Ezekieli 22 - KITABU KITAKATIFU

¹ Kandi likuva lya Yahova lya duka ku inze, kuvola,

² Ive mwana womundu, u la kalagira, u la kalagira lidala lya masahi? Kuna ngwa u mu mannye kivihiri kikye kyosi.

³ Na u la vola, Mwami Nyasaye a vola ndi: Lidala li tahidzanga masahi hagati halyo, inyinga yalyo i duke kuudza, li lombanga vilwananyi kuhing'ana nomwene, a duke kweyo nonnya

⁴ U gweye nekindu kyelihyolo ku ive mu masahi gogo ga wa tahidza, na u gwiye mudamano mu vifwananyi vivyo vya wa lomba; na u leti amadiku gogo ahimbi, nokuduka ahimbi ku mihiga gyigyo: kigira yaga nda ku kola u nyegwe netsihiri, nevivala yivyo vyosi vi ku kolera ki henyahenye.

⁵ Yivyo vi veye ahimbi, navyo vi veye ihale, vi la ku kolera kihenyahenye, ive mudamano wizula kivihiri.

⁶ Henza avanene va Israeli, sa mulala kuli tsingulu tsitsye tsi veye va li mu ive kutahidza masahi.

⁷ Mu ive wa leganga dada na mama; hagati hoho va koleranga avageni lidambidzwa; mu ive va dambidza avabisa ndu navakunzakali.

⁸ Ive u leganga vindu vyange vitakatifu, na wononnya masabato gange.

⁹ Avetsimbemba va veye mu ive kutahidza masahi; na mu ive va lia vyokulia ku vigulu: hagati hoho va tumekiranga tsiganagani tsindamano.

¹⁰ Mu ive va vimbulanga kyahonyo kyavadada vavo: mu ive va leganyanga mukali u tsiye mmeweli.

¹¹ Kandi mulala u koli agokuvihiriridza nomukali wowakye; nowundi u mali kwononnya mukali womuyai wewe nobuheyi; nowundi mu ive u mali kuleganya mbotso wewe, mukana wa dada wewe.

¹² Mu ive va vugulanga vikukula kutahidza masahi; ive u vuguye vyambeti nevyamedeka, na u nyoye vyambeti ku ligada avakyo kuvadambidza, na u mali kwivirira inze, Mwami Nyasaye a vola.

¹³ Kunangwa, henza, kigira yaga inze mwene nkong'ondi amakono ku vyambeti vivyo vya wa nyolera ku ga ta li bulungi, noku masahi gogo aga li mu ive.

¹⁴ Mwoyo gugwo gu nyala kwikudzira, kinga makono gogo ga nyala kuva netsingulu, mu madiku ga ndi ku kolera yaga? Inze Yahova mboye likuva yili, na nda li kola.

¹⁵ Nda ku salannya hagati hetsihiri, nokukusalannya mu vivala ihale nehale; na nda samba ububi bubwo bu twule ku ive.

¹⁶ Na ive u lononnywa mu ive mwene, imbiri wetsi moni tsyetsihiri; na u la manya inze mbeye Yahova.

¹⁷ Likuva lya Yahova lya duka ku inze, kuvola,

¹⁸ Ive mwana womundu, inyumba ya Israeli i gwiye amandu ku inze: vosi va gwiye mugasa nelibang'a nekivya nelisasi, hagati hekisambiru; va gwiye amandu gefetha.

¹⁹ Kigira yaga Mwami Nyasaye a vola ndi: Kigira mwinye vosi mu gwiye amandu, kunangwa, henzi, nda mu vungidza hagati ha Yerusalemi.

²⁰ Kuli va vungidzanga halala ifetha nomugasa nekivya nelisasi nelibang'a hagati hekisambiru kufwana muliru kuvyo, kuvisalula; ni ndiyo ndi mu vungidza halala mu butima bwange nomu livihirirwa lyange, na ndaalira mwinye, nokumusa lula.

²¹ Yee, nda mu vungidza halala, na nda fwana ku mwinye umuliru gwelivihirirwa lyange, na mu la saluluka hagati homuliru zana.

²² Kuli ifetha i salulukanga hagati hekisa mbiru, ni ndiyo mu li salulwa hagati hakyo; na mu la manya inze, Yahova mmali kutsuka ubutima bwange ku mwinye.

²³ Na likuva lya Yahova lya duka ku inze, kuvola.

²⁴ Ive, mwana womundu, u volere kivala yikyo, Ive u veye kivala kya vula kutakaswa kandi imbula si ya kupidzwa ku ive mu lidiku lyelivihirirwa.

²⁵ Ha veye nelihambana lyobwebaali lyavaproieti veve hagati hehe, kuli king'ang'a ki fwumanga nokutandula vihimwa: va mali kumira myoyo gyavandu; va vugula akiba nevindu vyobuguli budinyu; va medi livalidzwa lyavakunzakali veve hagati hehe.

²⁶ Avasalisi veve va kyaminyi lilaga lyange, no kwononnya vindu vyange vitakatifu: si va vika lyavukannya hagati hevitakatifu na vi tumekirangwa kazozo, kandi si va mannyi avandu lyavukana hagati hevindu vyobubi nevilahi, netsimoni tsyavo tsi visiywi ku masabato gange, na inze ndegannyiywi hagati havo.

²⁷ Avanene veve muye va gwiye kuli visalang'ongo vi tandu langa vihimwa, kuduka kutahidza masahi, nokudividza myoyo gyavandu, va duka kunyola vyambeti ku ga ta li bulungi.

²⁸ Avaprofeti veve va buuye uhudohi bwa vula kuduvulwa bulahi, kigira yavo, va lolanga malola ga vutswa, nokumannya busegetiri bwobubehi, ni va vola, Mwami Nyasaye a vola ndi na ndi, lwa Yahova ya vula kuvola kindu.

²⁹ Avandu vekivala va tumekiranga lidambidza, nelinuula nobululu: yee, va lugutanga avadaka navadambi, nokudambidza ava menya ku ga ta li amalahi.

³⁰ Na ndenya nduke kulola mundu musatsa mu avandu yavo, u nyala kweba lugaga, nokusingira ha huduka imbiri wange kigira kivala yikyo, ni nta ki dividza: navutswa si nda nyola kali mulala mba.

³¹ Kigira yaga ntsuki livihirirwa lyange kuvo; mmali kuvasamba nomuliru gwobutima bwange: ndeti inzira yavo avene ku mitwe gyavo, mwami Nyasaye a vola.