Haggai 2 - KITABU KITAKATIFU

¹ Ku lidiku lya makumi gaviri na lilala, likuva lya Yahova lya duka ku munwa gwomuproieti Haggai, kuvola,

² Kalunu u volere Zerubabeli mwana wa Shealitieli, govuna wa Buyuda na Joshua mwana wa Jehozadaku musalisi munene, navandu va tigala u va volere,

³ Ni bwaha wa tigala hagati henyu wa lola inyumba yiyi inyinga yobukumi bwayo bwokutanga? Na mu gi lolanga ndi kalunu? Imbiri wetsimoni tsyenyu i veye kuli si i veye kindu, naho?

⁴ Navutswa kalunu u ve mugulu, O Zerubabeli, Yahova a vola; kandi i ve ive mugulu, O Joshua, mwana wa Jehozadaku, musalisi munene; na mwinye avandu avekivala mwosi mu ve avagulu, Yahova a vola, mu kole miyinzi: kigira inze mbeye halala nemwinye, Yahova wa mahe a vola,

⁵ kuli likuva lya nda lagana nemwinye lwa mwa twula mu kivala kya Egepeti, na Roho wange ya menya hagati henyu: mu ta tia mba.

⁶ Kigira Yahova wa mahe a vola ndi: Inyinga indala yindi, i veye inyinga inkekeke, nda degeridza ligulu, nelirova, nenyanza, nekivala kyumu;

⁷ nda degeridza tsihiri tsyosi, nelyenya lyetsihiri tsyosi li la duka; na ndizulitsa inyumba yiyi ubukumi, Yahova wa mahe ya vola.

⁸ Ifetha ni yange, nethahabu ni yange, Yahova wa mahe ya vola.

⁹ Ubukumi bwe kiheri kyenyumba yiyi, bu la va ubunene kuvita bwokutanga, Yahova wa mahe a vola; na nda va ha mirembe ha zana, Yahova wa mahe a vola.

¹⁰ Mu lidiku lya makumi gaviri na gane, agomweli gwegyitano na gyine, mu muhiga gwegyiviri gwa Dario, likuva lya Yahova lya duka ku muprofeti Haggai, kuvola,

¹¹ Ya hova wa mahe a vola ndi: Mu teve avasalisi ku makuva gelilaga, mu vole,

¹² Mundu mulala na a va na a ginga inyama intakatifu mu lilingwa lyengubo yeye, nengubo yeye ni i dira ubukima, kinga ubusera, kinga iwaini, kinga maguta, kinga kyokulia ku vyosi, kindu zana ki la va kitakatifu, naho? Na vasalisi va tivula ni va vola, Auwa.

¹³ Hene yaho Haggai ya vola, Umundu na a va na a gwa mudamano kigira lidira ku mukudzu, na a dira ku vyosi mu vindu vivyo, kindu zana ki la va kidamano, naho? Avasalisi va tivula na va vola, Yee, ki la va kidamano.

¹⁴ Hene yaho Haggai ya tivula, na a vola, Ni ndiyo ga veye ku avandu yava, ni ndiyo ihiri yiyi i veye imbiri wange, Yahova a vola; kandi ni ndiyo miyinzi gyamakono gavo gyi veye; na kya va haananga ki veye kidamano.

¹⁵ Na kalunu, mmugoonyanga, mwadza, mu ganagane kutwula lidiku yili nokutsia imbiri, lwa ligina li kikiri kuvikwa ku lindi mu litempeli lya Yahova.

¹⁶ Mu tsinyinga yitsi tsyosi, mundu lwa ya duka ku kitumi kye vigero makumi gaviri, li veye vutswa likumi, lwa a duka ha kyokumina iwaini kutwulidza viju makumi gatano, vi veye ho makumi gaviri vutswa.

¹⁷ Nda mu kuya nekimeyu noluguku, nembula ya magina mu mi yinzi gyosi gya makono genyu; navutswa si mu yeka ku inze, Yahova a vola.

¹⁸ Mu ganagane mmugoonyanga, kutwula lidiku yili no kutsia mbiri, kutwula ku liduku lya makumi gaviri na gane ku mweli gwa gyitano na gyine, kutwula lidiku lyomuse gwelitempeli lya Yahova gwa temwa, mu li ganagane.

¹⁹ Bugutsa bu kikiri mu kyagi? Yee, muzabibu, na mukuyu na makomamanga, na muzeituni, vi kikiri kwama; kutwula lidiku yili nda mu gasidza.

²⁰ Na likuva lya Yahova lya duka ku Haggai hali kaviri ku lidiku lya makumi gaviri na gane go mweli, kuvola,

²¹ Volera Zerubabeli, govuna wa Buyuda, kuvola, Inze nda dege ridza ligulu nelirova;

²² na nda tung'aminya intebe yobwami, na nda dividza tsingulu tsyobwami bwetsihiri; na nda tung'aminya magari gobulwani, na yava avavikaye mugo; netsiparasi, na yava va ninanga kutsyo va la gwa hasi, sa mulala ku kivavi kyamwavo wewe.

²³ Mu lidiku yilyo Yahova wa mahe a vola, nda vuguia ive, O Zerubabeli, mutumekiri wange, mwana wa Shealitieli, Yahova a vola, nda kola ive kuli imingiri yomuhuri; kigira ntovoye ive, Yahova wa mahe a vola.