Isaya 43 - KITABU KITAKATIFU

¹ Navutswa kalunu Yahova wa ku lomba, ive Yakobo, naye wa ku longa, ive Israeli, a vola ndi: U ta tia mba, kigira mmali kukutungira; nku langi nelieta lilyo, u veye wange.

² Lwa u vita mmadzi manene, nda va halala nive; nomumigera, gyi la vula kukwina; lwa u genda mmuliru, u la vula kuhya; kandi ulumemo lwomuliru si lu laaka ku ive.

³ Kigira inze mbeye Yahova Nyasaye wowo, Mutakatifu wa Israeli, Muhonnyi wowo; mmali kuhaana Egepeti kuva umutungu gugwo, mbaani Ethiopia na Seba kigira ive.

⁴ Kigira ive u veye wobuguli budinyu mbiri wetsimoni tsyange, no welidzominywa, na nku yanzi; kunangwa kigira yaga nda haana avandu mu bugono bubwo, netsihiri nda haana mu bugono bwelivamwoyo lilyo.

⁵ U ta tia mba; kigira inze mbeye halala nive: nda leta kisukululwi kikyo ki twule ivugwe, na nda ku vungidza kutwula madioli;

⁶ nda volera kasikasini, Haana; na kusini, U tigalira mba; leta avayai vange kutwula ihale, navakana vange kutwula ku kiheri kyelirova;

⁷ sa mulala ava langwa ku lieta lyange, wa nda lombera ubukumi bwange, wa nda mu lomba, yee, wa nda mu kola.

⁸ Leta avaboku ava va veye netsimoni, na va hana amatu ava veye namatu.

⁹ Avetsihiri tsyosi va vunge halala, navandu va vugane halala: ni bwaha hagati havo u nyala kwilwadza likuva yili, nokukuvuulira vindu vya kale? Va lete avaloli vavo, va lolwe kuva avalungi; kinga va hulire, nokuvola, Likuva yili ni lyeligali.

¹⁰ Mwinye mu yeye avaloli vange, Yahova a vola, mutumekiri wange wa nda tovola; mu duke kumanya nokusuuvira inze, nokumanya inze niye: imbiri ku inze Nyasaye si a lombwa yo mba, kandi inyima ku inze si a la va yo wundi mba.

¹¹ Inze, yee, inze mbeye Yahova; na a ta li inze si ha veye nomuhonnyi.

¹² Inze mmali kulandidza makuva, mmali kuhonnya, mmali kuvuula; si ha li nomunyasave mugeni hagati henyu: kigira yaga mwinye mu veye avelolekidzi vange, Yahova a vola, na inze mbeye Nyasaye.

¹³ Yee kutwula ku lidiku lya li ho, inze niye, na si ha veye na u nyala kuhonnya ku mukono gwange: inze nda kola miyinzi, ni bwaha u nyala kugyigalira?

¹⁴ Yahova, Mutungiri wenyu, Mutakatifu wa Israeli, a vola ndi: Kigira mwinye nda tuma mutumwa Babuloni, na ndikidza vosi kuli avakungi, kali Vakalidei, mu bwato bwelisangala lyavo.

¹⁵ Inze mheye Yahova, Mutakatifu wenyu, Mu lombi wa Israeli, Mwami wenyu.

¹⁶ Yahova a vola, uyu u lombanga inzira mu inyanza, inzira mu madzi manene;

¹⁷ u letanga kyova ligari lyobulwani na iparasi, lihe nomu nyali (va gona hasi halala, si va la vuka kandi; va simi, va siminywa kuli ikatani):

¹⁸ Mu tidzulitsa vindu vyoku matsyambiri, kandi mu ta ganagana vindu vya kale.

¹⁹ Henza, nda kola kindu kihya; ki la sebuka kalunu ndi; mwinye si mu la ki manya? Nda lomba inzira mu kyanga langwi, na migera migendanyama.

²⁰ Tsinyama tsyombulimu tsi la kuminya inze, vibwe na maudo; kigira mbaana amadzi mmigendanyama, na migera mu kyangalangwi, kuha avandu vange linwa, avatovole vange,

²¹ avandu va ndelombera inze mwe ne, va duke kulandidza lidzominywa lyange.

²² Halala na yaga ive Yakobo, si wanira inze; O Israeli, wa luha ku inze.

²³ U vuli kundetera magondi kuva vihaanwa vyokusambwa; kandi u vuli kunzidzominya nevihaanwa vivyo. Inze si nku niga kuntumekira nevihaanwa vivyo, kandi si nku luhidza nevimuli.

²⁴ Si wa ngulira mikonye nefetha yoyo, kandi wa vula kunzigutidza na maguta gevihaanwa vivyo; navutswa u mmini no bwoni bubwo, u nduhidzi nobudamano bubwo.

²⁵ Inze, yee, inze niye weyanga mahyolo gogo kigira mwoyo gwange; na si ndidzulitsa ubwoni bubwo.

²⁶ U nkolere nzidzulire; ku lombe likalaga halala: u lang'aminye makuva gogo, u duke kuhebwa ubulungi bubwo.

²⁷ Guga wowo wokutanga ya kola ubwoni, navegidzi vovo va hyola ku inze.

²⁸ Kigira yaga nda va vika ubudamano avanene va hatakatifu; na nda kola Yakobo kuva lilaamwa, na Israeli kuva manyego.