Danyeli 5 - KITABU KITAKATIFU

¹ Belishazaru mwami ya lombera avanene veve elfu, lilia linene, na ya nwa iwaini imbiri we elfu zana.

² Belishazaru lwa ya tsatsama iwaini, ya haana munwa va lete viju vyethahabu na vyefetha vya dada wewe Ne bukadinezaru ya nyaga mu litempeli lya li mu Yerusalemi; mwami navanene veve, navakali veve, navasuria veve, va nwere ku.

³ Ma va leta viju vya nyagwa mu litempeli lyenyumba ya Nyasaye, ya li mu Yerusalemi; na mwami navanene veve, navakali veve, navasuria veve, va nwera kuvyo.

⁴ Va nwa iwaini, ni vidzominya vanyasaye vethahabu, na vefetha, na vomugasa, na vekivya, na vomusala, na veligina.

⁵ Ku isaa zana videte vyomukono gwomundu vya twula, ni vi ng'oda ku budohi bwelidigi lyenyumba yobwami ha kinara kyetaya: na mwami ya lola kidonye kyomukono gwa ng'oda.

⁶ Hene yaho ligondo lyommoni mwomwami lya galula na tsiganagani tsitsye tsya mu hulula inkolo; na a kalika viyungu vyo mgongo, na amalu gege ga duyana.

⁷ Na mwami ya hanzuka va lete ava ng'olera ku tsi ng'ereng'ani, na Vakalidei, na avang'oli. No mwami ya moloma na a volera avageeri va Babuloni, Ku vosi u li soma mang'oda yaga, nokummannya livuula lyago, a la vikwa ingubo yekiforosadi, na a la vikwa munyoro gwethahabu migoti mwimwe, na a la va wa kavaka mu bwami yibu.

⁸ Kunangwa avageeri vosi vomwami vingira, navutswa si va nyala kusoma mang'oda zana, na si va nyala kuvuu lira mwami livuula lyago.

⁹ Kunangwa mwami Belishazaru ya hu lulukwa inkolo ligali, na ligondo lilye lya galula, na avanene veve va genya.

¹⁰ Ma mama womwami yingira mu inyumba yelilia kigira makuva gomwami navanene veve: mama womwami ya moloma, na a vola, O mwami, u hindire mihiga gyosi; tsiganagani tsitsyo tsi ta ku hulula inkolo mba, kandi ligondo lilyo li ta galula mba.

¹¹ Mundu a veye ho mu bwami bubwo, wa roho gwa va nyasaye vatakatifu gu veye muye; na mu madiku ga dada wowo, ubulavu, nelimanya, nobugeeri, bwa loleka muye, kuli ubugeeri bwa vanya saye; na mwami Nebukadinezaru dada wowo, mwami, mbola, dada wowo, ya mu kola a ve munene wa avakumu, vasegeteri, Avakalidei, na avang'oli;

¹² kigira mwoyo mulahi nogwelimanya, nogwelihulira, nogwelivuula maloto, nogwelilungikidza makuva madinyu, nogwelikunga lihayahayidza, gwa nyoleka mu Danyeli zana, womwami ya gulika Beliteshazaru. Kunangwa Danyeli a langwe, na a la ku vuulira livuula yili.

¹³ Hene yaho Danyeli yigeridzwa imbiri womwami. Mwami ya moloma na a volera Danyeli, Ive u veye Danyeli uyu, u veye ku avana ve lyadikidzwa lyo Buyuda, avo mwami dada wange ya twulidza mu Buyuda?

¹⁴ Mbuliye ku ive, roho gwa avanya saye gu veye mu ive, kandi ubulavu na lihulira, na ubugeeri bulahi bu nyoleka mu ive.

¹⁵ Na kalunu avageeri, na avasegetiri va leteywi imbiri wange, va somere inze amang'oda yaga, nokummannya livuula lyago; navutswa si va nyala kumannya livaula lyago.

¹⁶ Navutswa mbuliye ku ive, u nyala kuvuula mavuulo, nokukunga mahayahayidza: kalunu nu u va nu nyala kusoma mang'oda, nokumannya livuula lyago, u la vikwa ingubo yekiforosadi, nokuvikwa munyoro gwethahabu migoti, nokuva munene wakavaka mu bwami yibu.

¹⁷ Kunangwa Danyeli ya tivula na a vola imbiri womwami, Vihaanwa vivyo vi ve ku ive mwene, na madanyi gogo u he wundi; navutswa nda somera mwami mang'oda nokummannya livuula.

¹⁸ O ive mwami, Nyasaye Wegulu Ku Vyosi, ya ha Nebukadinezaru, dada wowo, ubwami, nobunene, nelidzominywa, nobukumi:

¹⁹ na kigira ubunene bwa ya mu ha, avandu vetsihiri tsyosi, na vetsimpya tsyosi, navetsinimi tsyosi, va degera nokutia imbiri wewe: wa ya yanza kwiita, yiita, na wa ya yanza kuva mwoyo, ya mu leka mwoyo; na wa yenya kunenehidza, ya nenehidza, na wa yenya kugehidza, ya mu gehidza.

²⁰ Navutswainyingamwoyo gwigwe gwigingira, na roho gwigwe gwa gwa mudinyu kuduka ya kola ubwigingiri, ya twulidzwa ku intebe yeye yobwami, na va nyaga ubukumi bwibwe:

²¹ na ya kungwa mu avana vavandu, na mwoyo gwigwe gwa kolwa kuva kuli gwetsinyama, na limenya lilye lya li halala netsisukiri tsyomwigendanyama; ya lihidzwa bunyasi kuli tsing'ombe, na mubiri gwigwe gwama lime lyomigulu; a luhe a duke kumanya Nyasaye U Veye Igulu Ku Vyosi yamehanga mu bwami bwa avandu, kandi ku vosi uyu wa a yanza a mu vika mu bwami.

²² Na ive mwana wewe, O Belishazaru, kali ive wa manya yaga gosi, u vuli kugehidza mwoyo gugwo,

²³ navutswa wegingiye ku Mwami womigulu; na va leti viju vyenyumba yeye imbiri wowo, na ive, navanene vovo, na avakali vovo na vasuria vovo, mu nwereye muvyo iwaini; na ive widzominyi avanyasaye vefetha navethahabu, na vomugasa, na vekivya, na vomusala, na veligina, ava vula kulola, nava ta hulira, nava ta manya; na u vuli kwidzominya Nyasaye womwika gugwo gu veye mu mukono gwigwe, na wetsinzira tsitsyo tsi veye tsitsye.

²⁴ Hene yaho kidonye kyomukono kya hilwa kutwula imbiri wewe, na mang'oda yaga ga ng'odwa ho.

²⁵ Na yaga ga veye mang'oda aga ng'odwa: MENE, MENE, TEKEL, UPHARSIN.

²⁶ Yili li veye livuula lya makuva: MENE; Nyasaye u validzi ubwami bubwo nokubuheridza.

²⁷ TEKEL; ive u gereywi ku tsiratili, kandi u loleki kuva nobugeheru.

²⁸ FERES; ubwami bubwo bu gavuleywi nokuhebwa Avamedi na Avapersia.

²⁹ Ma Belishazaru ya haana munwa, ni va vika ku Danyeli ingubo yekiforosadi, na va mu vika munyoro gwethahabu migoti, na va landidza makuva kuye, u gwiye munene wa kavaka mu bwami.

³⁰ Ubudiku zana yibwo Belishazaru mwami Mukalidei, yiitwa.

³¹ Na Dario Mumedi ya hebwa ubwami, ya li na a ve ne mihiga makumi gatano na lilala na gyiviri.