Ezekieli 4 - KITABU KITAKATIFU

¹ Kandi, ive, mwana womundu, wenyolire litafali livisi, u li vike hasi imbiri wowo, na u ng'ode lifwana lyelidala, lidala lya Yerusalemi, kulyo:

² na u li kumbiridze, nokwombaka tsimpinga kulyo, nokulomba kitumi kinene imbiri walyo; u singeridze mahema imbiri walyo, u vike viduyiru vyokusambula kulikumbiridza tsimbega tsyosi.

³ Kandi wenyolire lubabale lwekivya, nokulusi ngeridza lu ve lidigi lyekivya hagati hoho nelidala: na u henzidze mmoni mumwo ku lidala, nalyo li ligalirwa ku likumbiridzwa, na ive u la ligalira kulikumbiridza. Na yili li la va lilolekidza ku inyumba ya Israeli.

⁴ Kandi gona hasi ku bugika ku mukono gugwo mmosi, na u vike ubudamano bwenyumba ya Israeli kuyo; kuli livalidza lya madiku ga u gona kugwo, na ndiyo u la ginga ubudamano bwavo.

⁵ Kigira inze mmali kukuha mihiga gyobudamano bwavo gyi ve ku ive livalidzwa lya madiku, nago ga veye madiku tsimia tsivaka na makumi gatano na gane: ni ndiyo u la ginga ubudamano bwenyumba ya Israeli.

⁶ Kandi lwa u dukidza yago, u la gonera ku mukono mulungi, na u la ginga ubudamano bwenyumba ya Yuda: madiku makumi gane, lidiku lilala li ve lyomuhiga mulala, ndagi ndiyo ku ive.

⁷ Na u la henzidza mmoni mumwo u henze kulikumbiridzwa lya Yerusa lemi, nomukono gugwo gu ta vikeywi ku ingubo; na u la profeta kulyo.

⁸ Henza nda vika migoye ku ive, na ive si u ia jukana ku luvega lundi, kuduka lya u mala madiku gelikumbiridza lilyo.

⁹ Wenyolere ingano, na shairi, namaganda, netsimpindi, nomavere na ovolo, na u vi vike mu kiju kilala, welombere ubukima navyo; kuli livalidza lya madiku ga u gonera bugika, nago ga veye madiku tsimia tsivaka na madiku makumi gatano na gane, u la lia kuvyo.

¹⁰ Na vyokulia vya u li lia vi la va ku ligerwa ku tsiratili, tsishekeli makumi gaviri ku lidiku lilala: u la vi lia ku inyinga yakyo.

¹¹ Na u la nwa madzi neligerwa amadzi ga gererwa kidieli kilala kyevitano na kilala kya ihin: ku lidiku lilala u la ga nwa ku inyinga yago.

¹² Na u la lia vyokulia yivyo kuli ubukima bweshairi, na u la bwuminya imbiri wetsimoni tsyavo ku tsinku tsya mabi ga twulanga ku mundu.

¹³ Na Yahova ya vola, Ni ndiyo avana va Israeli va li lia vyokulia vyavo vyoneku, hagati hetsihiri ha nda va kunga kutsia.

¹⁴ Hene yaho nda vola, Ah Mwami Nyasaye henza, mwoyo gwange si gwa vikwa mu budamano mba, kigira ku twula bwana buke bwange kuduka inyinga ya kalunu si nditsanga ku inyama yekudzira yene, kinga ya tandulwa nenyama yombulimu; kinga inyama yokuvihiriridza si yingira mu munwa gwange mba.

¹⁵ Hene yaho ya mbolera, Henza, nda ku ha isingu yeng'ombe mbugono bwamabi gomundu, u la lombera ubukima bubwo ku yo.

¹⁶ Ya mbolera kandi, Ive mwana womundu, henza, nda vuna nya mudigiru gwobukima mu Yerusalemi: navo va la lagira ubukima bweligerwa, nelihenda mwoyo; na va la nwa amadzi geligerwa, nelitimuka enkolo:

¹⁷ va duke kudaka ubukima na madzi, nokuhenzana nelitimuka enkolo, nokung'aha mu bwoni bwavo.