Ezekieli 44 - KITABU KITAKATIFU

¹ Ma ya nzirannya ku inzira yekiribwa kyekyova kya hatakatifu, ki henzanga ivugwe; ha kya li ni kya hanwa.

² Na Yahova ya mbolera, Kiribwa yiki ki la hanwa si ki ligulwa mba, kandi mundu kali mulala a tingira mu kiribwa yiki mba, kigira Yahova, Nyasaye wa Israeli, yingiriye mukyo; kigira yaga ki la hanwa.

³ Ku makuva gomunene, a likala mukyo kuli munene, a lie ubukima imbiri wa Yahova; a lingira ku inzira yolusimbu lwekiribwa, na a la tsia kyova ku inzira zana yeyo.

⁴ Ma ya ndeta ku inzira yekiribwa kya kasikasini imbiri wenyumba; na nda lola, na, henza, ubukumi bwa Yahova bwizula inyumba ya Yahova: na nda gwa hasi mammama.

⁵ Na Yahova ya mbolera, Ive mwana womundu, henza bulahi, u lole netsimoni tsitsyo, nokuhulira namatu gogo gosi aga nku volera ku makuva gemiima gyosi gyenyumba ya Yahova, na malago gayo gosi; na u henze bulahi ubwingiriru bwenyumba, halala nobutwuliru bwa hatakatifu bwosi.

⁶ Na ive u la volera avebaali yavo avenyumba ya Israeli, Mwami Nyasaye a vola ndi: Mwinye avenyu nba ya Israeli, inkuva yiyi i duke mwinye yekivihiri kyenyu kyosi,

⁷ kigira mwinye mwa leta avageni, nokuvavika mugati, avasindi vemyoyo, navasindi vemibiri, va ve hango hange hatakatifu, kuduka kwononnya ho kali inyumba yange, lwa mu haana nga ubukima bwange, na maguta na masahi, navo vononnya lilagana lyange, kuduka kumeda kivihiri kyenyu kyosi.

⁸ Na mwinye si mwa gumira kulinda vindu vyange vitakatifu; navutswa mwevikiye valindi avobulindi bwange hatakatifu hange.

⁹ Mwami Nyasaye a vola ndi, Ha ta va nomugeni, u veye musindi womwoyo, nowomubiri, u lingira hatakatifu hange kali mulala, ku avageni vosi ava veye hagati ha avana va Israeli.

¹⁰ Navutswa Avalevi ava tsia ihale na inze, lwa Israeli va tsia mu livoyavoya, ava tsia mu livoyavoya kuleka inze kulonda vifwananyi vyavo; va la ginga ubudamano bwavo avene.

¹¹ Kandi va la va avatumekiri mu hatakatifu hange, va la va avalindi veviribwa vyenyumba, nokutumika mu inyumba: va liita vihaanwa vyokusambwa nevihaanwa vyavandu, na va la singira imbiri wavo kuvatumekira.

¹² Kigira va va tumekira imbiri wevifwananyi vyavo, na va gwa kyokwikigitala kyobwoni ku inyumba ya Israeli; kigira yaga mmali kuginga mukono gwange gu ve kuvo, Mwami Nyasaye a vola, navo va la ginga ubudamano bwavo avene.

¹³ Na si va lisunda ahimbi ku inze mba, ku ntumekira mu butumwa bwobusalisi kandi si va lisunda ahimbi ku vindu vyange vitakatifu, vi veye vitakatifu ligali; navutswa va la ginga tsisoni tsyavo avene, na kivihiri kyavo kya va kola.

¹⁴ Navutswa nda va kola va ve avalindi venyumba, ku butumiki bwayo bwosi, noku vyosi vi kolwa muyo.

¹⁵ Navutswa avasalisi Avalevi, avana va Zadoku, ava linda hatakatifu hange lwa avana va Israeli va ndeka kutsia mu livoyavoya, yavo va lisunda ahimbi ku inze ku ntumekirana va la singira imbiri wange kuhaana amaguta na masahi, Mwami Nyasaye a vola:

¹⁶ va lingira mu hatakatifu hange, na va lisunda ku meza yange, ku ntumekira, nokugumira bulindi bwange.

¹⁷ Kandi, lwa vingira mu viribwa vyomugidzi gwomugati, va levika tsingubo tsyekatani; va vule kuva netsingubo tsyobwoya bwamagondi ku mibiri gyavo, lwa va tumika mu viribwa vyomugidzi gwomugati, nomu inyumba.

¹⁸ Va la va netsingubo tsyekatani ku mitwe gyavo, netsisuruhali tsyekatani mu vikenge vyavo; si va leboha kindu kali kilala mu kikenge ki kolanga lugeri.

¹⁹ Navo lwa va twula kutsia kyova kwingira mmugidzi gwekyova, kali kwingira mmugidzi gwekyova kutsia kb vandu, va la navula tsingubo tsyavo tsya va li natsyo mu litumika lyavo, va la tsi vika mu vigodola vitakatifu; na va livika tsingubo tsindi, va vule kutakasa avandu netsingubo tsyavo.

²⁰ Va la vula kuvega mitwe gyavo kandi si va la leka amasu gavo kuva matambi ligali mba; mitwe gyavo va la kalaga vutswa amasu.

²¹ Kandi umusalisi kali mulala a la vula kunwa iwaini, lwa vingira mmugidzi gwomugati.

²² Kandi va ta kwa avakali vakunzakali mba, kinga mukali wa lekwa; navutswa va la kwa vilonde ku lwivulu lwenyumba ya Israeli, kinga mukunzakali mukali womusalisi wa kudza.

²³ Navo va legidza ava ndu vange kuli vi veye nelyavukana vitakatifu na vya kazozo, nokuvegidza va duke kumanya lyavukannya hagati hekidamano nekilahi.

²⁴ Na mu mahangali gamakuva va la singira va duke kukalaga; va la kalaga kuli likalaga lyange: na va la gumira malago gange na miima gyange mu masavo gange gosi; na va la takasa masabato gange.

²⁵ Na va la vula kwisunda ku mukudzu gase va leyononnya; navutswa kigira dada, kinga mama, kinga mwana muyai kinga mukana, kinga amwavo, kinga mbotso u kikiri kukwebwa, va veye nomunwa kyeyononnya kigira yava.

²⁶ Na inyima welitakaswa lilye, va la mu laga amadiku gatano na gaviri.

²⁷ Noku lidiku lya yingira hatakatifu, mu mugidzi gwomugati, kutumika hatakatifu, a la haana kihaanwa kikye kyobwoni, Mwami Nyasaye a vola.

²⁸ Na va la va nemiyandu: inze mbeye miyandu gyavo; mu la vula kuvaha miyandu mu Israeli; inze mbeye miyandu gyavo.

²⁹ Va la lia kihaanwa kyobusie, nekihaanwa kyobwoni, nekihaanwa kyamahyolo; nekindu sa kilala mu Israeli kya gimwa, ki la va kyavo.

³⁰ Kandi vindu vyokutanga vyobuhya bwosi bwevindu vyosi, mu visyuviriru vyenyu vyosi, vyevindu vyosi vyevisyuviriru vi la va vya vasalisi: kandi mu la ha musalisi kidieli kyokutanga kyobukima bwenyu buvisi, kuleta ubugasu bu menye ku inyumba yoyo.

³¹ Vasalisi va la vula kulia ku inyama yosi yekudzira yene, kinga ya tandulwa, ni li va linyonyi kinga inyama.