Habakuk 2 - KITABU KITAKATIFU

¹ Nda singira ku bulindi bwange, nokwesingeridza ku kitaradzi, nda henza, kulola aga a li mbolera, kandi aga ndi mu tivulira ku liyala lyange.

² Yahova ya ntivulira, na a vola, Ng'oda malola yaga, u ga kole ga ve habulavu ku vibao, a nyale kunyagula uyu u ga soma.

³ Kigira malola yaga kali kalunu ga veye genyinga ya lagwa, na ga kolanga bwangu kuduka ku kiheri, na si ga la vola ububehi mba: kali ni ga lindagira, u ga lindirire; kigira ligali ga ladza, si ga la lindagira mba.

⁴ Henza, mwoyo gwigwe gu vimbi, si gu veye mulungi muye mba; navutswa wobulungi a la va mwoyo ku lisuuvira lilye.

⁵ Yee, halala na yaga, iwaini i veye nobugadi, woluyai, u gala kumenya mu inyumba yeye; u galaminyanga likayirwa lilye kuli Kiha disi, na a veye kuli likudza, si a nyala kwigutidzwa, yevungidziranga tsihiri tsyosi, yelomberanga vitumi ava ndu vetsihiri tsyosi.

⁶ Yavo vosi si va kupa lugano kuye, lugano lwoku mu gerinya, ni va vola, O bayaye ku uyu u medanga vi ta li vivye kuduka inyinga ki? Na yenyoliranga misigo gyevihambiriru

⁷ Si va la ku twu lira nonoho yavo ava ku luma, si va la vuka yavo ava kunyangidza, na ive u la va mulanyi wavo?

⁸ Kigira ive wa nuula avetsihiri tsinyingi, avatigala vosi vavandu va la nuula ive, kigira masahi gavandu, na kigira kirage kyekivala yikyo kya kolerwa, nelidala yilyo kandi navandu va menya mulyo.

⁹ O bayaye ku uyu u nyoleranga inyumba yeye vyambeti vyobudamano, a duke kuvika inyumba yeye igulu, a duke kuhonywa ku mukono gwobudamano

¹⁰ U koleye inyumba yoyo makuva getsisoni, kigira litwulidza lyavandu vanyingi, na we kolera ubwoni ive mwene.

¹¹ Kigira ligina li la kupa lwanga mu lidigi, nomwaliru mu misala gu la li tivulira.

¹² O bayaye ku uyu wombakanga lidala namasahi, nokudinyeridza lidala nobudamano

¹³ Henzi, inkuva yiyi si ya twula ku Yahova wa mahe, ga avandu va la kolera miyinzi mu muliru, netsihiri veluhidza kigira vindu vya vutswa?

¹⁴ Kigira lirova li lizula limanya lyobukumi bwa Yahova, kuli madzi ga kunikanga inyanza.

¹⁵ O bayaye ku uyu u hedzanga mutende wewe kyokunwa, u vikanga ubusungu bubwo mukyo, nokumuhambikidza, u duke kuhenza kyahonyo kyavo

¹⁶ Ive wizuye tsisoni, si wizuye ubukumi: na ive u nwe, u ve kuli uyu wa vula kukevwa; kikombe kyomukono mulungi gwa Yahova ki la girunkanywa ku ive, netsisoni tsi ndamano tsi la va ku ubukumi bubwo.

¹⁷ Kigira kirage kya kolerwa Lebanon ki la kunika ive, na lidividzwa lyetsinyama, lya va tihidza; kigira masahi gavandu, na kigira kirage kya kolerwa mu kivala, nelidala na vosi va menyanga mulyo.

¹⁸ Kifwananyi kyokuvadzwa ki konya ki, kya mulombi a vadzi; kifwananyi kyokulongwa, na uyu wegidzanga ububehi, na uyu wa lomba kifwananyi a ki suuvira, nokulomba vifwananyi vidimbidi?

¹⁹ O bayaye ku uyu u volera musala, Yuka; nokuvolera ligina li veye idimbidi, Singira Yiki ki nyala kwegidza? Henza, kya kunikwa ithahabu nefetha, si ha veye nomwika kali hakudzu mukyo.

²⁰ Navutswa Yahova a veye mu litempeli lilye litakatifu: lirova lyosi li kiring'ane imbiri wewe.