Esther 2 - KITABU KITAKATIFU

¹ Inyima wa makuva yaga, ubutima bwomwami Ahasueru lwa bwa vomboloka yidzulira Vashti, na ga ya li kukola na aga lagwa kuye.

² Kunangwa avatumekiri vomwami ava mu tumekira, va vola, Mwami yenyirwe avakana avagima avalahi navasoleli:

³ kandi mwami a vike avanyampara mu tsiprovinse tsyosi tsyobwami bwibwe, va vungidze halala avakana vosi avasoleli, avalahi, avagima kuduka Shushan inyumba yobwami, mu inyumba yavakali, va vikwe mmakono ga Hegai mulindi womwami, a lindanga avakali; na va hebwe vindu vyokwenihidza;

⁴ na mukana u yanzidza mwami a ve mukali womwami mu bugono bwa Vashti. Na likuva yili lya yanzidza mwami, na ya kola ndiyo.

⁵ Ya li ho Muyuda mulala mu Shushan inyumba yomwami, welieta lilye lya langwa Mordekai, mwana wa Jairo, mwana wa Shimei, mwana wa Kishi, mundu wehiri ya Benjamini,

⁶ wa li wa lanywa mu Yerusalemi halala na avalanye ava vugulwa halala na Jekonia mwami wa Buyuda, wa Nebukadinezaru mwami wa Babu loni ya hila.

⁷ Naye ya virukidza Hadasa, livola li veye Esther, mukana womifwa wewe: kigira mukana uyu si ya li na dada kinga mama, naye ya li mukana mugasu na mulahi; na lwa dada wewe na mama wewe va kudza, Mordekai ya mu vugula a ve mwana wewe mwene.

⁸ Kunangwa lwa lilaga lyomwami na munwa gwigwe gwa hulirwa, na lwa avakana vanyingi va vugannywa mu Shushan inyumba yomwami, mu makono ga Hegai, Esther kandi ya vugulwa nokuvikwa mu inyumba yomwami, mu makono ga Hegai, mulindi wa vakali.

⁹ Na mukana ya mu yanzidza, na a mu vera; na ya mu ha bwangu vindu vivye vyokwenihidza, halala nevidieli vivye, navakana vatano na vaviri ava du kana a hebwe ava li vomu inyumba yomwami: naye ya mwahula nava kana veve na a mu vika halahi kuvita hosi henyumba yavakali.

¹⁰ Esther ya li na a kikiri kuvuula avandu veve na ihiri yeye; kigira Mordekai ya mu laga a ta vuula yaga mba.

¹¹ Na Mordekai ya vaya kazozo imbiri womugidzi gwenyumba yavakali, a duke kumanya liva lya Esther, na aga li mu gwira.

¹² Kunangwa inyinga yavakana sa mulala ya duka kwingira ku mwami Ahasueru, inyima welikolerwa lilye kuli gu veye mwima gwa malago gavakali miyeli likumi na gyiviri, (kigira ga duka ndi madiku gelyenihidza lyavo, nago ga li myeli gyitano na mulala na maguta ga manemane [kindu ki fwanana ne esogomi], na myeli gyitano na mulala na ga funyanga mwayu mulahi na halala nevindu vyelyenihidza lyavakali),

¹³ ma mukana ya duka ndiyo imbiri womwami: vindu ku vyosi vya yenya ya hebwa kutsia navyo kutwula mu inyumba yavakali kutsia mu inyumba yomwami.

¹⁴ Mgolova yingira, na mugamba yirana mu inyumba ya kaviri yavakali, kuva mmakono ga Shaashagazo, mulindi womwami wa linda avasuria, na ya vula kwingira kandi ku mwami, bugira mwami a mu yanza, na a langwa ku lieta lilye.

¹⁵ Kunangwa, Esther, mwana wa Abihaili mifwa wa Mordekai, wa vugula Esther a ve mwana wewe, lwa inyinga yeye yokwingira ku mwami ya duka, si yenya kindu kali kilala, navutswa vya Hegai mulindi wavakali vomwami, ya mu tovolera. Na Esther ya nyola liverwa imbiri wa vosi ava mu lola.

¹⁶ Kunangwa Esther ya letwa ku mwami Ahasueru mu inyumba yeye yobwami ku mweli gwelikumi, gu langwa Tebethe, ku mweli gwegyitano na gyiviri gwelyameha lilye.

¹⁷ Na mwami ya yanza Esther kuvita avakali avandi vosi, naye ya nyola liyanzwa na liverererwa imbiri wewe kuvita avakana vosi; kunangwa ya vika itaji yobwami ku mutwe gwigwe, na a mu kola a ve mukali wewe mbu gono bwa Vashti.

¹⁸ Ma mwami ya lomba lilia linene ku avanene veve vosi noku avatumekiri veve, lya li lilia lya Esther; naye ya kolera tsiprovinse, libohololwa, na ya haana vihaanwa kuli ubuhaani bwomwami.

¹⁹ Na lwa avakana va vungidzwa hali kaviri, hene yaho Mordekai yi kala mu kiribwa kyomwami.

²⁰ Na Esther ya li na a kikiri kuvuula ihiri yeye navandu veve; kuli Mordekai ya mu laga: kigira Esther ya londa lilaga lya Mordekai, kuli ya kola lwa ya virukira kuye.

²¹ Mmadiku yago lwa Mordekai yikala mu kiribwa kyomwami, avalindi vaviri vomwami, Bigithana na Tereshi, va li ku yava avalinda kiribwa, va vihirirwa, ni venya kuhila makono ku mwami Ahasueru.

²² Na inkuva yiyi ya manyakana ku Mordekai, naye ya vuulira Esther mukali womwami; na Esther ya volera mwami ku lieta lya Mordekai.

²³ Na lwa inkuva yiyi ya tevwa, ya loleka i veye ndiyo, navo vombi va sungwa ku musala: na ga ng'odwa mu kitabu kya mang'oda imbiri womwami.