Hosea 13 - KITABU KITAKATIFU

¹ Lwa Efiraim ya vola, lidegera lya li ho; yeyidzominya mwene mu Israeli; navutswa lwa ya kola mahyolo mu Baal, ya kudza.

² Na kalunu va kolanga ubwoni kuvita, na velombeye vifwananyi vyokulongwa vyefetha yavo kali vifwananyi zana vi veye kuli iimanya lyavo avene, vyosi vi veye likola lyavasidza: va volanga ku makuva gavyo, Avasatsa va haananga vihaanwa va buse vi moli.

³ Kigira yaga va la va kuli lilesi lyomugamba, na kuli lime li ka manga mabwebwe, kuli mukuudzi gwekihudzudzi ki hilanga ku lodze lwokuhuula ubuswage, na kuli mwoki mu butwuliru bwagwo.

⁴ Navutswa inze mbeye Yahova Nyasaye wowo kutwula ku kivala kya Egepeti; na ive u la vula kumanya Nyasaye wundi kali mulala na a ta li inze, si ha veye nomuhonnyi wundi u meda ku inze.

⁵ Nda ku manyira mwigendanyama, mu kivala kyobulu hu bunene.

⁶ Kuli hokwaya havo ha veye, ni ndiyo viguti; viguti, nemyoyo gyavo gya nenehidzwa: kigira yaga vivirira inze.

⁷ Kigira yaga inze mbeye kuvo kuli king'ang'a; kuli engo nda goneka ndiyo ku inzira haluvega;

⁸ nda vugana navo kuli iduba i nuleywi avana vayo, nda tandula liboho lye inkupagani yavo; na nda va mirira ho kuli king'ang'a; inyama yombulimu indulu i la va tandula.

⁹ O Israeli, weyononnyi mwene, navutswa ubukonyi bubwo bu veye mu inze.

¹⁰ Mwami wowo a veye haliha, a duke kukuhonnya mmadala gogo gosi? Na vakalagi vovo va veye haliha, ava wa vola kuvo, Nyenya u mpe mwami navanene.

¹¹ Inze mma li kukuheera mwami mu livihirirwa lyange, na nda mu twulidza mu butima bwange.

¹² Budamano bwa Efiraim bu boheywi; ubwoni bwibwe bu vikeywi akiba.

¹³ Ubusaliri bwomukali u lumangwa bu la duka kuye: a veye mwana u ta veye nobugeeri; kigira inyinga i duki i ta dukana kusingira ha avana va hudula va twule.

¹⁴ Inze nda va honnya kutwula ku tsingulu tsyekihadisi; nda va honnya kutwula ku likudza: O likudza, ma duya gogo ga veye haliha? O Kihadisi, lidividza lilyo li veye haliha? Lyeganira li la viswa ku tsimoni tsyange.

¹⁵ Kali na a veye wivulanga ligali mu vamwavo veve, imbuudza yevugwe i ladza, mwika gwa Yahova gu twulanga migendanyama; kisenukiru kikye kyamadzi ki la kama, nekidaho kikye ki la kama: kandi a la lanya akiba yosi yeviju vi yanzidzanga vyosi.

¹⁶ Samaria li levika ama hyolo galyo; kigira litinguhi ku Nyasaye walyo: va la gwa ku kivavi; avana vadoto vavo va la shonolanywa, navakali vavo va veye inda va latanywa.