Danyeli 1 - KITABU KITAKATIFU

¹ Ku muhiga gwegyivaka gwelyameha lya Jehoiakim mwami wa Vayuda, Nebukadinezaru mwami wa Babuloni yadza Yerusalemi, na a li kumbiridza.

² Na Yahova ya vika Jehoiakim mwami wa Vayuda mu mukono gwigwe, halala nekidieli kyeviju vyenyumba ya Nyasaye; naye ya vi vugula na a tsia navyo kuduka mu kivala kya Shinaru mu inyumba yomunyasaye wewe; na a vika viju zana mu inyumba yakiba yomunyasaye wewe.

³ Na mwami ya volera Ashipenazu wa li munyampara wevitsiri vivye, a lete avana vayai avalala ku avana va Israeli, ku avenyumba yobwami noku avanene;

⁴ avasoleli ava ta li nembala, navutswa aveligondo lilahi, avasidza mu bugeeri bwosi, kandi avelimanya, navahuliri velimanya, na avetsingulu kusingira mu inyumba yomwami; kandi ya mu volera a vegidze megidzo nolulimi lwa Vakalidei.

⁵ Kandi mwami ya va lagira vyokulia vilahi vyobwami kazozo, kandi iwaini yomwene a nwedza ku, kandi ya laga va lageridzwe ndiyo mihiga gyivaka; inyima wagyo va duke kusingira imbiri womwami.

⁶ Kunangwa ku yava, ku avana va Yuda, va li Danyeli, na Hanania, na Mishaeli, na Azaria.

⁷ Na munene we vitsiri ya va gulika ameta: ya langa Danyeli, Beliteshazaru; na Hanania, ya langa Shadaraka, na Mishaeli ya langa Meshaka; na Azaria ya langa Abed-nego.

⁸ Navutswa Danyeli ya saavira mu mwoyo gwigwe a vule kwivika mu budamano bwevyokulia vilahi bwomwami, kinga bwewaini ya ya nwedza: kunangwa ya saava munene wevitsiri a vule kwivika mu budamano.

⁹ Kunangwa Nyasaye ya kola Danyeli a nyole liverwa netsimbabasi imbiri womunene wevitsiri.

¹⁰ Na munene wevitsiri ya volera Danyeli, Ntidza munene wange mwami, wa lagira mwinye vyokulia vyenyu, na vyokunwa vyenyu: kigira ki mwami a la lola mmoni mwenyu, mu vule kuva mulahi kuli mwavasoleli avelikula lilala nemwinye? Na ndiyo mu la vika mutwe gwange mu buhimwa imbiri womwami.

¹¹ Kunangwa Danyeli ya volera mulindi wo munene wevitsiri ya vika ku Danyeli, na Hanania na Mishaeli, na Azaria:

¹² Mwadza u geridze kwinye avatumekiri vovo madiku likumi; va ku he tsingutsa ku lie, na amadzi ku nwe.

¹³ Inyima wa yaga mumoni mwetu mu henzwe imbiri wowo, na mumoni mwavasoleli ava litsanga vyokulia vilahi vyomwami; na kuli u lola, u la kola ku vatumekiri vovo.

¹⁴ Kunangwa ya va hulira ku likuva yili, na ya va geridza madiku likumi.

¹⁵ Na inyima wa madiku likumi mumoni mwavo mwa loleka kuva mulahi kuvita, na va li avakomeru, kuvita avasoleli vosi ava litsanga vyokulia vilahi vyomwami.

¹⁶ Kunangwa mulindi ya twulidza vyokulia vyavo, newaini ya ga va dukira kunwa, na a va ha tsingutsa.

¹⁷ Kunangwa ku makuva ga avasoleli vane yava, Nyasaye ya va ha limanya nobusidza mmegidzo gosi nomu bugeeri bwosi: kandi Danyeli ya li nelihulira mu malola gosi momu maloto.

¹⁸ Na inyima wamadiku agomwami ya laga va letwe yimu, munene wevitsiri ya va leta imbiri wa Nebukadinezaru.

¹⁹ Na mwami ya volerana navo; na kuvo si va nyoleka ava leng'ana na Danyeli, na Hanania, na Mishaeli, na Azaria: kunangwa va singira imbiri womwami.

²⁰ Kandi mu makuva gosi gobugeeri na agelimanya, agomwami ya va teva ku, ya va lola kuva avalahi kuvita hali likumi, avakumu vosi na avasegetiri ava li mu bwami bwibwe bwosi.

²¹ Kandi Danyeli ya hindira kuduka muhiga gwokutanga gwomwami Kiru.