Isaya 65 - KITABU KITAKATIFU

¹ Avandu va vula kunyenya va nteva; nnyoleki ku yavo ava vula kunyenya: nehiri ya vula kulangwa ku lieta lyange, nda gi volera, Lola inze, lola inze.

² Nda nyira mukono gwange mbasu bei ku ve baali, ava gendanga ku inzira i ta li indahi, kulonda tsiganagani tsyavo avene;

³ va veye avandu mbihiridzanga kazozo imbiri wetsimoni tsyange, ava haananga vihaanwa mu milimi gyavo, nokuvuyidza vimuli ku matafali,

⁴ avandu vikalanga hagati hevilindwa, nokugona hokwivisa; ava litsanga tsnyama tsyempidzi, nomunyu gwevindu vyokumbihiriridza gu veye mu viju vyavo;

⁵ ava volanga, Singira weng'ine, u tesunda ku inze, kigira mbeye mutakatifu kuvita ive. Yava va veye mwoki mu amolu gange, muliru gwaakanga mbasu bei.

⁶ Henza, likuva yili li ng'odeywi imbiri wange: si nda kiring'ana, navutswa nda tunga amaanyi, yee, nda tunga amadanyi gavo mu viritu vyavo,

⁷ ubudamano bwenyu avene, nobudamano bwa va dada venyu halala, Yahova a vola, mwinye ava vuyidzi kimuli ku vigulu, nokunyegera mu tugulu: kunangwa kigira yaga nda tanga kuvagerera miyinzi gyavo mu viritu vyavo.

⁸ Yahova a vola ndi, Kuli iwaini impya i nyolekanga mu kiganda, na mulala a vola, U tononnya, kigira bugasu bu veye mukyo: ni ndiyo ndi kola ku vatumekiri vange, mbule kuvononnya vosi.

⁹ Nda leta bugutsa kutwula ku Yakobo, na wemi yandu gyevigulu vyange kutwula ku Yuda; na mutovole wange a la nyola miyandu, na vatumekiri vange va la menya yo.

¹⁰ Na Sharon ki la va kego kyevyayo, nelivona lya Akori ha la va hetsing'ombe tsi gona, kigira avandu vange va nyenyi.

¹¹ Navutswa mwinye ava lekanga Yahova, avivirira kigulu kyange kitakatifu, ava lombera Ubutugi imeza, ni vizulitsa viju iwaini ya tsuganywa ku misambwa;

¹² nda mu validza mu ve avekivavi, na mwosi mu la sigamira liitwa; kigira lwa nda langa, si mwa bugira; lwa nda vola, si mwa hulira; navutswa mwa kola agobudamano imbiri wetsi moni tsyange, nokutovola ga inze nta yanza.

¹³ Kunangwa Mwami Nyasaye ya vola yaga, Henza, avatumekiri vange va la lia, navutswa mwinye mu la va nenzala; henza, avatumekiri vange va la nwa, navutswa mwinye mu la va nobuluhu; henza, avatumekiri vange va la sangala, navutswa mwinye mu la va isoni,

¹⁴ henza avatumekiri vange va limba kigira ubuyanzi bwemyoyo, navutswa mwinye mu l la lira kigira liverera lyomwoyo muinye mu la kupa tsikwili kigira ubululu bwemyoyo gyenyu.

¹⁵ Mu la leka lieta lyenyu kuva kilaamo ku vatovole vange; Mwami Nyasaye a liita ive; na a la gulika avatumekiri veve lieta lindi:

¹⁶ kuduka ga la va uyu wegasidza mwene mu lirova a legasidza mu Nyasaye wageligali; na uyu wesuha mu lirova, a lesuha ku Nyasaye wageligali; kigira vivi vya kale vi mali kwivirirwa, kandi kigira vi viseywi ku tsimoni tsyange.

¹⁷ Kigira, henza, nombanga ligulu lihya nelirova lihya; nevindu vya kale vi la vula kwidzulitswa, kandi si vi lingira mu myoyo mba.

¹⁸ Navutswa mu ve nobuyanzi mu sangale madiku gosi mu vya nombanga; kigira, henza, nombanga Yerusalemi li ve lisangala, navandu veve kuva ubuyanzi.

¹⁹ Nda sangalira Yerusalemi, nda yanza mu avandu vange; mwoyo gwelisyoma si gu la hulirwa kandi mulyo mba, kinga mwoyo gwelilira.

²⁰ Si a la va ho kandi mwana mudoto wa madiku makekeke, kinga musakulu u kikiri kudukidza madiku gege: kigira mwana a la kudza na a veye mihiga mia, nowo bwoni wemihiga mia a la laamwa.

²¹ Va lombaka tsinyumba, nokumenya mutsyo; va la taga mizabibu na va la lia makuyu gagyo.

²² Si va lombaka, ma wundi a menya mu mba; si va la taga, ma wundi a lia makuyu mba: kigira kuli amadiku gomusala ga veye ni ndiyo madiku gavandu vange ga la va, avatovole vange va la sangalira madiku manyingi mu miyinzi gya makono gavo.

²³ Si va la kola miyinzi gya vutswa, kandi si va livulira kivi; kigira va veye kisukululwi kya uyu wa gasidzwa wa Yahova, na lwivulu lwavo halala navo.

²⁴ Na ga la duka kuva, ni va kikiri kunanga, nda bugirirana lwa va veye mu livola, nda hulira.

²⁵ Kisalang'ongo neligondi vi laya haiala, king'ang'a ki la lia bunyasi kuli ing'ombe yayanga; na lugukyi ga la va kyokulia kyenzoka. Si vi la saliridzana kandi si vi lononnyana mu kigulu kyange kitakatifu kyosi, Yahova a vola.