Ezekieli 6 - KITABU KITAKATIFU

¹ Likuva lya Yahova lya duka ku inze, kuvola,

² Ive mwana womundu, henzidza mmoni mumwo ku vigulu vya Israeli, na u profete kuvyo,

³ u vole, Mwinye vigulu vya Israeli, mu hulire likuva lyo Mwami Nyasaye: Mwami Nyasaye a volera vigulu notugulu, nemigera namavona: Henza, inze, kali inze, nda leta kivavi ku mwinye, nokwononnya hadiguluku henyu.

⁴ Na bwali bwenyu bu la gwa hatswa, nevifwananyi vyenyu vyeliuva vi la vunika; na nda tula hasi avandu vovo aviitwa imbiri wevifwananyi vyenyu.

⁵ Na nda vika mibiri mikudzu gyavana va Israeli imbiri wevifwananyi vyavo; nevigumba vyenyu nda vi salannya ku tsintulu tsyobwali bwenyu.

⁶ Hosi ha mu menyanga madala ga la kolwa vyanyi, hadiguluku ha la va hatswa; ubwali bwenyu bu duke kukolwa vyanyi, nokukolwa hatswa, nevifwananyi vyenyu kuvunanywa nokuhera, nevifwananyi vyenyu vyeliuva vi la temagwa, nemiyinzi gyenyu gyi la dividzwa ligali.

⁷ Na viitwa va la gwa hagati henyu, na mu la manya inze mbeye Yahova.

⁸ Navutswa nda tigalidza litigala, li vola li veye mu la va na valala va li hona ku kivavi mu tsihiri, lwa mu li salannywa mu vivala ihale nehale.

⁹ Na va li hona ku avandu venyu va lidzulitsa inze hagati hetsihiri ha va li hilwa avahambe, kuli nda vunannya vidonye ku myoyo gyavo gyamalaya, gyahulwa ku inze, noku tsimoni tsya vo, tsya londa vifwananyi mmalaya: navo va ledunyira avene mu tsimoni tsyavo, kigira ubudamano bwa va kola mu kivihiri kyavo kyosi.

¹⁰ Va la manya inze mbeye Yahova: si mbola vutswa nda va kolera ubudamano yibu bwosi.

¹¹ Mwami Nyasaye a vola: Kong'onda nomukono gugwo, kandi duya hasi nekirenge kikyo, u vole, O bayaye kigira kivihiri kidamano kyosi kyenyumba ya Israeli: kigira va la gwa ku kivavi, nenzala, nobulwaye.

¹² U veye ihale ligali a la kudza ku bulwaye zana; na u veye himbi a la gwa ku kivavi; na u tigala nokwigalirwa mu lidala a la kudza kigira inzala: ni ndiyo ndi twekidza ubutima bwange kuvo.

¹³ Na mu la manya inze mbeye Yahova, lwa avandu vavo aviitwa va duka kuva hagati he vifwananyi vyavo ku tsintulu tsyobwali bwavo, ku tugulu twosi, noku tsintongi tsyevigulu, na isi wemisala gyosi mivisi, na isi wemisala gyosi gyo muduguyu, ha va li ni va vuyidziranga vimuli vilahi ku vifwananyi vyavo vyosi.

¹⁴ Na nda nyira mukono gwange kuvo, na nda kola kivala hatswa na kyanyi, kutwula mwigendanyama ku luvega lwa Dibila, nokuvita hokumenya havo hosi; na va la manya inze mbeye Yahova.