Hosea 6 - KITABU KITAKATIFU

¹ Hambi, kwirane ku Yahova: kigira ya tandula, naye a la ku honnya; ya duya, naye a la ku boherera.

² Inyima welidiku lyakaviri a la ku simugukidza: ku lidiku lya kavaka a la ku vukidza ku singire, ku la va mwoyo imbiri wewe.

³ Hene yaho ku la manya, ni ku va ni ku londerera kumanya Yahova: litwula lilye li veye lyeligali kuli mugamba; naye a ladza ku kwinye kuli imbula, kuli imbula yamadzi mavovo i kupanga ku lirova.

⁴ O Efiraim, nda ku kolera ki? O Yuda, nda ku kolera ki? Kigira ububwenyu bu veye kuli lilesi lyomugamba, na kuli lime li kamanga mabwebwe.

⁵ Kigirayaga mmali kuvavadza navaprofeti; mmali kuviita namakuva gomunwa gwange: neli kalaga lilyo li veye kuli ubulavu bu ng'ereng'ana kyova.

⁶ Kigira inze nyenyanga tsimbabasi, si nyenya vihaanwa; nelimanya Nyasaye nyenya nga kuvita vihaanwa vyokusambwa.

⁷ Navutswa yavo va mali kwononnya lilagana kuli Adamu: va koli ubugeeri bwobugadi ku inze.

⁸ Gileadi li veye lidala lya yavo ava kolanga budamano, li vikeywi kilolero kyamasahi.

⁹ Kandi kuli viduma vyavanuuli va gonekanga umundu, ni ndiyo kandi livugana lyavasalisi li veye ava lumindanga ku inzira i tsitsanga ku luvega lwa Shekem; yee, va koli budamano.

¹⁰ Ndoli kindu kidamano mu inyumba ya Israeli: ha zana malaya ga nyoleki mu Efiraim, na Israeli vononnyeywi.

¹¹ Kandi O Yuda, ligesa li lageywi ku ive, lwa nzirannya kandi lilanywa lyavandu vange.