Jeremia 34 - KITABU KITAKATIFU

¹ Likuva lya duka ku Jeremia kutwula ku Yahova, lwa Nebukadinezaru mwami wa Babuloni, na lihe lilye lyosi, nobwami bwosi bwelirova bwa li isi welyameha lilye, netsihiri tsyosi tsyavandu, tsya lwananga ku Yerusalemi, noku madala galyo gosi, na li vola:

² Yahova, Nyasaye wa Israeli, a ku volera, Tsia, u volere Zedekia mwami wa Yuda, u mu volere, Yahova a ku volera, Henza, nda vika lidala yili mmukono gwomwami wa Babuloni, naye a la li samba nomuliru:

³ na ive si u la hona ku mukono gwigwe mba, navutswa u la gumirwa ligali, nokuvikwa mmukono gwigwe, na tsimoni tsitsye tsi la lola tsimoni tsyomwami wa Babuloni, naye a la volerana nive munwa nomunwa, na ive u la tsia Babuloni.

⁴ Navutswa u hulire likuva lya Yahova, O Zedekia mwami wa Yuda: Yahova a vola ku makuva gogo, Ive si u la kudza nekivavi mba;

⁵ u la kudzira mu mirembe, kandi mu livuyidza lya vaguga vovo, avami voku matsyambiri vimirira imbiri wowo, ni ndiyo va li ku vuyidzira ive; na va la ku lilira, ni va rola, O Mwami kigira inze mboye likuva yili, Yahova a vola.

⁶ Hene yaho muprofeti Jeremia ya volera Zedekia mwami wa Yuda makuva yaga gosi ha Yerusalemi,

⁷ lihe lyomwami wa Babuloni lwa lya lwana ku Yerusalemi, noku madala gosi ga Yuda aga tigala, ku Lakishi noku Azeka; kigira ni yaga geng'ine aga tigala mu madala ga Yuda, kuva madala getsingaga.

⁸ Likuva lya duka ku Jeremia kutwula ku Yahova, inyima womwami Zedekia ya kola lilagana navandi vosi ava li mu Yerusalemi, a duke kuvalandidzira amakuva gelibohololwa;

⁹ mundu sa mulala a leke mutugwa wewe muyai, nomutugwa wewe mukana, u mu boholole, na a va ni ya li musatsa Muhebraina kinga mukali Muhebraina; a ta va ho mundu wokuvatuga, livola li veye, mundu Muyuda a ta tuga amwavo wewe.

¹⁰ Navanene vosi navandu vosi va hulira likuva yilyo, yavo ava li ni vivika mu lilagana yilyo, mundu sa mulala a leke mutugwa wewe muyai, nomutugwa wewe mukana, u mboholole, ha ta va nomundu u va tuga kali mulala; va hulira likuva yilyo nokuvaleka avaboholole:

¹¹ navutswa, lwenyima va girunkana, nokwirannya avatugwa vayai navatugwa vakana, ava va li ni va leka avaboholole, na va va vika mu butugwa va ve avatugwa vayai navatugwa vakana vavo.

¹² Kigira yaga likuva lya Yahova lya duka ku Jeremia, kutwula ku Yahova, kuvola,

¹³ Yahova, Nyasaye wa Israeli, a vola ndi: Inze nda kola lilagana navaguga venyu mu lidiku lya nda va twulidza mu kivala kya Egepeti, kutwula mu inyumba yobutugwa, ni mbola,

¹⁴ Ku kiheri kyemihiga gyi kola gyitano negyiviri, mundu sa mulala u veye namwavo wewe Muhebraina wa gulidzwa ku ive, na u ku tumikiye mihiga gyitano na mulala, u mleke a twule ku ive: navutswa avaguga venyu si va hulira mba, kandi si va tegidza amatu gavo mba.

¹⁵ Na kalunu mwinye mu girunkani, nokukola aga lungika imbiri wetsimoni tsyange, ku lilandidzanira libohololwa umundu sa mulala nowakye; na mwa kola lilagana imbiri wange mu inyumba i langangwa ku lieta lyange:

¹⁶ navuswa kandi mwa girunkana nokunyega lieta lyange, nokuleta kandi sa mulala mutugwa muyai wewe, na sa mulala mutugwa mukana wewe, ava mwa li ni mwa leka avaboholole kuli ubuyanzi bwavo avene; na mwa va vika mu butugwa va ve avatugwa vayai na avatugwa vakana.

¹⁷ Kigira yaga Yahova a vola: Mwinye si mu huliye inze mba, kulandidzanira makuva gelibohololwa, mundu sa mulala namwavo wewe, na sa mulala nowakye: henza, inze nandidzira mwinye amakuva gelibohololwa, Yahova a vola, li veye libohololwa lyekivavi, nobulwaye, nenzala; na nda kola mwinye ku sigiswa yiyi neyiyi mu bwami bwosi bwomu lirova.

¹⁸ Navandu yavo avononnya amalago gange, ava vula kudukidza amakuva gelilagana lya va kola imbiri wange lwa va kalaga kimoli vidonye viviri nokuvita hagati hevidonyevyakyo:

¹⁹ avanene va Yuda, navanene ve Yerusalemi, nevitsiri, navasalisi, navandu vosi avekivala vosi va vita hagati hevidonye vyombi vyekimoli;

²⁰ inze nda va vika mmukono gwavasigu vavo, mu mukono gwa yavo avenyanga livamwoyo lyavo; na mibiri mikudzu gyavo gyi la va vyokulia vyamanyonyi gombwerefu, na vyetsinyama tsindulu tsyomu lirova.

²¹ Na Zedekia mwami wa Yuda navanene veve nda va vika mmukono gwavasigu vavo, nommukono gwa yavo avenyanga livamwoyo lyavo, nommukono gwelihe lya mwami wa Babuloni, avanegira kutwula ku mwinye.

²² Henza, nda laga, Yahova a vola, nda va leta kandi virane mu lidala yili: na va la lwana nalyo, nokulivugula, nokulisamba nomuliru: na nda kola madala ga Yuda kuva hatswa, ga vule kuva nomundu kumenya mugo.