Isaya 52 - KITABU KITAKATIFU

¹ Vuka, vuka, wivike ubunyali bubwo, O Zioni; wivike tsingubo tsitsyo tsindahi, O Yerusalemi, lidala litakatifu: kigira kutwula inyinga ya kalunu si a lingira ku ive kandi wa vula kukevwa na u veye mudamano.

² Weyeye ulugukyi; vuka, wikale, O Yerusalemi: weboholole viboheru vivyo migoti lilyo, O mwana wa Zioni, mukana wa li muhambe.

³ Kigira Yahova a vola ndi, Mwinye mwa gulidzwa vutswa; na mu la tungirwa bugira ifetha.

⁴ Kigira Yahova Nyasaye a vola ndi, Ku matsyambiri avandu vange va sulunguta Egepeti kumenya yo avageni: na Muasuria ya va dambidza bugira kivune.

⁵ Kunangwa kalunu, nkola ki hano, Yahova a vola, kigira avandu vange va hilangwa vutswa bugira ubuguli? Avamehanga kuvo va ha nzuka, Yahova a vola, lieta lyange li nyegangwa kazozo mbasu bei.

⁶ Kigira yaga avandu vange va la manya lieta lyange: kigira yaga va la manya mu lidiku lilyo ni inze u volanga; mu henze a veye inze.

⁷ Vya li vilahi ki mu vigulu, virenge vya uyu u letanga makuva malahi, u landidzanga makuva gemirembe, u letanga makuva malahi gevindu vilahi, u landidzanga makuva gobuhonywi; u voleranga Zioni, Nyasaye wowo wamehanga

⁸ Mwoyo gwa valindi vovo va ginga myoyo gyavo, vimba halala; kigira va la lola moni na moni, inyinga Yahova yirana Zioni.

⁹ Mu twulidze tsinyimbu tsyobuyanzi, mwimbe halala, mwinye aha li hatswa ha Yerusalemi; kigira Yahova a leminya myoyo gyavandu veve, u tungiye Yerusalemi.

¹⁰ Yahova u vimbuye mukono gwigwe mutakatifu imbiri wetsimoni tsyetsihiri tsyosi; na tsindulu tsyosi tsyelirova tsi la lola ubuhonnyi bwa Nyasaye wetu.

¹¹ Mu tsie, mu tsie, mu twule yaho ha mu veye, mu ta dira kindu kidamano mba; mu twule hagati halyo; mu ve avanifu, mwinye ava ginganga viju vya Yahova.

¹² Kigira si mu la tsia kyova bwangu bwangu, kandi si mu la genda neliruka: kigira Yahova a limira imbiri wenyu; na Nyasaye wa Israeli a la va wokumulonda inyima.

¹³ Henza, mutumekiri wange a la kola nobugeeri, a la kuminywa nokugingwa igulu, a la va igulu ligali.

¹⁴ Kuli avanyingi va ku genyera (mumoni mwimwe mwoneka kuvita avandu vosi, na ligondo lilye lya li ni liyoneki kuvita avana va vandu),

¹⁵ ni ndiyo a la sama tsihiri tsinyingi; avami va la kunika minwa gyavo kuye: kigira vindu vya va vula kuvolerwa va la vi lola; na ga va vula kuhulira va la ga manya.