Ezara 3 - KITABU KITAKATIFU

¹ Na lwa gwa duka mweli gwegyi tano na gyiviri, navana va Israeli vosi va li mu madala, avandu va vugana halala mu Yerusalemi kuli mundu mulala.

² Hene yaho Jeshua mwana wa Jozadaku, ya singira navamwavo veve avasalisi, na Zeru babeli mwana wa Shealitieli, nava mwavo veve, ni vombaka bwali bwa Nyasaye wa Israeli, va duke kuhaana kubwo vihaanwa vyokusambwa, kuli ga ng'odwa mu lilaga lya Musa mundu wa Nyasaye.

³ Na va si ngeridza bwali ku bwikaliru bwabwo; kigira va tia kigira avandu vevivala: na va haanira Yahova vihaanwa vyokusambwa kubwo, vihaanwa vyo kusambwa mugamba na mgalova.

⁴ Na va lomba lisavo lya madiri, kuli ga ng'odwa, na va haana vi haanwa vyelidiku nelidiku, ku liva lidzwa lyavyo, kuli amalago, kuli ga dukiranga lilaga lyelidiku nelidiku;

⁵ ma lwenyima va haana kihaanwa kyokusambwa kya kazozo, nevihaa nwa vyamadiku gokutanga mweli, na masavo gosi ga Yahova aga lagwa ga li matakatifu, nomundu sa mulala wa haanira Yahova kindu ku vyosi ki ve kihaanwa kyomwoyo gwobuyanzi.

⁶ Kutwula ku lidiku lyokutanga lyomweli gwegyitano na gyiviri va tanga kuhaanira Yahova vihaanwa vyokusambwa: navutswa muse gwe litempeli lya Yahova gwa li ni gu kikiri kutemwa.

⁷ Kandi va leta ifetha ku avombaki noku vabadzi; na vyokulia, na vyokunwa, na ma guta, kuvo Vasidone, noku Vaturo, va lete misala gyemitaragwa kutwula Lebanon ku inyanza, kuduka Jopa, kuli Kurusi mwami wa Persia ya va ha munwa.

⁸ Kunangwa mu muhiga gwa kaviri gweliduka lyavo ha inyumba ya Nyasaye ha Yerusalemi, mu mweli gwa kaviri, hene yaho Zerubabeli mwana wa Shealitieli, na Jeshua mwana wa Jozadaku va tanga, navamwavo vavo vandi, avasalisi na Valevi, na vosi ava twula mu lyadi kidzwa kuduka Yerusalemi, na va tovola Valevi, ava duka mihiga ma kumi gaviri nokuvita, va duke kuva avalindi vemiyinzi gyenyumba ya Yahova.

⁹ Hene yaho Jeshua ya singira halala navana veve navamwavo veve, Kadimieli navana veve, avana va Yuda, halala, va duke kuva avahenzi ku yavo ava kolanga miyinzi mu inyumba ya Nyasaye: avana va Henadadi, halala navana vavo nava mwavo Valevi.

¹⁰ Kandi lwa avo mbaki va tema muse gwelitempeli lya Yahova, va vika vasalisi ni viviki tsingubo tsyavo nokuva nevisiliva, na Valevi avana va Asafu va veye nevi kuli, kwidzominya Yahova, kuli lilaga lya Daudi mwami wa Israeli.

¹¹ Na vembirana avene na avene mu lidzominya nelisantidza Yahova, ni va vola, Kigira a veye mulahi, kigira tsimbabasi tsitsye tsi veye ku Israeli netsyemihiga nemihiga. Navandu vosi va ginga myoyo gyavo ni va hanzuka, lwa vidzominya Yahova, kigira muse gwenyumba ya Yahova gu mali kutemwa.

¹² Navutswa vanyingi ku vasalisi, noku Valevi noku yavo ava li mitwe gyetsintrumba tsyavaguga, avasakulu ava li ni va lola inyumba yokutanga, lwa muse gwenyumba yiyi gwa temwa imbiri wetsimoni tsyavo, va lira nomwoyo munene; avalala vanyingi va hanzuka nobuyanzi:

¹³ kuduka avandu si va nyala kwavukanya hagati heliyoga lyemyoyo gyobuyanzi, neliyoga lyeli lira lyavandu; kigira avandu va hanzuka ligali, neliyoga lya hulirwa ihale ligali.