Danyeli 7 - KITABU KITAKATIFU

¹ Mu muhiga gwokutanga gwe lyameha lya Belishazaru mwami wa Babuloni, Danyeli ya lota liloto na malola gomutwe gwigwe ku kitali kikye: ma va ng'oda liloto na a vola liduka lyevindu zana.

² Danyeli ya moloma na a vola, Inze nda lola mu lilola lyange ubudiku, na henza, tsimbuudza tsine tsyomigulu tsya huudza netsingulu ku inyanza inene.

³ Na tsinyama tsinene tsine tsya twula mu inyanza, tsyosi tsya li nelifwana lugano lugano.

⁴ Yokutanga ya li nelifwana lyeking'ang'a, na ya li ne tsimbaha tsyendidzu: na inze nda henza kuduka tsimbaha tsyayo tsya manyulwa, na ya gingwa ku twula ku lirova, nokusingeridzwa ne virenge viviri kuli mundu; na ya hebwa mwoyo gwomundu.

⁵ Na he nza inyama yindi, ya kaviri, ya li kuli iduba, na ya gingwa ku luvega lulala, na ya li netsimbalu tsivaka mu munwa gwayo mu amino gayo: na va gi volera ndi, Singira u lie inyama inyingi.

⁶ Inyima wa yiyi, nda henza, na lola, yindi ya fwana ingo, ya li na tsimbaha tsine tsyelinyonyi ku mugongo; kandi inyama yiyi ya li nemitwe gyine; na ya hebwa lyameha.

⁷ Na inyima wa yiyi nda lola mu maloto gobudiku, na henza, inyama yetsine, yokuti hidza na yetsingulu, na yobunyali bunyingi; kandi ya li na amino manene gekivya; ya lia nokudonnya vidonye, nokuduvaga nevirenge vyavo vindu vya tigala: ya li nelifwana lugano ku tsinyama tsyosi tsya li tsyembiri; na ya li netsinziga likumi.

⁸ Nda ganagana tsinziga, na henza, ulwiga lundi lwa mera hagati hatsyo, lwiga lukekeke, imbiri walwo tsinziga tsyivaga ku tsyokutanga tsya kuulwa: na henza, lwiga yilu lwa li netsimoni kuli tsimoni tsyomundu, nomunwa gu volanga vindu vinene.

⁹ Na inze nda henza kuduka inyinga tsintebe tsyobwami tsya vikwa, na mulala wa li Muhindira wa madiku, yikala ku: tsingubo tsitsye tsya li tsindavu kuli likonza na lisu lyoku mutwe gwigwe lya li kuli bwoya bweligondi bwere; intebe yeye ya li kuli ulumemo lwomuliru, na tsingida tsyayo tsya li muliru gwaakanga.

¹⁰ Mugera gwomuliru gwa senuka nokutwula imbiri wewe: tsielfu hali tsielfu va mu tumekira, na tsielfu likumi hali tsielfu likumi va singira imbiri wewe: na likalaga lya singeridzwa, na vitabu vya kunulwa.

¹¹ Nda henza mu inyinga zana, kigira mwoyo gwa makuva manene golwiga lwa vola; nda henza kuduka inyama yiitwa, nombiri gwayo gwa dividzwa, nokuhaanwa kusambwa nomuliru.

¹² Na ku tsinyama tsindi tsya tigala, tsya nuulwa ubwami bwatsyo, navutswa livamwoyo lyatsyo lya medeka kuduka inyinga iduki.

¹³ Nda lola mu malola gobudiku, na henza, mulala yadza halala na malesi gomigulu, ya li kuli mwana womundu, na ya duka kali ku Muhindira wa madiku, ni va mu dukidza himba imbiri wewe.

¹⁴ Na ya hebwa ubwamehi, nobukumi, nobwami, avandu vosi, netsihiri, netsinimi va mu tumekire: ubwamehi bwibwe bu veye ubwamehi bwemihiga nemihiga, bu li vula kuvita, kandi ubwami bwibwe bu veye ubuarni bu li vula kudividzwa.

¹⁵ Ku makuva gange, inze Danyeli, mwoyo gwange gwa verera mu mubiri gwange, kandi malola gomutwe gwange gwa mbendidza mwoyo.

¹⁶ Ndisunda himbi ha mulala ku yava ava singira ha zana, ni mmu teva ageligali gevindu yivi vyosi. Kunangwa ya mbolera, kandi ya mma nnya livuula lyevindu yivi.

¹⁷ Tsinyama tsinene yitsi, tsi veve tsine, tsi veye avami vane, ava li twulira kutwula mu lirova.

¹⁸ Navutswa avatakatifu va U Veye Igulu Ku Vyosi va la vugula ubwami, nokwameha mihiga gyosi, kuduka mihiga nemihiga.

¹⁹ Kandi ndenya kumanya ageligali genyama ya kane, ya li nelifwana lugano ku tsindi tsyosi, yo butihidzi bunene, ya li na amino gekivya, na masanda gomugasa; na ya lia, nokudonyannya vidonye, nokuduvaga nevirenge vyayo vindu vya tigala;

²⁰ na ku tsinziga likumi tsya li ku mutwe gwayo, na ulwiga lundi lwa mera, lwetsindi tsivaka tsya guulwa imbiri walwo, ulwiga zana yilwo lwa li netsimoni, nomunwa gwa vola vindu vinene, lweliloleka lyalwo lya li linene kuvita tsindi.

²¹ Nda lola, na ulwiga zana lwa kola lihe ku vatakatifu, nokuvaguuta;

²² kuduka Muhindira wa madiku ya duka, na avatakatifu va U Veye Igulu Ku Vyosi va hebwa likalaga, na inyinga ya duka ya vatakatifu va gumira ubwami.

²³ Ya vola ndi, Inyama ya kane i la va ubwami bwa kane ku lirova, bu li va lugano lundi ku bwami bwosi kandi bu la lia lirova lyosi, nokuliduvaga, nokulidonyannya vi donye.

²⁴ Na ku makuva getsinziga likumi, mu bwami yibu avami likumi va la twula kusingira kandi inyima wavo wundi a la twuia kusi ngira; naye a la va lugano lundi ku vembiri, na a la twulidza avami va vaka.

²⁵ Naye a la vola makuva manene gokuhing'ana na uyu U Veye Igulu Ku Vyosi, kandi a la luhidza ligali avatakatifu va U Veye Igulu Ku Vyosi, nn a la ganagana kugiru nkannya tsinyinga nelilaga; na vi la vikwa mu mukono gwigwe kuduka inyinga na tsinyinga na kidonye kye nyinga.

²⁶ Navutswa likalaga li la singeridzwa, na va la mu nyaga ubwami bwibwe, nokubukaminya, nokubudividza kuduka ku kiheri.

²⁷ Na ubwami, na ubwamehi, na ubunene bwobwami isi weligulu lyosi, bu la hebwa avandu vavatakatifu va U Veye Igulu Ku Vyosi: ubwami bwi bwe bu veye ubwami bwemihiga ne mihiga, na ubwamehi bwosi bu la mu tumekira nokumuhulira.

²⁸ Yiki ki veye kiheri kya makuva. Ku makuva gange inze, Danyeli, tsiganagani tsyange tsya mbendidza mwoyo, na ligondo lyange lya galula mu inze: navutswa nda linda makuva mu mwoyo gwange.