Ezekieli 16 - KITABU KITAKATIFU

¹ Likuva lya Yahova lya duka ku inze kandi, kuvola,

² Ive mwana womundu, u mannye lidala lya Yerusalemi vivihiri vyalyo:

³ u va volere, Mwami Nyasaye a volera lidala lya Yerusalemi likuva yili: Litanga lilyo nelivulwa lilyo li veye lyekivala kya Mukanani; dada wowo ya li Muamori, na mama wowo ya li Muhiti.

⁴ Noku makuva gelivulwa lilyo, ku lidiku lya wivulwa lulera lulwo si lwa kalwa mba, kandi si wa singwa namadzi u duke ku niha; si wa vakwa munyu kali hakuzu, kandi si wa vikwa mu tsingubo mba.

⁵ Si ha veye nemoni kali indala ya ku vererera, kukulombera kilala ku vindi yivi, nokukuvererera, navutswa wa tebwa kyova havulavu mu bulimu, kigira liva lilyo lya vihirirwa, ku lidiku lya wivulwa.

⁶ Na lwa nda vita himbi nive, nokukulola na u galagalanga mu masahi gogo, nda ku volera, Kali nu veye mu masahi gogo, u ve mwoyo; yee, nda ku volera, Kali nu veye mu masahi gogo, u ve mwoyo.

⁷ Inze nda ku kola u medeke kuli limera lyemilimi, na wa medeka nokuva munene, na wa duka kuva nobulahi ubunene; tsimbere tsitsyo tsya twula, nelisu lilyo lya viruka: navutswa kandi wa li kyahonyo, na bugira kufumwa nengubo.

⁸ Na lwa nda vita himbi nive, nokukwumika, na ive inyinga yoyo ya li inyinga yobuyanzi; na nda fuma ku ive kitweya kyange, kufuma kyahonyo kikyo: yee, nda kwisuhira, na nda lomba lilagana nive, Mwami Nyasaye a vola, na wa gwa wange.

⁹ Hene yaho nda ku singa na madzi; yee, nda ku singa ligali, amasahi gogo gosi ga twule ku ive, na nda ku vaka maguta.

¹⁰ Nda ku vika ingubo lyebung'olang'ole, na nda ku ha vilatu vyelisero lyenyama yengubo indahi, na nda ku boha ingubo yekatani inda hi mu kikenge kikyo, nokukufuma netsingubo tsinzesereru.

¹¹ Kandi nda ku siyaha vindu vyobulahi, na nda ku vika migodze ku makono gogo, nomunyoro migoti mumwo.

¹² Na nda ku vika inono ku molo gogo, na tsimingiri mu matu gogo, netaji indahi ku mutwe gugwo.

¹³ Wa siafwa ithahabu nefetha, netsingubo tsitsyo tsya li tsyekatani tsindahi, netsinzesereru, netsyobung'olang'ole; wa lia busie bunyuki, nobwuki, namaguta, na wa gwa mulahi weligondo, na wa gasidzwa na wa duka ku liva lyobwami.

¹⁴ Nelidzominywa lilyo lya landa mu tsihiri kigira ligondo lilahi lilyo; kigira lya li lidukiru, kigira ubukumi bwange bwa nda vika ku ive, Mwami Nyasaye a vola.

¹⁵ Navutswa wa suuvira ku ligondo lilahi lilyo, na wa tumekira amalaya kigira lidzominywa lilyo, na wa tsuka vindu vivyo vya malaya ku vosi ava vitanga; wa li wewe.

¹⁶ Na wa vugula ku tsingubo tsitsyo, nokwelombera hadiguluku ha siafwa nerangi lugano lugano, na wa tumekira malaya hadiguluku zana: vindu kuli yivi si vi ladza mba, kandi si vi la va ndiyo mba.

¹⁷ Kandi wa vugula vindu vivyo vyobulahi vya li vyethahabu yange nevyefetha yange, vindu vya nda ku ha, na welombera mu vindu yivyo vifwananyi vyavandu vasatsa, na wa tumekira amalaya halala navo;

¹⁸ na wa vugula tsingubo tsitsyo tsyobung'olang'ole nokufuma yavo, namaguta gange nevimuli vyange wa vika imbiri wavo

¹⁹ Ubukima bwange bwa nda ku ha, ubusie bunyuki, namaguta, nobwuki, vya nda kulihidza, wa vi vika imbiri wavo kuva muhomo; na ga li ndiyo, Mwami Nyasaye a vola.

²⁰ Kandi kuvita yaga u vuguye avayai vovo navakana vovo, ava wa nzivulira, na u viiti va ve kihaanwa ku yavo va duke ku libwa. Vindu vivyo vya malaya vya li inkuva inkekeke,

²¹ wa duka kwiita avana vange, nokuva haana, kuvavitidza mu muliru ku yavo?

²² Nomu kivihiri kikyo kyosi nevindu vivyo vya malaya, wa vula kwidzulitsa amadiku gobusoleli bubwo, inyinga wa li kyahonyo, si wa li nengubo yokwefuma, na wa galagala mu masahi gogo.

²³ Na ga duka inyima wobwoneku bubwo bwosi (O bayaye, bayaye ku ive Mwami Nyasaye a vola),

²⁴ wombakire mwoyo gugwo aha nene, nokwelombera hadiguluku mu mahasi gosi

²⁵ Wombake hadigu luku hoho ha mutwe gwa mahasi gosi, na u koli ubulahi bubwo kuva kivihiri, na u tavalalidzi virenge vivyo ku vosi ava vitanga himbi, nokumeda amalaya gogo.

²⁶ Kandi u koli ubuheyi ku Vaegepeti, avatende vovo, avanene vomubiri, na u medi amalaya gogo, kuvukidza ubutima bwange.

²⁷ Henza kigira yaga, mmali kunyira mukono gwange ku ive, na mmali kugehidza vyokulia vivyo vya madiku gosi, nokukuvika ku ubulaliri bwa yavo ava ku dunyira, avakana va Vafilisiti, ava veye netsisoni ku inzira yoyo yetsiganagani tsindamano.

²⁸ Kandi wa tumekira amalaya halala na Asuria, kigira si u nyala kwigutidzwa; yee, wa tumekira amalaya halala navo, navutswa kandi si wiguta.

²⁹ Kuvita yaga, wa meda amalaya kuduka ku kivala kya Kanani kuduka ku Kalidei; navutswa kandi si wiguta mba.

³⁰ Mwoyo gugwo gu veye mudedekere ndi, Mwami Nyasaye a vola, na u kolanga vindu yivi vyosi, navyo vi veye miyinzi gyomukali wamalaya wamahangali;

³¹ kuli weyombakiranga hango hoho hanene ha mutwe gwamahasi gosi, nokulomba hadiguluku hoho mu tsinzira tsyosi, na si u veye kuli wa malaya, kigira wa lega livugula amadanyi.

³² Mukali u heyanga u vugulanga vasatsa vageni mbugono bwomusatsa wewe

³³ Va haananga vihaanwa ku vamalaya vosi; navutswa ive u haananga amadanyi ku vayanze vovo vosi, u va hedzanga vikukula, va duke ku ive tsimbega tsyosi mu amalaya gogo.

³⁴ Kandi mu ive navakali vandi ha veye nelyavukana mu vindu vyamalaya, ki gira si ha veye nomulala u londanga ive ku heya nive; navutswa ive u haananga amadanyi, na si u vugulanga amadanyi ku gosi, kigira yaga u veye lugano.

³⁵ Kunangwa, O wamalaya, hulira likuva lya Yahova:

³⁶ Mwami Nyasaye a ku volera, Kigira ububi bubwo bu tsukeywi, nekyahonyo kikyo ki vimbuleywi kigira amalaya gogo halala navayanze vovo; kandi kigira vifwananyi vyosi vyekivihiri kikyo, na kigira amasahi gavana vovo, ava wa ha avandu yavo;

³⁷ kunangwa henza, nda vungidza halala avayanze vovo vosi, ava u sangalanga halala navo, na vosi ava wa yanza halala na yavo vosi ava wa vihirirwa, nda va vungidza halala vadze ku ive tsimbega tsyosi, na nda va vimbulira kyahonyo kikyo, va duke kulola kyahonyo kikyo kyosi.

³⁸ Na nda kalagira ive, kuli vakali va kwebwa ava heyanga, nokutahidza masahi, va kalagirangwa; na nda leta ku ive amasahi gobutima nagembodoka.

³⁹ Kandi nda ku vika mmakono gavo, na va la sambula hango hoho hanene, na hadiguluku hoho va la sambula; na va la ku navula tsingubo tsitsyo, neviju vilahi vivyo vyesiaho va la vi vigula; na va la ku leka kyahonyo bugira ingubo.

⁴⁰ Kandi va la leta kiduma ku ive, na va la ku lasa namagina, nokukutumita nevivavi vyavo.

⁴¹ Na tsinyumba tsitsyo va la tsi samba nomuliru, nokudukidza likalaga ku ive imbiri wetsimoni tsyavakali vanyingi; na nda ku heridzera litumikira amalaya, na si u la haana amadanyi kandi mba.

⁴² Ni ndiyo ndigutidza ubutima bwange ku ive, nelikendeka lyange li la twula ku ive, na nda sosa, si nda va nobutima kandi mba.

⁴³ Kigira ive si widzulitsi madiku go busoleli bubwo mba, nawtswa u mbihiriridzi mu vindu yivyo vyosi, ku nangwa, henza, nda leta inzira yoyo ku mutwe gugwo, Mwami Nyasaye a vola: si u la tumekira tsiganagani tsindamano ku kivihiri kikyo kyosi mba.

⁴⁴ Henza, sa mulala u tumekiranga makuva getsing'ano, a la tumekira lugano yilu ku ive, a la vola, Kuli mama a veye, mukana wewe a veye ndiyo.

⁴⁵ Ive u veye mukana wa mama wowo, uyu u dunyiranga musatsa wewe navana veve; na u veye amwavo wa yavo avamwavo vovo ava dunyiranga avasatsa vavo navana vavo: mama wowo ya li Mu hiti, na dada wowo ya li Muamori.

⁴⁶ Na amwavo wowo munene niye Samaria, u menyanga ku luvega lwo mukono mmosi, uyu navakana veve; na amwavo wowo muke, u menyanga ku luvega lwomukono mulungi, niye Sodoma navakana veve.

⁴⁷ Navutswa ive si u gendanga ku tsinzira tsyavo, kandi si u koli kuli kivihiri kyavo, navutswa inkuva yiyi ni i Da ya li inkekeke, wa li ni woneka kuvita yavo mu tsinzira tsitsyo tsyosi.

⁴⁸ Kuli mbeye mwoyo, Mwami Nyasaye a vola, Sodoma amwavo wowo si a koli, uyu navakana veve, kuli ive u koli, ive navakana vovo.

⁴⁹ Henza, budamano bwamwavo wowo Sodoma ni yibu: luyai, nokwiguta vyokulia, neligasidzwa lya li muye, uyu nomu vakana veve; kandi si ya dinyeridza amakono gavadaka nava dambi.

⁵⁰ Navo va li mu lyegingira, nokutumekira kivihiri imbiri wange: kunangwa kigira yaga nda va twulidza kuli nda lola ubulahi.

⁵¹ Na Samaria si ya kola kuli inusu yobwoni bwa ive wa kola; navutswa ive wa meda kivihiri kikyo kuvita yavo, na wa haana ubulungi ku vamwavo vovo ku kivihiri kikyo kyosi kya wa kola.

⁵² Ive kandi u ginge tsisoni tsitsyo mwene, kuli wa kalagira avamwavo vovo: ku ubwoni bubwo bwa wa kola bwokuvihiriridza kuvita yavo, yavo va gwiye avobulu ngi kuvita ive; yee, na ive u ve isoni u ginge tsisoni tsitsyo, kuli wa ha amwavo wowo ubulungi.

⁵³ Na ndirannya lyadikidzwa lyavo, lyadikidzwa lya Sodoma navakana veve, na lyadikidzwa lya Samaria navakana veve, na lyadikidzwa lya vahambe vovo ava veye hagati havo;

⁵⁴ u duke kuginga tsisoni tsitsyo mwene, na u duke kuva isoni kigira gosi ga wa kola, kuli wa li kilema mwoyo kyavo.

⁵⁵ Na avamwavo vovo, Sodoma navakana veve, va li rana mu liva lyavo lyokutanga, na Samaria navakana veve va lirana mu liva lyavo lyokutanga, na ive nava kana vovo mu lirana mu liva lyenyu lyokutanga.

⁵⁶ Kigira amwavo wowo Sodoma si ya talwa nomunwa gugwo ku lidiku lyoluyai lulwo;

⁵⁷ budamano bubwo ni bu kikiri kulang'aminywa, kuli ga li inyinga yelilegwa lyavakana va Siria, ni ya vosi ava va kumbiridza, avakana va Vafilisiti, ava ku kolera lilegwa tsimbega tsitsyo tsyosi.

⁵⁸ Ive u gingi tsiganagani tsitsyo tsindamano, nekivihiri kikyo, Yahova a vola.

⁵⁹ Kigira Mwami Nyasaye a vola ndi: Nda ku kolera kuli wa kola, wa lega lyesuha ku lyononnya lilagana.

⁶⁰ Navutswa ndidzulitsa lilagana lya nda lomba nive mu madiku gobusoleli bubwoj na nda dinyeridza lilagana lyemihiga nemihiga nive.

⁶¹ Hene yaho u lidzulitsa tsinzira tsitsyo, na u la va isoni, lwa u bugi rira avamwavo vovo, avanene na vake; na nda va ha ku ive va ve avakana vovo, navutswa si ga veye ku lilagana lilyo.

⁶² Na nda dinyeridza lilagana lyange nive; na u la manya inze mbeye Yahova,

⁶³ u duke kwidzulitsa, nokutimuka enkolo, u vule kukunula munwa gugwo kandi, kigira tsisoni tsya u veye natsyo, lwa nku sameha yaga gosi aga wa kola, Mwami Nyasaye a vola.