Jeremia 26 - KITABU KITAKATIFU

¹ Mu litanga lye lyameha lya Jehoiakim mwana wa Josia, mwami wa Yuda, likuva yili lya twula ku Yahova, kuvola,

² Yahova a vola: Singira mu mgidzi gwenyumba ya Yahova, na u volere amadala gosi ga Yuda, aga yavo avadza kusigamira mu inyumba ya Yahova, u va volere makuva yaga gosi aga nkulaganga; u tigalira likuva kali lilala.

³ Namasia va la hulira nokweganira sa mulala kuleka inzira yeye indamano; inze nduke kweganira ku madamano aga nsaavira kuvakolera kigira budamano bwelikola lyavo.

⁴ Na u la va volera, Yahova a vola ndi: Ni mu va ni mu vula kumbulira, kugenda mu lilaga lyange, lya nda vika imbiri wenyu,

⁵ kuhulira makuva gavatumekiri vange avaprofeti, ava ntuma ku mwinye, ni mbuka mabwebwe nokuvatuma, navutswa mwa vula kumbulira;

⁶ hene yaho nda kola inyumba yiyi i ve kuli Shilo, na nda kola lidala yili li ve lilaamwa ku tsihiri tsyosi tsyelirova.

⁷ Navasalisi navaprofeti navandu vosi va hulira Jeremia lwa ya vola makuva yaga mu inyumba ya Yahova.

⁸ Na ga duka, lwa Jeremia ya mala kuvola yaga gosi aga Yahova ya mu laga a volere avandu vosi; ma avasalisi navaprofeti, navandu vosi va gumira Jeremia, nokumuvolera Ive ligali u la kudza.

⁹ Kigira ki wa profeta mu lieta lya Yahova, kuvola, Inyumba yiyi i la va kuli Shilo, nelidala yili li la va lyere, si li la va ho nomundu u menya mulyo? Navandu vosi va li ni va vuganiye Jeremia mu inyumba ya Yahova.

¹⁰ Ma lwa vanene va Yuda va hulira inkuva yiyi, vanegira kutwula mu inyumba yomwami nokwingira mu inyumba ya Yahova; na vikala mu bwingiriru bwekiribwa kihya kyenyumba ya Yahova.

¹¹ Hene yaho avasalisi navaprofeti va volera avanene navandu vosi, ni va vola, mundu uyu u dukani nelikudza; kigira ya profeta ku lidala yili, kuli mwa hulira namatu genyu.

¹² Ma Jeremia ya volera avanene navandu vosi, na a vola, Yahova ya ntuma nduke kuprofeta ku inyumba yiyi noku lidala yili makuva gosi ga mu huliye.

¹³ Kunangwa kalunu mu lombe tsing'endo tsyenyu nelikola lyenyu, na mu hulire mwoyo gwa Yahova Nyasaye wenyu; na Yahova a leganira ku budamano bwa ya li na a voye ku mwinye.

¹⁴ Navutswa ku makuva gange, henza, mbeye mu makono genyu: mu nkolere aga mu lola kuva malahi nobulungi imbiri wetsimoni tsyenyu.

¹⁵ Navutswa mu manye ligali, ni mu va ni mu nziita, mu la leta masahi ga ta li nekindu kugo ku mwinye avene, noku lidala yili, noku avamenyi mulyo; kigira ligali Yahova a ntumi ku mwinye kuvola makuva yaga gosi mu amatu genyu.

¹⁶ Hene yaho avanene navandu vosi va volera avasalisi navaprofeti: na va vola, Mundu uyu si a dukani neliitwa mba; kigira a voleye kwinye mu lieta lya Yahova Nyasaye wetu.

¹⁷ Hene yaho va singira valala ku vakulundu vekivala, ni va volera livugana lyosi lyavandu, ni va vola,

¹⁸ Mika Mumorashiti ya profeta mmadiku ga Hezekia, mwami wa Yuda; na ya volera avandu vosi va Yuda, na a vola, Yahova wa mahe a vola ndi: Zioni li la limwa kuli mulimi, na Yerusalemi li la va vitumi, na kigulu kyenyumba ki la leng'ana na hadiguiuku homulitu.

¹⁹ Hezekia mwami wa Yuda na Yuda vosi viita uyu Mika? Hezekia si ya tia Yahova, nokusaala tsimbabasi tsya Yahova na Yahova yeganira ku budamano bwa ya li na a voye kuvo? Na ndiyo ku va kuiiii Jeremia nkano ku koli ubudamano ubunene ku myoyo gyetu avene.

²⁰ Kandi ya li ho mundu wa profeta mu lieta lya Yahova, uyu Uria, mwana wa Shemaia wa Kiriathujearim; naye ya profeta ku lidala yili noku kivala yiki kuli makuva gosi ga Jeremia.

²¹ Na Jehoiakim mwami, halala navandu avaluviriri veve vosi, navanene veve vosi, lwa va hulira makuva gege, mwami yenya kumwiita; navutswa Uria lwa ya hulira, ya tia ni yiruka, na a tsia Egepeti:

²² na Jehoiakim mwami ya tuma avandu Egepeti; vanga, Elinathan mwana wa Akibori, navandi halala naye, va tsie Egepeti;

²³ na va ieta Uria kutwula Egepeti, na va mu leta ku Jehoiakim mwami; naye ya mwiita nekivavi, na ya ta mubiri mu vilindwa vyavandu va hanzahanza.

²⁴ Navutswa mukono gwa Ahikam mwana wa Shafan gwa li halala na Jeremia, va vule kumbika mmakono gavandu kumwiita.