Ayubu 7 - KITABU KITAKATIFU

¹ Mundu si a veye nenyinga yeye yokulwana ku lirova? Na madiku gege si ga veye kuli madiku gomundu a tungangwa?

² Kuli mutumekiri u kayirangwa Iigali kiriri, Kuli u tungangwa u henzanga kunyola amadanyi gege:

³ Ni ndiyo inze mbebeywi myeli gyavutswa, Mbebeywi ubudiku bweliluhidza.

⁴ Lwa ngona hasi, ntevanga, Nda twula inyinga ki? Navutswa ubudiku bu vedzanga ubutambi Na nzitsuyi ligomogoma yiyi na yiyi bu luhe bu kye.

⁵ Umbiri gwange gu vikeywi tsing'ende na makindi gamarova: Ligodo lyange li boheywi, kandi li yabuguki.

⁶ Madiku gange ga nyagulanga kuvita kinaviru kyomunavi Nago ga vitanga bugira lisuuviridza.

⁷ Mwidzulitse livamwoyo lyange li veye kuli imbuudza: Imoni yange si i la lola ubulahi kandi mba.

⁸ Imoni ya uyu u ndolanga si i la ndola kandi mba; Tsimoni tsitsyo tsi la henza ku inze, navutswa si nda va ho mba.

⁹ Kuli lilesi lya dividzwa nokugota, Ni ndiyo uyu wikanga mu Kihadisi si a li senuka kandi mba.

¹⁰ Si a lirana kandi mu inyumba yeye mba Kandi hango hehe si ha la mu manya kandi mba.

¹¹ Kigira yaga si nda gaya munwa gwange mba; Nda vola mu busalisi bwomwoyo gwange; Nda vola mu litsunwa lya mbeye nalyo mu mwoyo gwange.

¹² Inze mbeye inyanza, kinga inze mbeye inyama inene yo mu inyanza, U duke kuvika ku inze mulindi?

¹³ Lwa mbolanga, Kisero kyange ki la neminya mwoyo, Kitali kyange ki la ngehidzira likenya lyange

¹⁴ Hene yaho u ntihidzanga namaloto, Nokuntihidza na malola:

¹⁵ Kuduka mwoyo gwange gu tovoye kumigwa, Nokutovola likudza kuvita vigumba vyange.

¹⁶ Mbihirirangwa livamwoyo lyange; si nyenya kuva mwoyo madiku gosi: U ndeke tsyeng'ine, kigira madiku gange ga veye mwika vutswa.

¹⁷ Mundu a veye ki, u duke kumukuminya, Nokumuvika mu mwoyo gugwo,

¹⁸ Nokumuluta mugamba nomugamba, Nokumugeridza idagika nedagika?

¹⁹ U la vula kulola livula kulungika lyange kuduka inyinga ki, Nokundeka tsyeng'ine, mmire amate gange?

²⁰ Ni mba ni nkoli ubwoni, nkolera ki ive O ive umlindi wavandu? Kigira ki u mbiki kuva kya u henzera ku Kuduka ngwiye musigo ku mwoyo gwange?

²¹ Kandi kigira ki u vula kusameha mahyolo gange, nokutwulidza budamano bwange? Kigira kalunu nda gona hasi mu lugukyi? Na ive u la nyenya ligali, navutswa si nda va ho mba.