Jeremia 29 - KITABU KITAKATIFU

¹ Yaga nigo makuva ga ibaruwa yomprofeti Jeremia ya hila kutwula Yerusalemi kuduka ku vatigala ku vakulundu avombuhambe, noku vasalisi, noku vaprofeti, noku avandu vosi, ava Nebukadinezaru ya hila mbuhambe kutwula Yerusalemi na a tsia navo Babuloni

² (inyima we litwula Yerusalemi lya Jekonia mwami, na mama womwami, nevitsiri, navanene va Yuda na Yerusalemi na vasidza, na vatuuli),

³ ya gi hilira mmukono gwa Elasa mwana wa Shafan, na Gemaria mwana wa Hilkia (ava Zedekia mwami wa Yuda ya tuma Babuloni ku Nebukadine zaru, mwami wa Babuloni), kuvola,

⁴ Yahova wa mahe, Nyasaye wa Israeli, a volera avandu yavo vosi, ava hilwa mbuhambe, ava nda kola va hilwe mbuhambe kutwula Yeru salemi va tsia Babuloni.

⁵ Yahova a va volera Mweyornbakire tsinyumba, nokumenya mutsyo, mu tage milimi, mu lie amakuyu gagyo:

⁶ mu lete avakali, nokuivula avana avayai navakana; mu kwehidze avayai venyu avakali, navakana venyu mu va serere ku vasatsa, va duke kwivula avana vayai navakana; mu medeke yeyo, mu vule kugeha.

⁷ Mwenyere lidala mirembe lya nda mu kola mu hilwe mu avahambe, na mu saalire lidala yilyo: kigira mu mirembe gyelidala yilyo mwinye kandi mu la va nemirembe.

⁸ Kigira Yahova wa mahe, Nyasaye wa Israeli, a vola: Mu ta bugirira avaprofeti ava veye hagati henyu, na vasegetiri, va mu gade; kandi mu ta hulira maloto genyu ga mu lotanga.

⁹ Kigira va mu profetera ubugadi mu lieta lyange: inze si nda va tuma mba, Yahova a vola.

¹⁰ Kigira Yahova a vola, Babuloni lwa li dukidzwa mihiga makumi gatano na gaviri, inze nda luuta mwinye, na nda mu dukidzira likuva lyange lilahi, kumwirannya hano.

¹¹ Kigira mmanya tsiganagani tsya nganagananga ku mwinye, Yahova a vola, tsi veye tsiganagani tsyemirembe, si tsi veye tsiganagani tsyobudamano mba, kumuha kisuuviri mmadiku genyu gekiheri.

¹² Na mwinye mu lanira inze, mu la tsia kusaala inze, na nda mu hulira.

¹³ Mu la nyenya, nokunyola, lwa mu nyenya nemyoyo gyenyu gyosi.

¹⁴ Kandi nda nyoleka ku mwinye, Yahova a vola, nda girunkannya ubuhambe bwenyu, nda vungidza mwinye, mu twule mu tsihiri yitsyo tsyosi, nokutwula hosi ha nda mwadikidzira, Yahova a vola; nda mu leta kandi ha nda mu kola kutwula ho kuhilwa mbuhambe.

¹⁵ Kigira mwa vola, Yahova u ku singiridziye avaprofeti ha Babuloni;

¹⁶ kigira yaga Yahova a vola ku makuva gomwami uyu wikaye ku intebe yobwami ya Daudi, noku makuva gavandu vosi ava menya mu lidala yili, avamwavo venyu ava vula kuhilwa mbuhambe halala na mwinye;

¹⁷ Yahova wa mahe a vola: Henza, nda tuma kuvo kivavi, nenzala, nobulwaye, na nda va kola kuva kuli makuyu madamano, ga ta libwa, ku liva lya ga veye madamano.

¹⁸ Nda va londerera nekivavi, nenzala, nobulwaye, nda va twulidza va sigiswe yiyi neyiyi mu bwami bwosi bwelirova, va duke kuva lilaamwa, neligenyerwa, nelikunukirwa, nelinyegwa, mu tsihiri yitsyo tsyosi tsya nda va hila mu;

¹⁹ kigira si va hulira makuva gange mba, Yahova a vola, aga nda tumira avatumwa vange avaprofeti, kuvavolera, ni mbuka mmabwebwe nokuvatuma navutswa si mwa bugirira kuhulira Yahova a vola.

²⁰ Kunangwa kigira yaga mu hulire likuva lya Yahova, mwinye vosi ava veye ku buhambe, ava nda hila Babuloni kutwula Yerusalemi.

²¹ Yahova wa mahe, Nyasaye wa Israeli, a vola ndi, ku makuva ga Ahabu mwana wa Kolaia, noku makuva ga Zedekia mwana wa Maaseia, ava profetera mwinye ububehi mu lieta lyange: Henza, nda va vika mmukono gwa Nebukadirezaru mwami wa Babuloni; naye a la viitira imbiri wetsimoni tsyenyu;

²² noku makuva gavandu yavo vombi, li la volwa kuvo lilaamwa li twula ku vahambe va Yuda vosi ava veye mu Babuloni; kuvola, Yahova a kole ive kuli Zedekia kandi kuli Ahabu avomwami wa Babuloni yominya ku muliru;

²³ kigira va kola agobusiru mu Israeli, na va heya navakali va vakye vavo, na va vola makuva gobugadi mu lieta lyange, makuva ga nda vula kuvalaga; na inze mbeye uyu u manyanga, mbeye muloli Yahova a vola.

²⁴ Noku makuva ga Shemaia Munehelami u la vola, kuvola

²⁵ Yahova wa mahe, Nyasaye wa Israeli, a vola ndi kukuvolera, Kigira ive wa hila tsibaruwa ku avandu vosi ava Yerusalemi, noku Zefania mwana wa Maaseia, musalisi, noku vasalisi vosi, mu lieta lilyo, kuvavolera

²⁶ Yahova u mali kuvika ive u ve umusalisi mbugono bwomusalisi Jehoiada, mu duke kuva avalindi mu inyumba ya Yahova, mundu sa mulala wa laluka, nokwekola muprofeti, u duke kumbika mu mukatale nomu kisambo.

²⁷ Kunangwa kalunu, kigira ki wa vula kugondokera Jeremia wa Anathothu, wekolanga mwene a ve muprofeti ku mwinye,

²⁸ kigira uyu u lete ku kwinye ava tumwa ha Babuloni, ha ku veye, kuvola, Amadiku gelyadikidzwa lyenyu ga veye manyingi: mweyombakire tsinyumba, nokumenya mutsyo; mu tage milimi, mu lie amakuyu gagyo?

²⁹ Na Zefania musalisi ya soma ibaruwa zana mu amatu ga Jeremia muprofeti.

³⁰ Hene yaho likuva lya Yahova lya duka ku Jeremia, kuvola,

³¹ U hile amakuva ku vosi avadikidzwa, kuvola, Yahova a vola ku makuva ga Shemaia Munehelami; kigira Shemaia ya profeta ku mwinye, na inze si nda mu laga mba, na ya mu suuviridza kuduka ni mu suuvira ku bubehi;

³² kigira yaga Yahova a vola, Henza, nda haana mageli ku Shemaia Munehelami, nekisukululwi kikye; si a la va nomundu u menya mu avandu yava, kandi si a la lola ubulahi, bwa ndi kolera avandu vange, Yahova a vola, kigira ya vola bwebaali ku Yahova.