Hosea 11 - KITABU KITAKATIFU

¹ Lwa Israeli ya li mwana, nda mu yanza, na nda langa mwana wange kutwula Egepeti.

² Kuli vaprofeti va va langa, ni ndiyo va kira kutwula kuvo: ni va lomba vi haanwa vya Vabaal, ni va vuyidza vimuli ku vifwananyi vya vadzwa.

³ Navutswa ndegidza Efiraim kugenda nevirenge; nda mu gingira mma kono gange; navutswa si va manya inze nda va honnya.

⁴ Nda va kwesa nemigoye gyomundu, mu liboha lyobuyanzi; na nda li kuvo kuli yavo ava twulidza inira ku tsisaya tsyavo; na nda vika vyokulia imbiri wavo.

⁵ Si va lirana kandi mu kivala kya Egepeti, navutswa Muasuria a la va mwami wavo, kigira va sula kwirana ku inze.

⁶ Na kivavi ki la gwa ku madala gavo, nokusamba vihaniru vyago, nokuvalia, kigira makuva gavo avene.

⁷ Navandu vange va kayirangwa kwirana inyima nokuleka inze: kali ni va va langa va tsie ku uyu u veye igulu, si ha veye nomulala u nyala kumwidzominya.

⁸ Inze nyala ndi kukuleka, Efiraim? Nyala ndi kukuta, Israeli? Nyala ndi kukukola kuli Adima? Nyala ndi ku kuvika u ve kuli Zeboim? Mwoyo gwange gu girunkanywa mu inze, tsimbabasi tsyange tsyaaki halala.

⁹ Si nda tumekira ubululu bwobutima bwange, si ndirana kudividza Efiraim: kigira mbeye Nyasaye, si mbeye mundu mba; Mutakatifu hagati hoho; na si ndingira mu butima.

¹⁰ Va la londa Yahova, a la fwuma kuli king'ang'a, kigira a la fwuma, navana va ladza kutwula imadioli ni va degera.

¹¹ Va ladza ni va degera kuli linyonyi li twula Egepeti, na kuli likuulu li twula mu kivala kya Asuria; na nda vikalidza mu tsinyumba tsyavo Yahova a vola.

¹² Efiraim u nkumbiridza namakuva gobubehi, nenyumba ya Israeli i nkumbiridza nobugadi, navutswa Yuda kuduka kalunu yamehanga halala na Nyasaye, naye a veye musuuvirifu ku uyu Mutakatifu.