Hosea 4 - KITABU KITAKATIFU

¹ Mu hulire likuva lya Yahova, mwinye avana va Israeli; kigira Yahova a veye nelihing'ana ku vamenyanga mkivala yikyo, kigira si ha veye na geligali, kinga tsimbabasi, kinga limanya Nyasaye mu kivala.

² Si ha veye nekindu ni li ta li lyesuha, nobubehi nokwiita, nokwiba, nobuheyi; va twulira namasahi ga dira masahi.

³ Kigira yaga kivala ki la syoma, na sa mulala u menyanga mukyo a la ng'aha, halala netsinyama tsyombulimu na manyonyi gombwerefu; yee, tsisudzi tsyomu inyanza kandi tsi la twulidzwa.

⁴ Navutswa mundu kali mulala a ta hing'ana, kinga mundu kali mulala a ta gondokera wundi: kigira avandu vovo va veye kuli ava hing'ananga nomusa lisi.

⁵ Na ive u likigitala mu inyi nga yombasu, na muprofeti kandi a likigitala halala nive mu inyinga yobudiku; na nda dividza mama wowo.

⁶ Avandu vange vononnywa kigira va daka limanya: kigira u suye limanya, na inze nda ku sula, ive u ta va musalisi ku inze mba: kigira wivirira lilaga lya Nyasaye wowo, inze ndivirira avana vovo.

⁷ Kuli limedeka lyavo, ni ndiyo kandi mahyolo gavo ku inze ga leng'ana nalyo: nda girunkannya ubukumi bwavo bu duke kuva tsisoni.

⁸ Avene velihidzanga mu ubwoni bwavandu vange, na va vikanga mu myoyo gyavo ubudamano bwavo.

⁹ Na ga la va kuli avandu va veye, avasalisi kandi va veye ndiyo; na nda va ha mageli kigira tsinzira tsyavo nokuvatunga likola lyavo.

¹⁰ Va la lia, na va la vula kwiguta; va lekola malaya, na si va la medeka; kigira va leka kulinda likuva lya Yahova.

¹¹ Likola malaya newaini namalwa vi twulidzanga limanya lyavandu.

¹² Avandu vange va teva likuva ku kigenga kyavo, nempimbo yavo ya vilwadzira; kigira mwoyo gwamalaya gwa va kyaminya, na va kola malaya kutloula isi wa Nyasaye wavo.

¹³ Viitanga tsisadaka tsyavo igulu wevigulu, nokusamba vimuli mu tugulu, isi wemisala tsing'ano tsinyingi, kigira viriri vyagyo vi veye vilahi: kigira yaga avakana venyu vekola malaya, na aviha venyu va kola ubuheyi.

¹⁴ Si nda ha avakana venyu amageli lwa vekola malaya, kandi aviha venyu si nda va ha mageli lwa va heya; kigira avasatsa avene va tsia ha luvega halala navamalaya, na va haana vihaanwa vyavo halala navakali vama laya; navandu va ta li nelimanya va lononnywa.

¹⁵ Kali ive Israeli wekola wamalaya, Yuda a vule kwona; na mwinye mu la vula kuduka ha Gilgali; kandi mu tanegira Bethaven, kandi mu la vula kwisuha, ku vola, Kuli Yahova a veye mwoyo.

¹⁶ Kigira Israeli u koli bwibaali, kuli iroli yobwibaali: kalunu Yahova a la va lihidza kuli mwana weligondi mu ubwiyangu bunene.

¹⁷ Efiraim u hambannyeywi nevifwananyi; u mu leke a ve.

¹⁸ Kyokunwa kyavo ki gwiye kilulu; va londanga malaya kazozo; avamehi veve va yanza tsisoni ligali.

¹⁹ Imbuudza i mu bohi mu tsimbaha tsitsye, na va la va isoni kigira vihaanwa vyavo.