Isaya 24 - KITABU KITAKATIFU

¹ Henza, Yahova a kola lirova kuva lyere, na a li kola kuva vutswa, nokulitung'aminya, na ya salannya avamenyi mulyo.

² Na ga la va, kuli ga veye ku avandu, ga la va ndiyo ku vasalisi; kuli ga veye ku mutugwa, ga la va ndiyo ku wamutuga; kuli ga veye ku mukana mutugwa, ga la va ndiyo ku wekikali wamutuga; kuli ga veye ku muguli, ga la va ndiyo ku mugulanyi; kuli ga veye ku uyu u hambidzanga kivete, ga la va ndiyo ku uyu u hambanga kivete; kuli ga veye ku uyu u vugulanga vyambeti, ga la va ndiyo ku uyu u mu hedzanga vyambeti.

³ Lirova li la kolwa lyere ligali, nokwononywa ligali; kigira Yahova ya vola likuva yili.

⁴ Lirova li syomanga nokuniala, lirova li dengeyanga nokuniala, avenenehidzanga ku lirova va dengeyi.

⁵ Lirova lyononnyeywi isi wa va menyanga kulyo: kigira vononnya lilaga, nokugirunkannya amalago, nokwononnya lilagana lyemihiga nemihiga.

⁶ Kigira yaga kilaamo ki liye lirova, na yavo avamenyanga kulyo va loleki kuva ne lihyolo: kigira yaga avamenyi mu lirova yili va hiye, ava tigaye va veye avakekeke

⁷ lwaini impya i syomanga, na muzabibu gu niyalanga, vosi ava sangala va kenyanga.

⁸ Ubusangali bwevindu ku lugano lwesugudi bu heri, isango ya yavo ava sangalanga i heri, ubusangali bwobukana bu heri.

⁹ Si va la nwa iwaini halala netsinyimbu; amalwa ga la gwa ubululu ku yavo va nwedzanga.

¹⁰ Lidala yilyo li veye kyanyi li tegulwa; tsinyumba tsyosi tsi haneywi miliango, a ta duka kwingira mundu kali mulala.

¹¹ Lilira li veye mu mahasi galyo kigira iwaini; busangali bwosi bu vikeywi kisundi, ubusangali bwosi bwekivala bu goti.

¹² Mu lidala mu tigaye vutswa, na kiribwa kyalyo ki duyeywi nobwoneku.

¹³ Kigira ni ndiyo ga la va hagati helirova hagati ha tsihiri kuli lisung'uswa lyemizeituni, kuli lidola lyomuzabibu, lwa li la va ni li fweye.

¹⁴ Yava va la ginga myoyo gyavo va la kupa lwanga; kigira ubukumi bwa Yahova, va la kupa lwanga kutwula ku inyanza.

¹⁵ Kunangwa mu kuminye Yahova ku luvega lwevugwe, mu kuminye lieta lya Yahova Nyasaye wa Israeli, mu visulu vyomu inyanza.

¹⁶ Kutwula ku luvega lwekiheri kyelirova kwa hulira tsinyimbu: Ubukumi bu ve ku valungi. Navutswa nda vola, Inze nda ng'aha, nda ng'aha bayaye bu veye ku inze avobugadi va tumekira ubugadi bwavo; yee, avobugadi va tumekira ubugadi ligali.

¹⁷ Ubutii, na ubogo, na mutego, vi veye ku ive, O mmenye ku lirova.

¹⁸ Ga la duka uyu wirukanga kigira liyoga lyobutii a lirana mu bogo; na uyu u senukanga kutwula mbogo a la hambwa mmutego: kigira madirisha ga veye igulu ga kunuleywi, na mise gyelirova gyi dengeyi.

¹⁹ Lirova li vunannyeywi ligali, lirova li syavuluki, lirova li sung'usiki ligali.

²⁰ Lirova li la yekayeka kuli muhambiki, nokuhungudzwa yiyi neyiyi kuli mwinuya; nelihyolo lyalyo li la va liliduhu kulyo, na li la gwa, nokuvula kuvuka kandi.

²¹ Na ga la va mu lidiku yilyo, Yahova a la kalagira kiduma kya yavo aveginga igulu, navami velirova ava veye ku lirova.

²² Na va la vungidzwa halala, kuli avahambi va vungidzangwa halala mu bogo, na va la bofwa mu inyumba yavahambe; na va la lolwa inyima wa madiku manyingi.

²³ Ma mweli gu li va netsisoni, neliuva li la va netsisoni; kigira Yahova wa mahe a lameha mu kigulu kya Zioni, nomu Yerusalemi; kandi imbiri wa avakulundu veve ha la va nobukumi.