Isaya 42 - KITABU KITAKATIFU

¹ Henza, mutumwa wange, wa ndiranga; mutovole wange, womwoyo gwange gu sangalira muye: nda vika kuye Roho wange; naye a la letera Avetsihiri likalaga.

² Si a la lira, kandi si a li hanzuka, mwoyo gwigwe si gu la hulirwa ku inzira.

³ Kidundu kya minika si a la ki vunanya mba, na ikatani ki vuyanga mwoki si a la siminya mba: a la leta likalaga mu ageligali.

⁴ Si a la tamwa kandi si a la kudza mwoyo a luhe a duke kusingeridza likalaga lyobulungi mu lirova; nevisulu vi la lindirira lilaga lilye.

⁵ Nyasaye Yahova a vola, uyu wa lomba ligulu, nokulivagala; uyu wa vambula lirova na vyosi vi twulanga mulyo; uyu u haananga mwika ku avandu vosi va veye kulyo, nokuhaana roho kuvo ava gendanga kulyo:

⁶ Inze, Yahova, nku langi mbulungi, nda ku gumira mukono, nokukulinda, nda ku haana u ve lilagana lyava ndu, nokuva ubulavu bwa Vetsihiri:

⁷ kukunula tsimoni tsi ta lolanga, kuvatwulidza mbuhambe avabofwa, na ava menyanga mu kisundi kuvatwulidza mu inyumba yavahambe.

⁸ Inze mbeye Yahova, yili ni lieta lyange; ubukumi bwange si nda ha wundi mba, kandi si nda ha vifwananyi vya vadzwa lidzominywa lyange mba.

⁹ Henza, vindu vyoku tanga vi duki, na mbuulanga vindu vihya; lwa vi kikiri kuloleka nda mu volera.

¹⁰ Mwimbire Yahova lwimbu luhya, mwimbe lidzominywa lilye ku twula ku kiheri kyelirova; mwinye ava sulungutanga mu inyanza, na vyosi vi veye muyo, visulu, na vosi avamenyi muvyo.

¹¹ Ligendanyama halala na madala galyo ga ginge myoyo gyago, na tudala twa Kedari a menya mu, ava menyanga Sela vimbe, va hanzuke ku tsisonga tsyevi gulu.

¹² Va kuminye Yahova, nokwilwadza lidzominywa lilye mu visulu.

¹³ Yahova a la twula kuli mundu wanyala: a la vukidza ubugulu kuli mundu wobulwani: a la hanzuka, yee, a la kupa lwanga; a la kola vindu vyetsingulu ku vasigu veve.

¹⁴ Inyinga intambi nkiring'ani; nzehodzeridzi, nokwegaya: kalutlu nda hanzuka kuli mukali u lumangwa nda nagira myika nokuherana halala.

¹⁵ Ndononnya vigulu notugulu, nokunialidza tsingutsa tsyavyo tsyosi; nda kola migera kuva visulu, nokuka minya madavalia gamadzi.

¹⁶ Nda leta avaboku ku inzira ya va ta manya; nda va hila ku tsinzira tsya va ta manya; nda kola kisundi kuva ubulavu imbiri wavo, na ha kyama nda lungekidza ho. Makuva yaga nda kola, si nda va leka mba.

¹⁷ Va liranywa inyima, va la va isoni ligali, ava suuviranga vifwananyi vyavadzwa, ava voleranga vifwananyi vya longwa vyene, Mwinye mu veye vanyasaye vetu.

¹⁸ Mu hulire, mwinye avahana amatu; na mwinye avaboku mu henze, mu duke kulola.

¹⁹ Ni bwaha u veye mboku, na a ta li uyu mutumwa wange? Kandi ni bwaha wa hana amatu, kuli mutumwa wange wa ntumanga? Ni bwaha u veye mboku kuli uyu u veye nemirembe ku inze, a veye mboku kuli mutume kiri wa Yahova?

²⁰ Ive u lola vindu vinyingi, navutswa si u vi vikanga ku mwoyo mba; amatu gege galami, navutswa si a huliranga.

²¹ Ga yanzidza Yahova, kigira ubulungi bwibwe, kukuminya Lilaga, noku likola lidzominywe.

²² Navutswa avandu yava va veye ava nuulwa nokulanywa; vosi va gumirwa nemitego mu bogo, nokuviswa mu tsi nyumba tsyavahambe: va gwiye vilanye, si ha veye nomuhonnyi; va gwiye kilanye, si ha veye no u volanga Wirannye.

²³ U li ha hagati henyu u li tegidza amatu kuhulira yaga? U huliridza nokuhulira ku tsinyinga tsidzanga?

²⁴ Ni bwaha wa haana Yakobo a ve kilanye, ni bwaha wa vika Israeli ku vanuuli? Si a li Yahova u a kola? Wa kwinye ku mu koleye ubwoni, na va vula kubugirira ku genda mu tsinzira tsitsye, kandi si va hulira amalago gege.

²⁵ Kigira yaga ya tsuka kuye ubululu bwobu tima bwibwe, netsingulu tsyobulwani; navyo vya mu vikirira muliru tsi mbega tsyosi, navutswa si ya manya; na gwa mu samba, naye si ya vika ku mwoyo.