Jeremia 22 - KITABU KITAKATIFU

¹ Yahova a vola: Sulunguta ku inyumba yomwami wa Yuda, na u vole yo likuva yili,

² u vole, U hulire likuva lya Yahova O mwami wa Yuda, wikalanga ku intebe yobwami ya Daudi, ive, navatumekiri vovo, navandu vovo vingiranga mu viribwa yivi.

³ Yahova a vola ndi: Mu lombe likalaga nobulungi, mu honnye wa fuulwa a twule ku mukono gwomudambidzi: mu ta kola ubukyamu, mu ta kole kirage, ku mugeni, kinga ku mbisandu, kinga ku mukunzakali kandi mu ta tahidza hano amasahi ga ta veye nekindu kugo.

⁴ Kigira ni mu kola yaga ligali, hene yaho va lingira mu viribwa vyenyumba yivi avami avokwikala ku intebe yobwami ya Daudi, avokunina magari gobwami noku tsiparasi, uyu, navatumekiri veve, navandu veve.

⁵ Navutswa ni mu vula kuhulira amakuva yaga inze nzisuhanga ku mwoyo gwange Yahova a vola, inyumba yiyi i la va hatswa.

⁶ Kigira Yahova a vola amakuva yaga ku makuva genyumba yomwami wa Yuda: Ive ku inze u veye Gileadi, kandi u veye mutwe gwa Lebanon; ligali nda kola ive kuva kyangalangwi, amadala gavandu va ta menya mu.

⁷ Na nda lomba ku ive avokwononnya, sa mulala nevyuma vivye; na va la temaga mitaragwa gyigyo mitovole, nokugyisigisa mu muliru.

⁸ Na tsihiri tsinyingi tsi la vita himbi ku lidala yili, na va la volerana sa mulala nowakye, Kigira ki Yahova ya kolera lidala linene yili kuli ndi?

⁹ Hene yaho va la tivula, Ga veye kigira va leka lilagana lya Yahova Nyasaye wavo, nokusigamira avanyasaye vandi nokuvatumekira.

¹⁰ Mu ta lilira uyu wa kudza, kandi mu ta mu syomera mba; navutswa mu lilira ligali uyu u tsitsanga ihale; kigira uyu si a lirana kandi, kinga kulola kivala kikye kya yivulwa mu.

¹¹ Kigira Yahova a vola yaga ku makuva ga Shalum mwana wa Josia, mwami wa Yuda, wameha mu bugono bwa dada wewe Josia, wa twula hano: A la vula kwirana kutwula yo;

¹² navutswa ha va mu hila mbuhambe, a la kudzira ho, na si a la lola kivala yiki kandi mba.

¹³ O bayaye ku uyu wombakanga inyumba yeye ku bu ta li bulungi, nevigodola vyenyumba yeye ku livuia kuva ubulungi; u tumekiranga ubutumiki bwowakye bugira kumuha madanyi gege, na si a mu tunga mitungu gyigye mba;

¹⁴ u volanga, Inze ndeyombakira inyumba imambalalu nevigodola vyobwiyangu, nokwehudulira madirisha; ya kunikwa mwigulu netsimbao tsyemitaragwa, nokubulwa nekibaala.

¹⁵ Ive u lameha, kigira u hing'ana kuduka kuguuta nemitaragwa? Dada wowo si ya lia nokunwa, nokulomba likalaga nobulungi? Kunangwa bwa li ubulahi kuye.

¹⁶ Ya kalaga makuva gomudaka nomudambi; kunangwa bwa li bulahi. Inkuva yiyi si i veye limanya inze? Yahova a vola.

¹⁷ Navutswa tsimoni tsitsyo nomwoyo gugwo si u veye nekya wenyanga ni li ta li likayirwa lilyo lyeng'ine, nokutahidza masahi ga ta li nekindu kugo, nokudambidza, noku kirage, kukola vindu yivi.

¹⁸ Kunangwa kigira yaga, Yahova a vola ku makuva ga Jehoiakim mwana wa Josia, mwami wa Yuda: Si va la mu syomera, kuvolu, O amwavo wange kinga, O mbotso wange Si va la mu syomera, kuvola, O munene wange kinga, O ubukumi bwibwe

¹⁹ A la tebwa kuli litebwa lya isukiri, kukweswa nokusigiswa kyova ihale neviribwa vya Yerusalemi.

²⁰ Wanegire, u tsie Lebanon, u lire; u hanzuke mu Bashan, nokukupa lukwili kutwula Abarim; kigira avayanze vovo vosi va divi.

²¹ Inze nda ku volera inyinga yeligasidzwa lilyo, navutswa wa vola, Si nyenya kuhulira. Yigu ni mwima gugwo kutwula bwana buke, ogwa ive u vula kuhulirira mwoyo gwange.

²² Imbuudza i la lehidza avayi vovo vosi, na vayanze vovo va yanzanga ive va la lanywa: ligali ive inyinga yeyo u la va isoni nokutimuka enkolo kigira ubudamano bubwo bwosi.

²³ O ive u menyanga Lebanon, wombakanga kyaalira kikyo mu mitaragwa, kuli ga li ku dukira ku vereerwa lwa lilumwa li duka ku ive lilumwa kuli lyomukali wivulangai.

²⁴ Kuli inze mbeye mwoyo, Yahova a vola, kali Konia mwana wa Jehoiakim mwami wa Yuda ni ya li imingiri yomuhuri ku mukono gwange mulungi, nkano nda ka twulidza ive ha zana;

²⁵ na nda ku vika mmakono ga yavo avenyanga livamwoyo lilyo, nommakono ga yavo ava u tidzanga, livola li veye mmukono gwa Nabukadirezaru mwami wa Babuloni, nammakono ga Vakalidei.

²⁶ Na nda ku sigisa kyova, ive halala na raama wowo wa kwivula, kuduka mu kivala kindi, kya mwa vula kwivulwa mu; na mu la kudzira yo.

²⁷ Navutswa kivala kyemyoyo gyavo gyi kayirangwa kwirana ku, si va lirana ku mba.

²⁸ Mundu uyu Konia a veye kiju kyokulegwa kyatannywa? A veye kiju si ha veye nowo kusangala nakyo? Kigira ki va sigiswa kyova uyu nekisukululwi kikye, nokusigiswa mu kivala kya va ta manya?

²⁹ O lirova, lirova, lirova, hulira likuva lya Yahova.

³⁰ Yahova a vola, Mu ng'ode mundu uyu u ta veye navana, mundu u vula kuvasidzwa mmadiku gege: kigira si ha veye nomundu ku vosi mu kisukululwi kikye u gasidzwa, kali wikala ku intebe yobwami ya Daudi, nokwameha mu Yuda.