Danyeli 4 - KITABU KITAKATIFU

¹ Nebukadinezaru mwami, ng'odera avandu vetsihiri tsyosi na avetsimpya tsyosi, na avetsinimi tsyosi, ava menya mu lirova lyosi: Mirembe gyi medeke ku mwinye.

² Inze ndoli nu bulahi kumannya vilolekidzu, na ageligenya aga Nyasaye U Veye Igulu Ku Vyosi a koli ku inze.

³ Vilolekidzu vivye vi veye vinene ndi kandi ageligenya gege ga veye netsingulu ndi ubwami bwibwe bu veye bwemihiga nemihiga, kandi ubunene bwibwe bu lolekanga ku makula namakula.

⁴ Inze, Nebukadinezaru, nda li ni nsosanga mu inyumba yange, nokwelemeridza mu inyumba yange yobwami.

⁵ Nda lola liloto lya ntihidza; na tsiganagani tsya nda li natsyo ku kitali kyange, na malola agomutwe gwange ga nyangidza.

⁶ Kigira yaga nda haana munwa kuleta avageeri vosi va Babuloni imbiri wange, va mbuulire livuula lyeliloto.

⁷ Kunangwa avakumu, na vasegeteri, na Avakalidei, na avang'olera ku tsing'ereng'ani, vingira, na inze nda va volera liloto lyange, navutswa si va mbuulira livuula lyalyo.

⁸ Navutswa inyima yadza imbiri wange, Danyeli u langwa Beliteshazaru, kuli lieta lya munyasaye wange, na wa roho gwa vanyasaye vatakatifu gu veye muye: na inze nda vola liloto lyange imbiri wewe, ni mbola,

⁹ O Beliteshazaru, munene wa avakumu, kigira mmanya roho wa vanyasaye vatakatifu gu veye mu ive, kandi si ha veye na kindu kyaviswa ki ku tamanga, u mbolere malolo geliloto lyange lya nda lola, na livuula lyalyo.

¹⁰ Malola gomutwe gwange ku kitali kyange ga li ndi: nda lola, na henza, musala mu lirova hagati; lihera lyagwo lye igulu lya li linene.

¹¹ Musala zana gwa viruka ni gu va netsingulu na ubutambi bwagwo bwa duka mi gulu, na liloleka lyagwo lya duka ku kiheri kyelirova.

¹² Amatu gagwo ga li malahi, na makuyu gagwo ga li manyingi, nago ga li na vyokulia vya vyosi: na tsinyama tsyomwigendanyama tsya nyola kiriri isi wagwo, na amanyonyi ge igulu ga menya ku tsisya tsyagwo, na vyemibiri vyosi vigutidzwa kugwo.

¹³ Nda lola mu malola gomutwe gwange ku kitali kyange, henza, mulindi na mutakatifu wika kutwula migulu.

¹⁴ Ya hanzuka, na vola ndi, Mu teme musala, mu halule tsisya tsyagwo, mu vungulule amatu gagwo, kandi mu salannye amakuyu gagwo: tsinyama tsi twule isi wagwo, na manyonyi ga twule ku tsisya tsyagwo.

¹⁵ Navutswa mu leke kitinya kyemiri gyagwo mu lirova, ki ve na linali lyekivya na lyomugasa, mu bunyasi budoto bwo mu kyayiru; ki nyole lime lyomigulu: kandi liva lilye li ve halala na tsinyama mu bunyasi bwelirova:

¹⁶ mwoyo gwigwe gu girunkanywe gu vule kuva gwomundu, na a hebwe mwoyo gwenyama; kandi tsinyinga tsitano na tsiviri tsi vite kuye.

¹⁷ Likalaga yili li veye lyomunwa gwavalindi, na likuva li veye lyomunwa gwavataka tifu, ava veyemwoyo va duke ku manya uyu U Veye Igulu Ku Vyosi yamehanga mu bwami bwavandu, kandi a hedzanga uyu wa a yanza kandi a vika kubwo uyu u veye mu kekeke ku vosi.

¹⁸ Liloto yili inze, mwami Nebukadinezaru, ndoli; na ive, O Beliteshazaru, u vuule livuula lyalyo, kigira avageeri vosi avobwami bwange si va nyala kumbuulira livuula lyalyo; navutswa ive u nyala; kigira roho wavanyasaye vatakatifu gu veye mu ive.

¹⁹ Hene yaho Danyeli wa lieta lilye lya li Beliteshazaru, ya genya inyinga inkekeke, na tsiganagani tsitsye tsya mu hulula inkolo. Mwami ya tivula na a vola, Beliteshazaru, u ta leka liloto, kinga livuula lyalyo li ku hulule inkolo. Beliteshazaru ya tivula, na a vola, Mwami wange, liloto li ve ku yavo ava ku dunyira, na livuula lyalyo li ve ku vasigu vovo.

²⁰ Musala gwa wa lola, nogwa viruka, nogwa li netsingulu, gwo butambi bwagwo bwa duka migulu, na lilolekidza lyagwo lya duka ku lirova lyosi;

²¹ gwa amatu gagwo ga li malahi, na makuyu gagwo namanyingi, na kugwo vya li vyokulia vya vyosi; isi wagwo tsinyama tsyomwigendanyama tsya menya mu, na ku tsisya tsyagwo manyonyi gegulu ga li nelimenya lyago:

²² a veye ive O mwami, u viruki nokunyola tsingulu; kigira ubunene bubwo bu nenehi, na bu duki migulu, na ubwami bubwo bu duki ku kiheri kyelirova.

²³ Kandi kuli mwami ya lola mulindi na mutakatifu wikanga kutwula migulu, na a vola, Mu teme musala, nokugudividza; navutswa mu leke kitinya kyemiri kyagwo mu lirova, halala na linali lyekivya na lyomugasa, mu bunyasi budoto bwomu kyayiru kandi gwame lime lyomigulu; na liva lilye li ve halala ne tsinyama tsyomwigendanyama, kuduka tsinyi nga tsitano na tsiviri tsi vita kuye;

²⁴ yili ni livuula lyalyo, O mwami, na gu veye munwa gwa uyu U Veye Igulu Ku Vyosi, gu duki ku munene wange, mwami:

²⁵ ive u la kungwa kutwula ku vandu, na limenya lilyo li la va halala ne tsinyama tsyomwigendanyama, na ive u la kolwa kulia bunyasi kuli ing'ombe, na u la nyola amadzi gelime lyomigulu, na tsinyinga tsitano na tsiviri tsi la vita ku ive; u duke kumanya uyu U Veye Igulu Ku Vyosi wamehi mu bwami bwavandu, na a hedzanga ku uyu wa a yanza.

²⁶ Kandi kuli va haana munwa kuleka kitinya kyemiri kyomusala; ubwami bubwo bu lirana ku ive ligali, inyima weliduka lilyo kumanya magulu gameha ligali.

²⁷ Kunangwa, kigira yaga, O mwami, amakuva gange ga bugirike ku ive, u leke ubwoni bubwo mu likola bulungi, na ubudamano bubwo mu livera avadaka tsimbabasi; mbula ubuIahi bubwo bu la medeka.

²⁸ Yaga gosi ga duka ku mwami, Nebukadinezaru.

²⁹ Inyima wemyeli likumi na gyiviri ya li na a gendanga mu inyumba yobwami bwa Babuloni.

³⁰ Mwami ya moloma na a vola, Yili si li veye Babuloni linene, lya nyombaki netsingulu tsyange kuva inyumba yobwami, kandi kuva lyelidzominywa lyobunene bwobukumi bwange?

³¹ Inyingalikuva yili lya li mu munwa gwomwami, mwoyo gwa twula migulu, ni gu uola, O mwami Nebukadinezaru, likuva yili li volerwa ku ive: Ubwami bu twuli ku ive:

³² u la kungwa mu avandu; na limenya lilyo li la va halala netsinyama tsyomwigendanyama; ive u la kolwa kulia bunyasi kuli tsing'ombe; na tsinyinga tsitano na tsiviri tsi la vita ku ive; kuduka ive u la manya U Veye Igulu Ku Vyosi yamehanga mu bwami bwa avandu, na a hedzanga wa yenyanga ku vosi.

³³ Isaa zana yeyo likuva yilyo lya dukidzwa ku Nebukadinezaru: naye ya kungwa mu avandu, na ya lia bunyasi kuli tsing'ombe, na mubiri gwigwe gwama lime lyomigulu, lisu lilye lya luha lya va kuli amavaha getsi ndidzu, na masanda gege kuli amasanda gamanyonyi.

³⁴ Na inyima wamadiku yago, inze, Nebukadinezaru, nda ginga tsimoni tsyange ni mbenza migulu, na limanya lyange lirana ku inze, na nda gasidza U Veye Igulu Ku Vyosi, kandi nda kuminya nokwidzominya uyu u hindiranga mihiga nemihiga kigira ubunene bwibwe bu veye bwe mihiga nemihiga, na ubwami bwibwe bu veye bwamakula na makula;

³⁵ na avandu vosi velirova va voleywi si va veye kindu; kandi a kolanga kuli ubulaliri bwibwe ku amahe gomigulu, kandi mu avamenya mu lirova; na si ha li noyu u nyala kugaya mukono gwigwe, kinga kumuteva, U kola ki?

³⁶ Kandi inyinga zana yeyo limanya lyange lirana ku inze; na kigira ubukumi bwobwami bwange, ubunene bwange nobung'ereng'anu bwirana ku inze; na avakulundu vange navanene vange va nyenya; ninze nda singeri dzwa mu bwami bwange, na nda me dwa ubulahi bunene.

³⁷ Kalunu inze, Nebukadinezaru, nzidzominya nokunenehidza nokukuminya Mwami womigulu; kigira miyinzi gyigye gyosi gyi veye gyeligali, na tsinzira tsitsye tsi veye tsinungi; na yavo ava genda nga mu bwigingiri a nyala kuvagehidza.