Ayubu 8 - KITABU KITAKATIFU

¹ Hene yaho Bilidadi Mushuhi, ya tivula, na a vola,

² Ive u la vola amakuva yaga kuduka invanga ki? Amakuva gomunwa gugwo ga la va kuli imbuudza inene kuduka inyinga ki?

³ Nyasaye a kyaminyanga likalaga? Kinga Wanyala Vyosi a kyaminyanga agobulungi?

⁴ Ni i va avana vovo va mu koleye ubwoni, Naye u va viki mmukono gwelihyolo lyavo;

⁵ Ni i va wenya Nyasaye nobudinyu, Nokwegehidza ku Wanyala Vyosi;

⁶ Ni i va ive wa li umusiyeku nowobulungi; Ligali uyu kalunu nkano ya ka vuka kukukonya, Nokukola ubumenyo bwobulungi bubwo kugasidzwa.

⁷ Kandi kali litanga lilyo lya li likekekeke Navutswa nkano lihera lilyo li medeki ligali.

⁸ Kigira, mwadza, teva ku makuva goku matsyambiri, Wevike ku lihenza aga vaguga vavo va yidera,

⁹ (Kigira kwinye ku veye avomgolova vutswa, na si ku manya kindu, Kigira madiku getu ku lirova ga veye kiriri vutswa);

¹⁰ Yavo si va la kwegidza, nokukulungikidza, Nokuvola makuva ga twulanga mu mwoyo gwavo?

¹¹ Lihunzu li meranga bugira ubudohi? Na ulose lu mera bugira amadzi?

¹² Inyinga lu kikiri luvisi, kinga ni lu kikiri kukalagwa, Lu nialanga imbiri weuindi vyosi Vi meranga.

¹³ Ni ndiyo tsinzira tsya yavo vosi aviviriranga Nyasaye; Nelisuuviridzwa lyomundu wa vula kutia Nyasaye li la diva:

¹⁴ Welidinyeridzwa lilye li la donyeka, Nelisuuviridzwa lilye li la va kuli inyumba yoluvuvi.

¹⁵ A lesedema ku inyumba yeye, navutswa i la vula kusingira: A la hambana nayo, navutswa i la vula kumenya.

¹⁶ Uyu a veye umbisi imbiri weliuva Na visibu vivye vi la landa mu mulimi gwigwe.

¹⁷ Nemiri gyigye gyi nazira kitumi kyamagina, Na a henza ha magina ga veye.

¹⁸ Ni i va uyu a diva kutwula mbugono bwibwe, Hene yaho bu la mwambakana nokuvola, Inze si ndoli ive mba.

¹⁹ Henza, ubusangali bwenzira yeye, ni yibu; Navandi va la sebuka kutwula mu marova.

²⁰ Henza, Nyasaye si a la ta mundu mudukiru, Kandi si a la dinyeridza ava kolanga budamano.

²¹ A lizulitsa munwa gugwo liseka, Neminwa gyigyo a la gyizulitsa isango yobuyanzi.

²² Yavo ava ku dunyira va la vikwa tsisoni; Nelihema lyomudamano si li la va ho kandi mba.