Isaya 30 - KITABU KITAKATIFU

¹ Ubudamano bu ve ku avana vobutingu, Yahova a vola, yavo avenyanga makuva, navutswa si venyanga agange; avekunika kikuniko, navutswa si ki veye kya Roho wange, va duke kumeda ubwoni ku bwoni;

² ava tsitsanga kusulunguta Egepeti, na si va teva munwa gwange; va duke kwivika tsingulu mu tsingulu tsya Farao, nokwivisa mu kiriri kya Egepeti

³ Kigira yaga tsingulu tsya Farao tsi la va tsisoni tsyenyu, na lyevisa lyenyu mu kiriri kya Egepeti li la va kivihiri kyenyu.

⁴ Kigira avanene vavo va veye ha Zoan, na vatumwa vavo va duka Hanesi.

⁵ Yavo vosi va la va tsisoni kigira avandu va ta nyala kuvakonya, ava ta li ubukonyi kinga madanyi, navutswa tsisoni, kandi ga veye linyerwa.

⁶ Ubuliduhu bwe tsinyama tsya Kusini. Kuvita hagati hekivala kyekivi nelisaliridzwa, he king'ang'a kikali ki twula, neking'ang'a, kihirigoma nenzoka yokubuluka i sambanga, yavo va leta ubutugi bwavo ku migongo gyetsisukiri tsisoleli, na akiba yavo ku tsinatwumbi tsyetsing'amia, va tsia ku avandu va ta va konya kindu.

⁷ Kigira ubukonyi bwa Egepeti bu veye vutswa, si bu konya kindu: kigira yaga nda mu gulika Rahabu wikalanga vutswa.

⁸ Kalunu u tsie, u ng'ode likuva yili ku kihao imbiri wavo, u li ng'ode mu kitabu, li duke kuva lye tsinyinga tsidzanga kuduka mihiga nemihiga.

⁹ Kigira va veye avandu avobutingu, va veye avana va vehanga, va veye avana ava ta hulira amalago ga Yahova;

¹⁰ va veye avandu ava voleranga valoli, Mu ta lola mba; na va volera avaprofeti, Mu ta profeta vindu vilahi, mu ku volere vindu vidoto, mu profete bugadi,

¹¹ mu twule ku inzira, mu girunkane mu twule ku katsira, mu heridze Uyu Mutakatifu wa Israeli, a vule kuva imbiri wetu.

¹² Kunangwa kigira yaga Uyu Mutakatifu wa Israeli a vola, Kigira mu lega likuva yili, nokusuuvira lidambidza nobukyamu, nokwidira ku yivi;

¹³ kunangwa ubudamano yibu bu la va ku mwinye kuli ha huduki himbi kugwa, ha vimbi mu lidigi litambi, ahe lyadika lyaho li dukanga nonoho.

¹⁴ Na a latanya ha zana kuli kiju kyomulongi kwatanyangwa, kwatannywa vijonjo bugira livererera; kuduka si ki la loleka mu vijonjo vyakvo uluju lulala lu duka kwanzala muliru, kinga kudaha madzi mu kidaho.

¹⁵ Kigira Yahova Nyasaye, Uyu Mutakatifu wa Israeli a vola ndi, Mu lirana nomu lyelemeridza mu la honywa; tsingulu tsyenyu tsi la va mu lisosa nomu lisuuvira. Na mwinye si mwa bugirira:

¹⁶ navutswa mwa vola, Auwa, kigira kulirukira ku tsiparasi; kunangwa mu liruka ligali: kandi, Ku la nina ku tsinyama tsyetsimbiru; kunangwa yavo va mu londerera va la va avetsimbiru.

¹⁷ Ava elfu indala va liruka ku ligondoka lyomulala; ku ligondoka lya vatano mu liruka: kuduka mu la lekwa kuva kuli kilolero ku isonga yekigulu, na kuli ibendera ku kigulu.

¹⁸ Kigira yaga Yahova a la lindirira, a duke kumuvera tsimbabasi; kandi kigira yaga a la kuminywa, a duke kuvererera mwinye: kigira Yahova a veye Nyasaye welikalaga; va veye nobugasu vosi ava mu lindiriranga.

¹⁹ Kigira avandu va la menya mu Zioni ha Yerusalemi; si u la lira kandi mba; ligali a la ku vererera ku mwoyo gwelilira lilyo; lwa a li hulira, a la ku tivulira.

²⁰ Hene yaho Yahova a la ku ha ubukima bwekivi, na madzi gobusaliri, ku yaga gosi avegidzi vovo si va la viswa kandi ligali, navutswa tsimoni tsitsyo tsi la lola avegidzi vovo;

²¹ amatu gogo ga la hulira likuva inyima wowo, ni li vola, Inzira ni yiyi, mu gende kuyo; lwa mu girunkana kutsia ku luvega lwomukono mulungi, kandi lwa mu girunkana kutsia ku luvega lwomukono mmosi.

²² Na mu lononnya kyakunika ku vifwananyi vivyo vya vadzwa vyefetha, na kyafuma ku vifwananyi vivvo vya longwa vyethahabu: u la vi syuva kuli kindu kidamano; na u la vola, Twula hano.

²³ Naye a la haanira bugutsa bubwo imbula, bwa u li taga mu mulimi gugwo, na ubukima bwelimeda lyelirova, bu la va bunolu nokwama bunyingi: mu lidiku yilyo tsing'ombe tsitsyo tsi laya mu kyayo kyobwiyangu.

²⁴ Kandi tsigiriki netsisukiri tsisoleli tsi limanga kivala tsi la lia vyokulia vinolu, vya seswa nekiseseru nekihudziru.

²⁵ Na mu viguhl vitambi sa kilala, na mu tugulu twiginga, migera notugera twamadzi twi la va ho, mu lidiku yilyo lyeliitwa linene, lwa minara gyi la gwa.

²⁶ Kuvita yaga ubulavu bwomweli bu la leng'ana nobulavu bweliuva, nobulavu bweliuva bu la medeka hali gatano na gaviri, kuli ubulavu bwa madiku gatano na gaviri, mu lidiku lya Yahova a boha maduya gavandu veve, nokuhonnya liduya lyobutumiti lyavo.

²⁷ Henza, lieta lya Yahova li twula ihale, li sambanga nobutima bwibwe, nomu mwoki munene gu vuyanga igulu: minwa gyigye gyizuye ubutima, nolulimi lwilwe lu veye kuli muliru gu sambanga:

²⁸ mwika gwigwe gu yeye kuli mugera gwizuliranga, gu dukanga mwigoti, kusesa tsihiri nelisesa lyobudivi: nelijamu li kyaminyanga Ii la va mmunwa gyavandu.

²⁹ Mu la va nolwimbu kuli inyinga yobudiku bwelilia litakatifu li va ho; nobusangali bwemyoyo kuli mundu mulala a gendanga nelilere kuduka ku kigulu kya Yahova, ku Lwanda lwa Israeli.

³⁰ Kandi Yahova a la kola avandu va hulira mwoyo gwigwe gwobukumi nokumannya liika lyomukono gwigwe, halala nohululu bwobutima bwibue, nolumemo lwomuliru gu sambanga, halala nekihudzudzi, nekihi, nembula yamagina.

³¹ Kigira Muasuria a la vunanywa vidonye nomwoyo gwa Yahova; na a la mu kuya nempimbo yeye.

³² Na liduya lyosi lyempimbo ya lagwa, lya Yahova a la vika kuye, li la va halala nomwoyo gwobukana na gwelidienyi; na a la lwana navo nobulwani bwokusung'usa mukono gwigwe.

³³ Kigira Kisambiru kya lombwa kwetegeka kutwula kale; yee, kya tegekidzerwa mwami; ya ki lomba ki ve kyoluliva nekinene: mahiga gakyo ga veye muliru netsinku tsinyingi; mwika gwa Yahova gu veye kuli mugera gwe kibiridi, gwaakidza muliru.