Isaya 32 - KITABU KITAKATIFU

¹ Henza, umwami a lameha mu bulungi, navanene va lameha nelikalaga.

² Na mundu a la va kuli hokwivisa ku mbuudza, na hoku kunika ku kihi; kuli migera gya madzi mu ahumu, kuli kiriri kyolwanda mu kivala kyeliluha.

³ Na tsimoni tsya yavo ava lolanga si tsi la tsengera, na amatu ga yavo ava huliranga, ga la huliridza.

⁴ Mwoyo gwa uyu u veye mugwirirani gu la manya ubugeeri, na tsinimi tsya yavo avekevoyo tsi letegeka kuvola bulungi.

⁵ Na musiru si a la langwa kandi mulahi, kandi mwimani si a la langwa kandi muhaani.

⁶ Kigira musiru a la vola agobusiru, nomwoyo gwigwe gu la kola vidamano, nokutumekira kirage, nokuvola bukyamu ku Yahova, kukola mwoyo gwa uyu u veye nenzala kuva vutswa, nokukola kyokunwa kya uyu u veye nobuluhu kukama.

⁷ Viju vya uyu mwimani vi veye vidamano: a saaviranga lisaavira lida mano a duke kudividza avahokya namakuva gobubehi, kali lwa avadambi va volanga agobulungi.

⁸ Navutswa umuhaani a saaviranga vindu vyobuhaani; a la hindira mu vindu vyobuhaani.

⁹ Vuka mwinye avakali ava veye nobusosi, mu huliridze mwoyo gwange; mwinye avakana vavandu va ta ganagana ku kindu, mu tegidze amatu genyu, mu hulire livola lyange.

¹⁰ Kigira kivi ki la mu nyola ku madiku ga li duka, mwinye avakali va ta ganagana ku kindu; kigira lyagulwa lyamazabibu li la vula kuva ho, nelivungidzwa lyevindu vyemilimi li la vula kuva ho.

¹¹ Mu degere mwinye avakali ava veye nobusosi, mu hende myoyo, mwinye ava ta ganagana ku kindu; mu navule tsingubo tsyenyu, mu gende kyahonyo, mwebohe tsingubo tsyamagunia mu vikenge vyenyu.

¹² Va leduya ku viritu ku lilira milimi milahi, ku lilira muzabibu gwamanga ligali.

¹³ Amafwa nolutavati vi la mera mu kivala kyavandu vange; yee, mu tsinyumba tsyosi tsyobusangali, mu lidala lyobusangali.

¹⁴ Na inyumba yobwami i la lekwa; lidala li veye navandu vanyingi ligali, li la va bugira mundu; kigulu nekitaradzi vi la va ubumenyo bwetsinyama madiku gosi, ubusangali bwetsisukiri tsyommulitu, ubwayiru bwamagondi;

¹⁵ kuduka lwa Roho a tsukwa ku kwinye kutwula igulu, na kyangalangwi ki la va mulimi gwamanga ligali, no mulimi gwamanga gu la validzwa kuva mulitu.

¹⁶ Inyinga yeyo likalaga li la menya migendanyama; nobulungi bu la menya mu mulimi gwamanga.

¹⁷ Na miyinzi gyobulungi Yi la va mirembe; nelikola lyobulungi li la va bwehodzeridzi nelisuuvira mihiga nemihiga.

¹⁸ Navandu vange va la menya mu bumenyo bwemirembe, na homugidzi gwaliga, nomu lyelemeridza ha ta li nekivihiri

¹⁹ Navu tswa imbula yamagina i la kupa mu ligwa lyomulitu; na lidala li lalirwa hasi ligali.

²⁰ Mu veye nobugasu mwinye ava midzanga bugutsa ku luginga lwa madzi gosi, mwinye ava kilanga virenge vyetsing'ombe netsisukiri ha zana.