwa nda vola kuvo; kigira mba voliye, navutswa navo si va huliye mba; mba langi navo si va bugiriye mba.

¹⁸ Na Jeremia, ya volera venyumba ya Varekabu, Yahova wa mahe Nyasaye wa Israeli, a vola: Kigira mwa hulira lilaga lya guga wenyu Jonadabu, nokuhulira lyeganehidza lilye lyosi, nokukola kuli gosi aga ya mu laga;

¹⁹ kigira yaga Yahova wa mahe, Nyasaye wa Israeli a vola: Jonadabu mwana wa Rekabu si a la daka mundu mihiga nemihiga kusingira imbiri wange.