Jeremia 23 - KITABU KITAKATIFU

¹ Bayaye ku avayi avononnya nokusalannya magondi gekyayo kyange Yahova a vola.

² Kunangwa Yahova Nyasaye wa Israeli, a vola ndi, ku avayi avayanga avandu vange: Mu salannyi kyayo kwange, nokugakunga, na si mu tsiye kugo; henza, nda leta ku mwinye ubudamano bwevikolwa vyenyu, Yahova a vola.

³ Na nda vungidza li tigala lyekyavo kyange kutwula vivala vyosi ha mba hili, na nda va leta kandi mu kego kyavo, na va livulana nokumedeka.

⁴ Na nda singeridza kuvo avayi, avokuvaya; na si va la tia kandi, kinga kutimuka enkolo, kandi si ha la va nomulala u gota, Yahova a vola.

⁵ Henze, madiku gadzanga, Yahova a vola, mugo nda singeridzira Daudi Kisibu kyobulungi, naye a lameha mwami na a la kola nobugeeri, na a la kola likalaga nobulungi mu kivala.

⁶ Mmadiku gege Yuda a la hona, na Israeli a menya mu mirembe; na lieta lilye lya a li gulikwa ni yili: YAHOVA BULUNGI BWETU.

⁷ Kigira yaga, henza, madiku gadzanga, Yahova a vola, mugo si va la vola kandi, Kuli Yahova a veye mwoyo, wanegiridza avana va Israeli kutwula mu kivala kya Egepete;

⁸ navutswa va la vola, Kuli Yahova a veye mwoyo wanegiridza nokwimirira kisukululwi kyenyumba ya Israeli kutwula mu kivala kya kasikasini, nokutwula mu vivala vyosi vya nda va hila mu. Na va la menya mu kivala kyavo avene.

⁹ Ku makuva gavaprofeti. Mwoyo gwange gwoneki mu inze, vigumba vyange vyosi vi degeranga; mbeye kuli umuhambiki, kuli mundu wa guutwa newaini, ga veye kigira Yahova, kandi kigira makuva gege matakatifu.

¹⁰ Kigira kivala yiki kizuye avaheyi; na kigira linyega, kivala ki vereranga; bwayiru bwomwigendanyama bwumi. Lugendo lwavo lu veye ludamano, nobunyali bwavo si bu veye bwobulungi;

¹¹ kigira muprofeti nomusalisi vombi va damani; yee, ndoli budamano bwavo mu inyumba yange, Yahova a vola.

¹² Kunangwa kigira yaga inzira yavo i la va kuvo kuli ha va terera mu kisundi: va la komololwa va tsia imbiri nokugwa muyo; kigira inze nda leta ubudamano kuvo, li vola li veye, muhiga gwelidukirwa lyavo, Yahova a vola.

¹³ Ndoli ubusiru ku vaprofeti va Samaria; va profeta na Baal, va kyaminya avandu vange Israeli.

¹⁴ Ku vaprofeti va Yerusalemi ndoli kandi kindu kyokumbihiriridza: va kola ubuheyi, nokugenda mu bubehi; nokuvika tsingulu mmakono ga yavo ava kola bmlamano, kmluka si ha veye nomundu wirana nokuleka ubudamano bwibwe: vosi va gwiye kuli Sodoma ku inze, na va menya mulyo va gwive kuli Gomora.

¹⁵ Kigira yaga Yahova wa mahe a vola ku makuva gavaprofeti: Henza, nda va leh dza vilulu, nokuvanwellidza indulwi: kigira ku avaprofeti va Yerusalemi lidamano li twuli kwingira mu kivala kyosi.

¹⁶ Yahova wa mahe a vola, Mu ta hulira amakuva ga vaprofeti ava profeteranga mwinye: va mwegidzanga amakuva ga vutswa: va volanga malola gemyoyo gyavo avene, si ga li aga twulanga mmunwa gwa Yahova mba.

¹⁷ Va voleranga kazozo yavo ava leganga inze, va vola, Yahova a voye, Mu la nyola mirembe; nomundu sa mulala u gendanga nobudinyu bwomwoyo gwigwe va mu volera, Ubudamano kali bulala si bu la mu nyola mba.

¹⁸ Kigira ni bwaha wa singira mu makuva ga Yahova, kuduka na a ga manya nokuhulira likuva lilye? Ni bwaha wa vika mu mwoyo likuva lyange, nokulihulira?

¹⁹ Henza, kihi kya Yahova, ki veye ubutima bwibwe bwomuliru, bu twuli, yee, ki veye kihi kyekihudzudzi: ki la hudukira ku mitwe gyavadamano.

²⁰ Ubutima bwa Yahova si bu lirana mba, a luhe a male likola, a luhe a twekidze lisaavira lyomwoyo gwigwe: mu madiku gekiheri mu la manya likuva yili bulahi.

²¹ Si nda tuma vaprofeti yava, navutswa va nyagula; si nda va volera navutswa va profeta.

²² Navutswa ni va va ni va singira mu likuva lyange, hene yaho nkano va kola avandu vange kuhulira amakuva gange, nokuvagirunkannya va leke tsinzira tsyavo tsindamano, nokuleka ubudamano bwelikola lyavo.

²³ Inze mbeye Nyasaye wa himbi, Yahova a vola, na si mbeye Nyasaye wehale?

²⁴ Ku vosi mundu a nyahl kwivisa mbwivisi mbula kumulola? Yahova a vola. Si ndizula ligulu nelirova? Yahova a vola.

²⁵ Mmali kuhulira ga avaprofeti va vola, ava profetanga bubehi mu lieta lyange, ni va vola, Ndoti amaloto, Ndoti amaloto.

²⁶ Makuva yaga ga la va mu myoyo gyavaprofeti ava profetanga bubehi kuduka inyinga ki, kali avaprofeti vobugadi bwemyoyo gyavo?

²⁷ Ava ganagananga kunga avandu vange vivirire lieta lyange kigira maloto gavo ga va voleranga mundu sa mulala nowakye, kuli avaguga vavo vivirira lieta lyange kigira Baal.

²⁸ Muprofeti u veye namaloto, a vole maloto gege; na uyu u veye nelikuva lyange, a vole likuva lyange nobusuuvirifu. Uluvuva lu veye ki kuvita ingano? Yahova a vola.

²⁹ Likuva lyange si li veye kuli muliru? Yahova a vola; kandi kuli inyundu yatanyannga ligina?

³⁰ Kunangwa kigira yaga henza, mbeye nobusigu ku avaprofeti, Yahova a vola, va nuula makuva gange ku mundu sa mulala nowakye.

³¹ Henza, mbeye nobusigu ku vaprofeti, Yahova a vola, ava tumekira tsinimi tsyavo nokuvola, Uyu a vola.

³² Henza mbeye nobusigu ku yavo ava profetanga amaloto gobubehi, Yahova a vola nokugavola, nokwikigitalidza avandu vange na makuva gavo gobubehi; nelyegingira lyavo lya vutswa: navutswa inze si nda va tuma mba, kandi si nda va laga; kandi si va konya avandu yavo kali hakuzu mba, Yahova a vola.

³³ Kandi avandu yava, kinga avaprofeti, kinga musalisi, lwa va ku teva, nokuvola, Musigo gwa Yahova gu veye ki? Hene yaho u la va volera, Musigo gu li ha? Nda mu ta ligali, Yahova a vola.

³⁴ Noku makuva gomprofeti, nomusalisi, navandu, lwa va vola, Gu veye musigo gwa Yahova, inze nda ha mundu uyu amageli nenyumba yeye.

³⁵ Mundu sa mulala a la volera wakye, na sa mulala a la volera amwavo wewe, Yahova a tivula kindu ki? Kandi Yahova u voye ki?

³⁶ Na musigo gwa Yahova si mu la gu volera kandi: kigira sa mulala likuva lilye mwene li la va musigo gwigwe; kigira mu mali kukyaminya amakuva ga Nyasaye u veye mwoyo, amakuva ga Yahova wa mahe, Nyasaye wetu.

³⁷ U la volera muprofeti likuva yili, Yahova u tivuliye ive kindu ki? Kandi, Yahova a voye ki?

³⁸ Navutswa ni mu vola, Gu veye musigo gwa Yahova; kigira yaga Yahova a vola: Kigira mu vola likuva yili, Gu veye musigo gwa Yahova, ndeti mutumwa ku mwinye, kumuvolera yaga, Mu ta vola, Gu veye musigo gwa Yahova;

³⁹ kigira yaga, henza, ndivirira mwinye ligali, na nda mu ta ihale, halala nelidala lya nda ha mwinye navaguga venyu, mu twule imbiri wommoni mwange:

⁴⁰ na nda leta ku mwinye linyegwa, li tsitsagil'langa mihiga nemihiga, nokuva netsisoni kazozo, vi la vula kwivirirwa.