Isaya 4 - KITABU KITAKATIFU

¹ Ma avakali vatano na vaviri va la gumira musatsa mulala mu lidiku yilyo, nokuvola, Kwinye ku la lia vyokulia vyetu avene, nokwivika tsingubo tsyetu: navutswa ku langwe ku lieta lilyo; yaga geng'ine, ive twulidze tsisoni ku kwinye.

² Mu lidiku yilyo lusya lwa Yahova lu la va lulahi nokuva nobukumi, na makuyu gelirova ga la va amalahi ligali na manolu ga ve ga yavo avahona ku Vaisraeli.

³ Na ga la duka, uyu wa lekwa mu Zioni, na uyu wa tigala mu Yerusalemi, a la langwa mutakatifu, kali sa mulala wa ng'odwa mu yavo ava veye mwoyo mu Yerusalemi:

⁴ lwa Yahova a mali kwogidza ubudamano bwavakana va Zioni, nokutwulidza amasahi ga Yerusalemi hagati halyo, na roho gwelikalaga bulungi, na roho gwelisamba.

⁵ Kandi igulu wohokumenya hosi mu kigulu kya Zioni, na igulu wa mavugano gakyo, Yahova a la lomba lilesi nomwoki inyinga yombasu, nobung'ering'anu bwomuliru gwolumemo inyinga yobudiku; kigira kyokukunika ki la kunika ubukumi bwosi.

⁶ Mahema ga la va ho ukuva kiriri inyinga yombasu kigira uluya, nekyokufuma ubukindu nembula.