Isaya 60 - KITABU KITAKATIFU

¹ Yuka, u ng'ereng'ane; kigira vv ubulavu bubwo bu duki, nobukumi bwa Yahova bu kyeye ku ive.

² Kigira, henza, kisundi ki la kunika lirova, nekisundi kinene ki la kunika avetsihiri: navutswa Yahova a la kya ku ive, nobukumi bwibwe bu la loleka ku ive.

³ Na tsihiri tsing'ano netsing'ano tsi ladza ku bulavu bubwo, navami va ladza ku bung'ering'anu bwelikya lilyo.

⁴ Ginga tsimoni tsitsyo u lole ku tsimbega tsitsyo: vosi vevungidze avene halala, vadzanga ku ive; avana vovo vayai va ladza ku ive kutwule ihale, avana vovo avakana va la gingirwa mmakono.

⁵ Hene yaho u la lola nokung'ereng'anywa, na mwoyo gugwo gu la vukidzwa nokuneneha; kigira ubunyingi bwenyanza bu la girunkanywa budze ku ive, buhinda bwavetsihiri bu ladza ku ive.

⁶ Ubunyingi bwetsing'amia bu la ku kunika, netsing'amia tsisoleli tsya Midiani na Efa; vosi va twula Sheba va ladza; va la leta ithahabu nekimuli, na va lilwadza lidzominya lya Yahova.

⁷ Vyayo vyosi vya magondi ga Kedari vi la vungidzwa ku ive, magondi makole aga Nebaio thu ga la tumekira ive; ga lanegira igulu ku bwali bwange bwokubugirirwa; na nda kuminya inyumba yo bu kumi bwange.

⁸ Yava ni bwaha ava bulukanga kuli lilesi, kuli madiri sha ga bulukanga kutsia mu myanzu gago?

⁹ Ligali visulu vi la ni ndirira, na amato ga Tarshishi ga limirira, ga duke kuleta avana vange avayai kutwula ihale, ifetha yavo nethahabu yavo va la va navyo, vi ve vyelieta lya Yahova Nyasaye wowo, na vya Mutakatifu wa Israeli, kigira a kuminyi ive.

¹⁰ Na vageni va lombaka madigi gogo, na avami vavo va la ku tumekira; kigira mbutima bwange nda ku kuya, navutswa mbuyanzi bwange nda ku vera tsimbabasi.

¹¹ Viribwa vivyo vi ligulwa madiku gosi; si vi la hanwa mbasu kinga budiku avandu va duka kukuletera ubutugi bwa vetsihiri, na avami vavo va limi rirwa va li avahambe.

¹² Kigira ihiri yeyo nobwami yibwo bu vule kukutumekira bu la diva; yee, tsihiri yitsyo tsi la dividzwa ligali.

¹³ Ubukumi bwa Lebanon bu ladza ku ive, cypres, na gwobusuvu, na musala gwabokisi halala, kukola halahi hatakatifu hange; na nda kola ha bugono bwevirenge vyange kuva aho bukumi.

¹⁴ Navana vayai va yavo ava dambi dza ive va ladza kukwinamira; na yavo vosi ava ku lega va leyinaminya avene ha tsinduvatiru tsitsyo; na va la ku langa, Lidala lya Yahova, Zioni lyo Mutakatifu wa Israeli.

¹⁵ Kuli wa lekwa nokudunyirwa, kuduka ni ha vula kuva nomundu wa vita hagati hoho, nda ku kola u ve ubunene bwemihiga nemihiga, ubusangali bwa makula manyingi.

¹⁶ U la nuna amaveere gavetsihiri, na u la nuna tsimbeere tsyavami; na u la manya inze, Yahova, mbeye Muhonnyi wowo, Mutungiri wowo, Wanyala Vyosi wa Yakobo.

¹⁷ Nda leta ithahabu mbugono bwomugasa, na nda leta ifetha mbugono bwevivya, nomugasa mbugono bwomusala, na vivya mbugono bwamagina. Nda kola avasingeriri vovo kuva mire mbe, navasololi vovo kuva ubulungi.

¹⁸ Kirage ki la vula kuhulirwa kandi mu kivala kikyo, kandi litigala hatswa, nobwoneku si vi la va mu tsinzako tsitsyo mba; navutswa madigi gogo u la ga gulika lieta yili, Ubuhonnyi, neviribwa vivyo u la vi gulika lieta Lidzominya.

¹⁹ Liuva li la vula kuva ubulavu bubwo kandi inyinga yombasu; kandi ku bung'e reng'anu yibwo mweli si gu la ku ha ubwaaku kandi: navutswa Yahova a la va ubulavu bwemihiga nemihiga ku ive, Nyasaye wowo a la va bukumi bubwo.

²⁰ Liuva lilyo si li la yera kandi mba, kinga mweli gugwo si gu livisa kandi; kigira Yahova a la va bulavu bubwo ubu hongeranga mihiga nemihiga, na madiku gelisyoma lilyo ga la vita.

²¹ Avandu vovo va la va avobulungi vosi; va la lia miyandu gyekivala mihiga nemihiga; lusya lwelisimika lyange mwene, miyinzi gyamakono gange mwene, nduke kukuminywa.

²² Mukekeke a la gwa elfu, na mulala mukekeke a la va ihiri yetsingulu: Inze, Yahova, nda kola bwangu inkuva yiyi ku inyinga yayo.