Ayubu 42 - KITABU KITAKATIFU

¹ Hene yaho Ayubu ya tivulira Yahova, na a vola,

² Mmanya ive u nyala kukola vindu vyosi Kandi lisaavira lilyo lyosi si li nyala kugaywa.

³ Ni bwaha a visanga makuva bugira limanya? Kigira yaga inze mboye ga nta manya, Vindu vyokugenya vya nguuta vya nta manya.

⁴ Hulira, nku saala, na nda vola; Nda ku sava kindu, na ive u nzilwadzire.

⁵ Nda li ni mbuliranga makuva gogo nelihulira lyogutu; Navutswa kalunu imoni yange i lola ive:

⁶ Kunangwa kigira yaga inze nzedunyira Na nzeganira mu lugukyi nomu ligoke.

⁷ Kunangwa, ga duka ndiyo, inyima wa Yahova ya volera Ayubu makuva yaga, Yahova ya volera Elifazu Muteman, Ubutima bwange bwaaka ku ive, noku valina vovo vombi: kigira mwinye si mwa vola amalungi ku makuva gange ga mwa vola, kuli mutumekiri wange Ayubu ya vola.

⁸ Kunangwa kalunu, mu vugule tsing'ombe tsitano na tsiviri, namagondi makole gatano na gaviri, mu tsie navyo ku mutumekiri wange Ayubu, mu haane vi ve vyemyoyo gyenyu kihaanwa kyokusambwa; na mutumekiri wange Ayubu a la mu saalira; kigira nda bugirira uyu, mbule kukolera mwinye kuli ubusiru bwenyu; kigira si mwa vola ku inze makuva gobulungi kuli mutumekiri wange Ayubu ya vola.

⁹ Ma Elifazu Muteman, na Bildadi Mushuhi na Zofaru Munaamathi va tsia, na va kola kuli Yahova ya va laga: na Yahova ya bugirira Ayubu.

¹⁰ Na Yahova ya girunkanya ubuhambe bwa Ayubu, lwa ya saalira avalina veve: Yahova ya ha Ayubu hali kaviri kuvita vya ya li navyo ku matsyambiri.

¹¹ Ma va tsia kuye avamwavo veve vosi, na vabotso veve vosi, na vosi ava mu manya ku matsyambiri, na va lia halala naye mu inyumba yeye: va mu lilira, noku muleminya mwoyo mu gosi agobu damano yibwo bwosi bwa Yahova y a leta kuye: sa mulala ya mu ha kidonye kyefetha, nemingiri yethahabu.

¹² Na ndiyo Yahova ya gasidza kiheri kya Ayubu kuvita litanga lilye: naye ya li namagondi tsielfu likumi na tsine, netsing'amia tsielfu tsitano na indala, netsing'ombe tsyo kulima tsielfu tsiviri, netsisukiri tsi dwasi elfu indala.

¹³ Kandi ya li navana avayai vatano na vaviri navakana vavaka.

¹⁴ Na ya gulika wokutanga, Jemima; na wa kaviri ya mu gulika Kezia; na wa kavaka ya mu gulika Kerenhapuku.

¹⁵ Mu kivala yikyo kyosi avakana si va li mu avalahi kuli avakana va Ayubu mba: na dada wavo ya va ha miyandu hagati ha vabotso vavo.

¹⁶ Na inyima wevindu yivyo Ayubu ya hindira mihiga mia na makumi gane, na ya lola avana veve, na visukulu veve, kuduka ku likula lya kane.

¹⁷ Ma Ayubu ya kudza, musakulu no wizula madiku.