Danyeli 11 - KITABU KITAKATIFU

¹ Ku inze, mu muhiga gwokutanga gwa Dario Mumedi, nda singira kumuluviriridza, nokumuha tsingulu.

² Na kalunu nda ku mannya ageligali. Henza, avami vavaka vandi va la singira mu Persia; na wa kane a la va mutugi kuvita avandi vosi: na inyinga a nyola tsingulu kigira ubutugi bwibwe, a la vukidza avandi vosi kuhing'ana ku bwami bwe Bugreki.

³ Na mwami wetsingulu a la singira, u lyameha ku bwami bunene, na a la kola kuli ubulaliri bwibwe.

⁴ Kandi inyinga a li singira, ubwami bwibwe bu la vunannywa, kandi bu la gavulwa ku tsimbuudza tsine tsyomigulu, navutswa si bu la va ku visukululwi vivye, kandi si bu la leng'ana nobwami bwibwe bwa yameha; kigira ubwami bwibwe bu lifwa, kali ku avandi ava ta li ku yava.

⁵ Na mwami wa kusini a la va netsingulu, na mulala ku vanene veve; na a la va netsingulu kuvita uyu, na a la va nobwami; na ubwami bwibwe bu la va ubwami bunene.

⁶ Na ku kiheri kyemihiga va lehambannya halala; na mwana mukana womwami wa kusini a la tsia ku mwami wa kasikasini kulagana naye: navutswa tsingulu tsyomkono gwigwe tsi la gota; kandi muami si a la singira kinga mkono gwigwe; navutswa mukana uyu a la twulidzwa, navo ava mu leta, na uyu wa mwivula, naye wa mu vika tsingulu mu tsinyinga yitsyo.

⁷ Navutswa mu lisibu lyekitinya kyomukana, mulala a la singira mu bugono bwibwe, u li tsia mu lihe na a lingira mu lugaga lwomwami wa kasikasini, na a la hing'ana navo nokuguuta.

⁸ Kandi avanyasaye vavo, na vifwananyi vyavo, vyelisalulwa, na viju vilahi vyavo vyefetha nevyethahabu, a la vi lanya nokuvihila mu Egepeti; kandi mihiga gyi duki, a legaya ku mwami wa kasikasini.

⁹ Na a lingira mbwami bwomwami wa kusini, navutswa a lirana mu kivala kikye.

¹⁰ Na avana avayai veve va la lwana, kandi va la vugannya kiduma kinene kyamahe, aga li duka, nokusalama, nokuvita hagati; na va lirana nokulwana kuduka kali ku lugaga lwilwe.

¹¹ Kandi mwami wa kusini a la vihirirwa ligali, nokutsia kulwana naye, kali na uyu mwami wa kasika sini; naye a la tuma kiduma kinene, na kiduma kinene zana ki la vikwa mmakono gege.

¹² Na kiduma ki la va nomwoyo gwokwigingira, naye a la va nomwoyo gwelidzominywana a la tsoma hasi avandu tsielfu amakumi gamakumi, navutswa si a la guuta mba.

¹³ Na mwami wa kasikasini a lirana, na a la leta kiduma kinene kuvita kyembiri; na a la duka ku inyinga yekiheri kyetsinyinga, kali ku kiheri kyemilliga, nelihe linene nevindu vinyingi.

¹⁴ Kandi mu tsinyinga yetsyo, avanyingi va la singira kuhing'ana nomwami wa kusini: kandi avana va valulu ku vandu vovo va ligingira avene kusingeridza lilola; navutswa va la gwa hasi.

¹⁵ Ma mwami wa kasikasini a ladza, nokulomba kitumi nokugumira lidala lya lemerwa mwoyo: na amahe ga kusini ga la vula kusingira, kinga avatovole veve, kandi si ha la va netsingulu kusingira.

¹⁶ Navutswa uyu udzanga kulwana naye a la kola kuli mwene a yanza, kandi si ha la va nokusingira imbiri wewe; naye a la singira mu kivala kyobukumi, nomu mukono gwigwe gu la va nelidividza.

¹⁷ Naye kandi a la dinnya ligali mumoni mwimwe kuudza netsingulu tsyobwami bwibwe bwosi, halala namakuva malungi; na a la ga kola: na a la mu ha mukana wavakali kumwononnya; navutswa mukana si a la singira, kinga kumukonya mba.

¹⁸ Inyima wa yaga a la girunkannya mumoni mwi mwe kuhenza ku visulu, nokuguuta vinyingi: navutswa munene a la heridza linyega lya uyu u kola; yee, kuvita yaga a la mwirannyira kuye linyega lilye.

¹⁹ Ma a la yekidza mumoni mwimwe ku tsingaga tsyekivala kikye mwene; navutswa a likigitala nokugwa, na a la vula kuloleka.

²⁰ Kunangwa wundi a la singira ha bugono bwibwe u li vitidza mutwulidzi ubushutu a vite hagati hobukumi bwobwami; navutswa mu madiku makekeke uyu a la dividzwa, si ha li mu butima kinga mu bulwani.

²¹ Na mu bugono bwibwe mundu muyingu a la singira mu, wa va la vuia kuha lidzominywa lyobwami: navutswa a la duka mu madiku gelilemerwa mwoyo, na a la gumira ubwami ku makuva gobugohi.

²² Kandi avetsingulu tsinyingi kuvita va la guutwa imbiri wewe, na va la vunanywa; yee, kandi munene welilagana.

²³ Na inyima welilagana li lombwa naye, a la kola ubugadi; kigira a lanegira, nokugwa wetsingulu navandu vakekeke.

²⁴ Na mu tsinyinga tsyelilemerwa mwoyo, a lingira halahi ha vita hekivala, kandi a la kola yaga aga vadada veve kinga vaguga veve va vuli kukola; a la va salannyira vilanye, nevyokwigulirwa, nobutugi: yee, a la lomba masaava gege ku tsingaga, kali ku inyinga i duki.

²⁵ A la tsuva tsingulu tsitsye nobuluviriri bwibwe, nelihe linene kuhing'ana nomwami wa kusini; na mwami wa kusini a la hing'ana naye nelihe linene lyetsingulu kuvita; navutswa si a la singira; kigira va la lomba masaava kuye.

²⁶ Yee, ava lia vyokulia vivye vilahi va la mu dividza, na lihe lilye li la salama; na vanyingi va la gwa hasi avakudzu.

²⁷ Ku makuva ga avami yava vombi, myoyo gyavo gyi la va kukola ubwononnyi, na va la veherana ha imeza indala: navutswa si ga la genda bulahi; kigira kiheri ki la va ku inyinga i lageywn.

²⁸ Hene yaho a lirana mu kivala kikye nevindu vinyingi; na mwoyo gwigwe gu la va nelihing'ana ku lilagana litakatifu; na a la kola aga a yanza, nokwirana mu kivala kikye mwene.

²⁹ Ku inyinga i lageywi a lirana, nokutsia kusini; navutswa inyinga yenyima si ga la va kuli ga li inyinga ya matsyambiri.

³⁰ Kigira bwato bwa Kitim bu la mu twulira; kigira yaga a la vereridzwa, naye a lirana, kandi a la va nobutima ligali ku lilagana litakatifu, nokukola uga a yanza: na a lirana, nokuhulira yavo ava lekanga lilagana litakatifu.

³¹ Kandi vyuma vyobulwani vi la singira hu luvega lwilwe, nava va la vika ubudamano mu hatakatifu, kali mu lugaga, kandi va la twulidza kihaanwa kyokusambua kya kazozo, nokusingeridza livihiriridza li kolanga hatswa.

³² Na yava ava kola ubwebaali ku lilagana a la va girunkannya namakuva gobugohi; navutswa avandu ava manya Nyasaye wavo va la va netsingulu, nokukola vyokugenya.

³³ Kandi avobugeeri ku vandu va legidza avanyingi; navutswa va la gwa ku kivavi, noku lumemo, noku lilanywa, noku lyononywa, madiku manyingi.

³⁴ Na inyinga ya va li gwa va la konywa nobukonyi bukekeke; navutswa avanyingi va lehambannya kuvo namakuva gobugohi.

³⁵ Kandi avaku avobugeeri va la gwa, va duke kutakaswa, nokulavidzwa, nokukolwa avanifu, kali kuduka ku inyinga yekiheri; kigira yaga ga veye genyinga i lageywi.

³⁶ Na mwami a la kola kuli a yanza; kandi a leyidzominya, nokwekola munene ku vanyasaye vosi, na a la vola ku Nyasaye wa vanyasaye amakuva gokugennya; na a la menya buiahi kuduka lwa ubutima bu heridzwa; kigira yaga aga saavirwa ga la kolwa.

³⁷ Kandi si a la vererera avanyasaye vavaguga veve, kinga lyenya lyavakali, kinga munyasaye ku vosi; kigira a lenenehidza ku vosi.

³⁸ Navutswa habu gono hehe a lidzominya munyasaye wetsingaga tsyavasikari; kandi munyasaye wavaguga veve va vula kumanya a la mwidzominya nethahabu, nefetha, namagina gobuguli budinyu, nevindu vi yanzidzanga.

³⁹ A la kola amakuva gege ku tsingaga tsyetsingulu kuvita nobukonyi bwomunyasaye mugeni: noku vosi u mbugi rira a la meda nobukumi, kandi a la vamehidza ku vanyingi, nokugavula kivala ku buguli.

⁴⁰ Kandi inyinga yekiheri mwami wa kusini a la hing'ana naye; na mwami wa kasikasini a la mu twulira kuli kihuudzudzi halala namagari gobulwani, navasikari vokunina ku tsiparasi, nobwato bunyingi; naye a lingira mu vivala yevyo, nokusalama, nokuvita hagati.

⁴¹ Kandi a lingira mu kivala kyobukumi, na vivala vinyingi vi la hinulwa; navutswa yivi vi ia honywa kutwula mu mukono gwigwe: Edom, Moabu, na vanene vavana va Amon.

⁴² Kandi a la nyira mukono gwigwe ku vivala; na kivala kya Egepeti si ki la hona mba.

⁴³ Na a la va netsingulu ku akiba yethahabu, na yefetha, noku vindu vilahi vya Egepeti; kandi Valibya, na Vaethiopia va la va ha virenge vivye.

⁴⁴ Navutswa amakuva ga twula ivugwe na kasikasini ga la mu hendidza; na a la twula nobutima ubunene kudividza, nokweya vanyingi va dive ligali.

⁴⁵ Kandi a la singeridza mahema genyumba yeye yobwami hagati henyanza nekigulu kitakatifu; navutswa a la duka ku kiheri kikye, na si ha li na u li mu konya.