Ezekieli 42 - KITABU KITAKATIFU

¹ Ma ya ndeta kyova mu mugidzi gwekyova, ku inzira yoluvega wa kasikasini: na ya ndeta mu kigodola kya henzana na ha vikwa haluvega, aha henzana nelyombakwa ku luvega lwa kasikasini.

² Kuhenza ku butambi bweligera lyamakono mia, ha kiliango kyoluvega lwa kasi kasini kya li, na ubugalamu bwa li ligera lyamakono makumi gatano.

³ Kuhenza ku ligera lyamakono makumi gaviri lyomugidzi gwomugati nokuhenza ku lyaalwa lyamagina lyomugidzi gwekyova, lwa li nolusimbu lwegulu lu henzana nolusimbu lwegulu lundi mu inyumba yegulu yetsivaka.

⁴ Kandi imbiri wevigodola ya li ho inzira yokuvita yobugalamu bwayo bwa li Iigera lyamakono likumi ku luvega lwomugati, inzira yeligera lyomukono mulala; na viliango vyavyo vya henza ku luvega lwa kasikasini.

⁵ Na vigodola vyegulu vya li vimbi; kigira tsisimbu tsyegulu tsya vi gehidza, kuvita ligehidzwa lya vya hasi na vya hagati, mu lyombakwa.

⁶ Kigira vya li netsinyu mba tsyegulu tsivaka, navyo si vya li netsitiru kuli tsitiru tsyemigidzi: kigira yaga kyegulu kya gehidzwa kuvita kya hasi na kya hagati, kutwula hasi.

⁷ Na lidigi lya li kyova wombalu mwevigodola lya henza ku mugidzi gwekyova imbiri wevigodola, ubutambi bwalyo bwa li ligera lyamakono makumi gatano.

⁸ Ki gira ubutambi bwevigodola vya li mu mugidzi gwekyova bwa li neligera lyamakono makumi gatano: na, henza, ku luvega lwembiri welitempeli ha li neligera lyamakono mia.

⁹ Na isi wevigodola yivi bwa li ho ubwi ngiriru ku luvega lwevugwe, kuli bwingira kutwula mu mugidzi gwe kyova.

¹⁰ Mu ubuliduhu bwelidigi lyomugidzi ku luvega lwevugwe, imbiri wa ha vikwa haluvega, na imbiri we lyombakwa, vya li ho vigodola.

¹¹ Na inzira yokuvita imbiri wavyo ya li kuli liloleka lyenzira yevigodola vyoku luvega lwa kasikasini; kuli ubutambi bwavyo, ni ndiyo kandi ubugalamu bwavyo bwa li: na ubwiyangu bwavyo bwokutwula bwa li kuli vindu vyavyo vindi vya lombwa kandi kuli viliango vyavyo.

¹² Kandi kuli viliango vyevigodola vya li ku luvega lwa kusini, kya li ho kiliango ha kiheri kyenzira, inzira yokuvita ku luvega lwembiri welidigi ku luvega lwevugwe, kuli wingira muvyo.

¹³ Ma ya mbolera, Vigodola vya kasikasini, na vigodola vya kusini, vya henza ku ha vikwa haluvega, yivi vi veye vigodola vitakatifu, vya vasalisi ava veye himbi ku Yahova, va la liira mu vindu vitakatifu: va la vika ha zana vindu vitakatifu, na kihaanwa kyobusie, na kihaanwa kyobwoni, na kihaanwa kyamahyolo; kigira ha zana ha veye hatakatifu.

¹⁴ Avasalisi lwa va mali kwingira, si va la twula hatakatifu kutsia mu mugidzi gwekyova mba, navutswa tsingubo tsyavo tsyokwivika lwa va li mu litumika, va la tsi vika hokigira tsi veye tsintakatifu: na va livika tsingubo tsindi, nokwisunda ku yago aga dukiranga avandu.

¹⁵ Kunangwa lwa ya mala kugera inyumba yomugati, ya ndeta kyova kuvitira mu kiribwa kyevugwe, na ya gi gera tsimbega tsyosi.

¹⁶ Ya gera uluvega lwevugwe nekidundu kyokugera, vidundu tsimia tsitano, nekidu ndu kyokugera luvega lwosi.

¹⁷ Ya gera ku luvega lwa kasikasini vidu ndu tsimia tsitano, nekidundu kyokugera luvega lwosi.

¹⁸ Ya gera ku luvega lwa kusini vidundu tsimia tsitano nekidundu kyokugera.

¹⁹ Ya vodonkana kuhenza ku luvega lwe madioli, na ya gera vidundu tsimia tsitano, nekidundu kyokugera.

²⁰ Ya gera tsimbega tsyosi tsine: tsya kumbiridzwa nolugaga lwelidigi tsimbega tsyosi, ubutambi bwalyo tsimia tsitano, nobugalamu bwalyo tsimia tsitano, kuduka kwavukannya hatakatifu, na ha avandu vosi.