Isaya 5 - KITABU KITAKATIFU

¹ Nyimbire muyanze wange lwimbu lwomuyanze wange ku kizabibu kikye. Muyanze wange ya li nekizabibu mu kigulu kyamarova malahi:

² naye ya ki lima, nokutwulidza magina gakyo, nokusimika mu muzabibu mulahi kuvita gyosi, nokwombaka kitaradzi hagati hakyo, nokuyava mu kiminiru kyewaini: na a henzerera gwame mazabibu, navutswa gwama mazabibu gomulitu.

³ Kalunu, O, ave Yerusalemi navasatsa ave Buyuda, mwadza, mu kalage hagati hange nekizabibu kyange.

⁴ Ha veye na miyinzi ki n gyindi gya li kunyala kukolwa mu kizabibu kyange, gya nda vula kukola? Kunangwa, kigira ki lwa nda henzerera kyame mazabibu, navutswa kyama mazabibu gomulitu?

⁵ Kalunu nda mu volera miyinzi gya nda li kukolera kizabibu kyange: nda twulidza ulwebo lwakyo, na ki la libwa; nda sambula lugaga lwakyo, na ki la duvagwa:

⁶ nda ki kola hatswa; ki la vula kusemberwa, kinga kulimwa; navutswa ki la mera amafwa nolutavati: kandi nda laga malesi ga vuli kukupidza imbula kukyo.

⁷ Kigira kizabibu kya Yahova wa mahe ki veye inyumba ya Israeli, navasatsa va Yuda va veye muzabibu mulahi; naye ya henzerera likalaga lilungi, navutswa ya lola lidambidzwa; na ya henzerera ubulungi, navutswa ya hulira lilira.

⁸ Ubudamano bu veye kuvo ava medanga inyumba ku inyumba yindi, na va hambannya mulimi ku mulimi gundi, ubwiyangu bu luhe bu dake, na mwinye ga mu dukiye kudalang'ana hagati hekivala

⁹ Mu amatu gange, Yahova wa mahe a vola, Ligali tsinyumba tsinyingi tsi la lekwa tsing'anye, kali tsi veye tsinene na tsindahi, tsi la va bugira avandu.

¹⁰ Kigira kizabibu kyeligera lyevi renge tsimia tsine ki lama tsisiongo tsiviri, nobumwo bu duka mudiema bu lama ubuswage kihinda kilala.

¹¹ Ubudamano bu ve ku yavo ava vukanga mabwebwe, va duke kulonda lihambika; ava hongeranga kuduka ubudiku hagati, iwaini i luhe yaakidze muliru muvo

¹² Nobukana, nolu kugi, nekindu ku lugano lwesuguti, nelilere, newaini, vi veye mu lilia lyavo; navutswa si va ganagana likola lya Yahova, kandi si va ganagananga miyinzi gyamakono gege.

¹³ Kigira yaga avandu vange va lanywa kigira va daka limanya; navandu vavo avelimanyikana va kudza nenzala, navanyingi kuvo va kudzanga nobuluhu.

¹⁴ Kigira yaga Kihadisi ki galaminye ligali likayirwa lyakyo, nokwalaminya munwa gwakyo kuvita kigero; nobukumi bwavo, nobunyingi bwavo, noluyai lwavo, na uyu u sangalanga hagati havo, viyongoveranga mu.

¹⁵ Na uyu munyaviru yinaminyangwa hasi, na munene a gehidzangwa, netsimoni tsyavadiguluku tsyeyondidza:

¹⁶ navutswa Yahova wa mahe u nenehidzeywi mu likalaga, na Nyasaye Uyu Mutakatifu u takaseywi mu bulungi.

¹⁷ Inyinga yeyo avana va magondi va leyaya kuli va veye mu kyayiru kyavo avene, na hatswa hosi havakomeru vagendagendi va la lia.

¹⁸ Budamano bu ve kuvo avakwesanga budamano nemigoye gyobubehi, nokukwesa ubwoni kuli nomugoye gweligari;

¹⁹ navo ava volanga, A kole bwangu, yanguhidze miyinzi gyigye ku gyi lole; na makuva go Mutakatifu wa Israeli gesunde himbi gadze, ku ga manye

²⁰ Ubuda mano bu ve kuvo ava langa buda mano ubulahi, nokulanga bulahi ubudamano; yavo ava vikanga kisundi mu bugono bwobulavu, nobulavu mu bugono bwekisundi; ava vikanga ubululu mbugono bwobunolu, nobunolu mbugono bwobululu

²¹ Ubuda mano bu ve ku yavo ava veye nobugeeri mu tsimoni tsyavo avene, navelimanya mu tsiganagani tsyavo

²² Ubudamano bu ve kuvo avetsi ngulu tsyokunwa iwaini, noku ave tsingulu kutsukannya vyokuhambikidza;

²³ avahedzanga mudamano ubulungi ni va vugula kikukula, na va nuula wobulungi ubulungi bwibwe.

²⁴ Kigira yaga, kuli lumemo lwomuliru lu kaminya luvuva, na kuli ubulimu bwuma bwinamanga mu lumemo, ni ndiyo kitinya kyavo ki la va kuli libutsi, nekimuli kyavo ki la vuyidzwa igulu kuli lugukyi; kigira va sula amalago ga Yahova wa mahe, na va lega likuva lyo Mutakatifu wa Israeli.

²⁵ Kigira yaga ubutima bwa Yahova bwaaki ku avandu veve, naye unyiye mukono gwigwe kuvo, nokuvakuya; nevigulu vi degera, nemibiri gyavo mikudzu gyi gwiye kuli amavivi hagati ha mahasi. Ku yaga gosi ubutima bwibwe bu kikiri ku girunkanywa, navutswa mukono gwigwe gu nyireywi kuduka kalunu.

²⁶ Na a la gingira tsihiri tsye hale ibendera, na a la va langira kutwula ku kiheri kyelirova; na henza, va ladza tsimbiru ligali.

²⁷ Si ha veye nomulala hagati havo u luha kinga wikigitala; si ha veye na u gona, kinga kutengeza; kinga tsinegeyi tsyombikenge bwavo si tsi dendeya mba, kinga migoye gyevilatu vyavo si gyi la boholoka mba:

²⁸ avandu ave mibano gyavo gyi veye miyogi ligali nobuta bwavo bwekumbi kwetegeka; tsimbagayu tsyetsiparasi tsyavo tsi la ganaganwa tsi veye magina madinyu, netsingida tsyatsyo kuli kihudzudzi:

²⁹ lihuma lyavo li la va kuli lifwuma lyeking'ang'a, va la fwuma kuli ving'ang'a visoleli; yee, va la fwuma noku gumira vilanye, nokuvivugula va tsie navyo bulahi, na si ha la va nomundu kuvahonnya.

³⁰ Va la fwuma kuvo mu lidiku yilyo kuli liluuma lyenya nza: mundu na a va na a henza kivala a la lola kisundi kandi kivi; nobulavu bu mwaminyeywi mu malesi gyakyo.