Danyeli 12 - KITABU KITAKATIFU

¹ Kandi inyinga yeyo Mikaeli a la singira, munene ku vanene u singirira avana vavandu vovo, kandi ha la va nenytnga yekivi kinene, ki ta li ho nekindi ki leng'ana nakyo kutwula inyinga ihiri ya tanga kuva ho kuduka ku inyinga yeyo; kandi inyinga yeyo avandu vovo va la honywa, samulala u li nyoleka kuva mung'ode mu kitabu.

² Kandi avanyingi ku yavo ava gonanga mu lugukyi lwelirova va la vuka, avalala kuduka mu buhindiri bu ta hera mba na avandu kuduka mu tsisoni na liiegwa li ta hera mba.

³ Kandi avobugeeri va laaka kuli ubung'ereng'anu bwombwerefu; na yava ava girunkannya avanyingi kulonda ubulungi va laaka kuli tsing'ereng'ani mihiga nemihiga.

⁴ Navutswa ive Danyeli, u kunike amakuva yaga nokuvika muhuri ku kitabu, kali kuduka ku inyinga ye kiheri: avanyingi va la nyagula yiyi na yiyi, na limanya li la medeka.

⁵ Kunangwa inze, Danyeli, nda henza, na henza, avandi vaviri va singira, mulala ku luginga ku luvega lwomugera yilu, na wundi ku luginga lwomugera ku luvega lundi.

⁶ Na mulala ya volera mundu wevika ingubo yekatani, wa li ku madzi gomugera igulu, na a vola, I la va inyinga ki kuduka ku kiheri kyevindu vyokugennya yivi?

⁷ Kandi nda hulira mundu wevika ingubo yekatani wa li ku madzi gomugera igulu, lwa ya ginga mukono gwigwe mulungi, nomukono mmosi kugyihenzidza migulu, nokwisuha ku uyu u veye mwoyo mihiga nemihiga, ha la va nenyinga, netsinyinga, ne nusu yenyinga; kandi lwa va male kudonyannya vidonye tsingulu tsyavandu avatakatifu, vindu yivi vyosi vi la twekidzwa.

⁸ Na nda hulira, navutswa si nda manya: kunangwa inze nda vola, Mwami wange, kiheri kyevindu yivi ki la va ndi?

⁹ Naye ya vola, Danyeli, u tsie; kigira makuva ga kunikeywi nokuvikwa muhuri kuduka inyinga yekiheri.

¹⁰ Avanyingi va letakasa avene, nokwenihidza, nokuseredzwa; navutswa avadamano va la kola ubudamano: noku avadamano si ha la va na u manya; navutswa avageeri va ia manya.

¹¹ Kandi kutwula inyinga zana yesadaka yokusambwa kazozo i la twulidzwa, ne livihiridza lyokwononya li singeridzwa, ha la va namadiku elfu na tsimia tsiviri namakumi gatano na gane.

¹² A veye nobugasu uyu u lindanga, nokuduka ku lidiku lya elfu na tsimia tsivaka namakumi gavaka, netsisuvi tsitano.

¹³ Navutswa ive u tsie kuduka ku inyinga yekiheri ki li va ho; kigira ive u la sosa nokusingira mu bugono bubwo, ku kiheri kyamadiku yago.