Ezekieli 12 - KITABU KITAKATIFU

¹ Likuva lya Yahova lya duka ku inze kandi, kuvola,

² Ive mwana womundu, u menyanga hagati henyumba yobwebaali, avandu vetsimoni tsyokulola, navutswa si va lolanga mba, avandu vamatu gokuhulira navutswa si va huliranga mba; kigira ni inyumba yobwebaali.

³ Kigira yaga, ive mwana womundu, kola viju vivyo vyetegeke ku lyadikidzwa lilyo, wadike inyinga yombasu imbiri wetsimoni tsyavo; na u ladika kutwula hango hoho hano, u tsie ahandi imbiri wetsimoni tsyavo: namusia yavo va la ganagana, kali ni va veye inyumba yobwebaali.

⁴ Na u la twulidza viju vivyo inyinga yombasu imbiri wetsimoni tsyavo, kuli viju vyokwadikidzwa; na ive mwene u la twula inyinga yomgolova imbiri wetsimoni tsyavo, kuli avandu va twulanga kutsia mu lyadikidzwa.

⁵ Na u hudule ha u vitira mu lidigi imbiri wetsimoni tsyavo, na u vugule viju vivyo u vitire ha zana.

⁶ U la vi ginga imbiri wetsimoni tsyavo kwivega lilyo, nokuvihila kutsia navyo mu kisundi; u la kunika mmoni mumwo, u vule kulola kivala yikyo: kigira mmali kukuvika kuva kilolero ku inyumba ya Israeli.

⁷ Na nda kola ndiyo kuli nda lagwa: nda hila viju vyange inyinga yombasu, kuli viju vyelyadikidzwa, na mgolova nda hudula lidigi nomukono gwange; nda hila viju vyange mu kisundi nokuviginga kwivega lyange imbiri wetsimoni tsyavo.

⁸ Mugamba likuva lya Yahova lya duka ku inze, kuvola,

⁹ Ive mwana womundu, Inyumba ya Israeli, inyumba yobwebaali, si ya ku te va, U kolanga ki?

¹⁰ U va volere, Mwami Nyasaye a vola: Buliduhu yibu bu veye kigira munene u veye mu Yerusalemi, nenyumba yosi ya Israeli ava veye hagati havo.

¹¹ U vole, Inze mbeye kilolekidzu kyenyu: kuli inze mmali kukola, ni ndiyo yavo va li kolwa; va la tsia mu lyadikidzwa, mu butugwa.

¹² Munene u veye hagati havo a la ginga kwivega lilye mu kisundi, na a la tsia kyova: va la hudula mu lidigi va duke kuhila viju vyavo kyova: a la kunika mmoni mwimwe, kigira si a la lola kivala netsimoni tsitsye mba.

¹³ Nda vika muluvo gwange kuye, na a la hambwa mu mutego gwange; na nda mu hila Babuloni kuduka mu kivala kya Vakalidei; navutswa kandi si a la ki lola mba, kali na a kudzira yo.

¹⁴ Na nda va salannya va tsie yiyi neyiyi ku tsimbuudza tsyosi vosi ava mu kumbiridza kumukonya, na viduma vivye vyosi; na nda somola kivavi kuvalonda inyima wavo.

¹⁵ Na va la manya inze mbeye Yahova, lwa ndi va salannya hagati hetsihiri, nokuvata yiyi neyiyi mu vivala.

¹⁶ Navutswa nda leka avandu vakekeke kuvo va hone ku kivavi, noku inzala noku bulwaye; va duke kulandidza mu tsihiri ha va tsia kivihiri kyavo kyosi; na va la manya inze mbeye Yahova.

¹⁷ Kandi likuva lya Yahova lya duka ku inze, kuvola,

¹⁸ Ive mwana womundu, lagira ubukima bubwo nobutii, na madzi gogo u nwe nelidegera, nelilinda ligali;

¹⁹ na u volere avandu vekivala, Mwami Nyasaye a vola ku makuva ga vamenyi Yerusalemi, nomu kivala kya Israeli: Va la lagira ubukima bwavo nelinyankana ligali, na va la nwa amadzi gavo nelitimuka enkolo, na kivala kyavo ki la va kyanyi, ku lidaka vyosi vi veye mukyo, kigira kirage kya yavo ava menya mu.

²⁰ Na madala aga veye navandu ga la kolwa kyanyi nekivala ki la va king'anye; na mu la manya inze mbeye Yahova.

²¹ Na likuva lya Yahova lya duka ku inze, kuvola,

²² Ive mwana womundu, ni lugano ki lwa mu veye nalwo mu kivala kya Israeli, kuvola, Madiku ga medangwa kuva manyingi, na malola gosi ga gotanga?

²³ Kigira yaga u va volere, Mwami Nyasaye a vola ndi: Nda heridza lugano yilu, va la vula kulutumekira kandi kuli lugano mu kivala kya Israeli; navutswa u va volere, Amadiku ga veye himbi, nobudukiru bwa malola gosi.

²⁴ Kigira amalola ga vutswa si ga la va ho kandi, kinga ubusegetiri bweligoha mu inyumba ya Israeli.

²⁵ Kigira inze mbeye Yahova; nda vola, nelikuva lya nda vola li la dukidzwa; li la vula kulindagira kandi: kigira mu madiku genyu, O inyumba yobwebaale, nda vola likuva, nokulidukidza, Mwami Nyasaye a vola.

²⁶ Kandi likuva lya Yahova lya duka ku inze, kuvola,

²⁷ Ive, mwana womundu, henza, yavo avenyumba ya Israeli va vola, Amalola ga a lolanga ga veye ga madiku manyingi gadzanga, na a profetanga makuva getsinyinga tsi veye ihali ligali.

²⁸ Kigira yaga u va volere, Mwami Nyasaye a vola ndi: Amakuva gange ga la vula kulindagira kandi, navutswa likuva lya ndi vola li la dukidzwa, Mwami Nyasaye a vola.