Ezekieli 19 - KITABU KITAKATIFU

¹ Kandi, u syomere avanene va Israeli,

² u vole, Mama wowo ya li kindu ki? Ya li king'ang'a kikali: kya gona hasi hagati heving'ang'a, hagati heving'ang'a visoleli ya nyunnya avana veve.

³ Ya leta mulala ku avana veve: naye ya duka kuva king'ang'a kisoleli, na yega kuhima, nokulia avandu.

⁴ Na tsihiri va hulira makuva gege; ya gumirwa mbogo bwavo; na va mu gingira ku tsinzago kuduka mu kivala kya Egepeti.

⁵ Na lwa ya lola na a linda giye, ya twulidza lisuuviridza ku mwoyo, hene yaho ya vugula wundi ku avana veve, nokumukola king'ang'a kisoleli.

⁶ Na ya tsia yiyi neyiyi hagati heving'ang'a; na ya gwa king'ang'a kisoleli, naye yega kuhima nokulia avandu.

⁷ Na ya manya tsinyumba tsyavo tsyobwami, namadala gavo ya ga kola kuva hatswa; nekivala kya gwa kyanyi, halala nelizulira lyakyo, kigira liyoga lyefwuma lilye.

⁸ Hene yaho tsihiri tsya mtwulira tsimbega tsyosi, kutwula mu vivala vyosi; na va vika kuye miluvo gyavo; ya hambwa mbogo bwa vo.

⁹ Na va mu vika mu buhambe netsinzago, na va mu hila kuduka ku mwami wa Babuloni; na va mu vika mu impinga, mwoyo gwigwe gu vule kuhulirwa kandi mu vigulu vya Israeli.

¹⁰ Mama wowo ya li kuli muzabibu, mu masahi gogo, gwa simikwa himbi namadzi manene: gwama ligali nokwizula tsisya kigira amadzi manyingi.

¹¹ Na ya li nevisala vyetsingulu kuva tsimpimbo tsyobwami tsya yavo avamehanga, nelihera lilye lya tambiha hagati hetsisya tsindiduhu, na va loleka mu butambi bwavo halala nobunyingi bwetsisya tsitsye.

¹² Navutswa muzabibu gwifwa mu butima, gwa tuulwa hasi, nembuudza yevugwi yominya makuyu gagwo: nevisala vyagwo vyetsingulu vya vunika, na vyuma; nomuliru gwa vi samba.

¹³ Na kalunu gu simikeywi mu kyangalangwi, mu kivala kyumu, nekyobuluhu.

¹⁴ Na muliru gwa twula mu visala vyetsisya tsyagwo, gu sambi amakuyu gagwo, kuduka si ha veye kandi mu muzabibu yigwo kisala kyetsingulu ki dukana kuva impimbo yobwami wa meha. Yili li veye lisyoma, nalyo li la va lisyoma.