Ayubu 6 - KITABU KITAKATIFU

¹ Hene yaho Ayubu ya tivula, na a vola,

² Nkano litsunwa lyange lya ka gerwa, Na kivi kyange kya ka vikwa ku tsiratili

³ Kigira kalunu nkano bwa ka va buliduhu kuvita muyeke gwetsinyanza: Kigira yaga makuva gange ga volangwa bugira liganagana.

⁴ Kigira mibaho gya Wanyala Vyosi gyi veye mu inze, Ubutsiba bwagyo mwoyo gwange gwa nwa: Vyokutihidza vya Nyasaye vyesingiridza ku inze.

⁵ Isukiri yo mu mulitu yananga lwa i nyolanga bunyasi? Kinga ing'ombe yaniranga ku bunyasi bwayo?

⁶ Kitsinzibu ki la libwa bugira munyu? Kinga ubudugi bwelibuyu ubulavu bu veye mu nelitsamii?

⁷ Mwoyo gwange gu suye kudira vya zana; Ku inze vi veye kuli inyama yokuvihiriridza.

⁸ Nkano nda ka nyola lyenya lyange; Na Nyasaye ku mba likuva lya nkayirangwa

⁹ Nalyo ni yili, Nyasaye na a va na a yanza kunshonolannya; A dendeyidze mukono gwigwe nokunkalaga kutwula

¹⁰ Hene yaho nkano nda ka kola ni neminywa mwoyo, Yee, nkano nda kegingira mu litsunwa li ta veye nelivererera, Kigira inze si nyambakani amakuva go Mutakatifu mba.

¹¹ Tsingulu tsyange tsi veye ki, nduki kulinda? Kiheri kyange ki veye ki, nduke kwekudzira?

¹² Tsingulu tsyange tsi veye tsingulu tsyamagina? Kinga mubiri gwange gu veye mugasa?

¹³ Si ga veye kigira si mbeye nobukonyi mu inze Kandi ubugeeri bwange bu kungeywi ku inze?

¹⁴ Ku uyu u veye himbi likinda, ga mu dukira avalina veve va mu kolere bulahi; Kali ku uyu u lekanga kutia Wanyala Vyosi.

¹⁵ Avamwavo vange va koli ubugadi kuli mugera; Kuli luhongo lwemigera gyi vitanga.

¹⁶ Gyi gwiye mimwamu kigira amagina gembula, Na helikonza lyevisa:

¹⁷ Inyinga gyi nyola uluya gyi gotanga; Uluya ni lu veye ho gyi divanga kutwula mbugono bwagyo.

¹⁸ Tsing'endo tsi tsitsanga ku inzira yagyo tsi tsitsanga ha luvega; Tsyanegiranga mu kyangalangwi, nokugota.

¹⁹ Tsing'endo tsya Tema tsya henza, Viduma vya Sheba vya tsi lindirira.

²⁰ Va nyola tsisoni kigira va li ni va suuviye; Vadza ho, ni va genya.

²¹ Kigira kalunu mwinye si mu veye kindu; Mu lola litihidza, na mu tidzanga.

²² Nda vola, Mpe? Kinga, nda vola, Mu ndetere kindu ku vindu vyenyu?

²³ Kinga, nda rola, Mbonnya kutwula ku makono gwomusigu wange? Kinga nda rola, Ntungira kutwula ku mukono gwavadambidzi?

²⁴ Unzegidze, na inze nda kiring'ana; Mannya nduke kumanya ni kindu ki kya ndona.

²⁵ Amakuva gobulungi ga veye nobunyali kuduka ndi Navutswa ligondoka lyenyu, li gerehidza ki?

²⁶ Mwinye mu ganagana kugondo kera amakuva, Kigira amakuva ga uyu u twulidza mwoyo ku vindu ga veye kuli imbuudza,

²⁷ Yee, mwinye mu yanza kukola ikura ku avabisandu, Nokukola mulina wenyu kuva vyokukirannya.

²⁸ Kunangwa kalunu mu yanze ku mbenza; Kigira ligali si nda veha imbiri wenyu mba.

²⁹ Mwirane, mwadza, li ta va ho likuva lyobukyamu; Yee, mwirane kandi, likuva lyange ni lyobulungi.

³⁰ Ubukyamu bu veye mu lulimi lwange? Tsintama tsyange si tsi nyala kumanya amakuva gobugadi?