Ayubu 41 - KITABU KITAKATIFU

¹ U nyala kulimbika leviathan noluyali? Kinga kwigalira lulimi lwayo nomugoye?

² U nyala kuvika mugoye mu amolu gayo? Kinga kuhudula olusaya lwayo nenzago?

³ I la ku saala nelisaala linyingi? Kinga i la ku volera makuva madoto?

⁴ I la kola lilagana nive, U duke kugivugula kuva mutumekiri wowo kazozo?

⁵ U la kina nayo kuli u kinanga nelinyonyi? Kinga u la gi bohera avakana vatugwa vovo?

⁶ Viduma vyavaluvi vi la gi kola vyokukiranya vyavo? Va la gi gavula ku yavo ava kiranyanga?

⁷ U nyala kwizulitsa ligodo lyayo nevivya vyetsisonga, Kinga mutwe gwayo u nyala kugwizulitsa namakango?

⁸ Vika mukono gugwo kuyo; Widzulitse ubulwani, nokuvula kukola kandi.

⁹ Henza, likayirwa lyayo li veye lya vutswa: Mundu si a li tsomwa hasi kali kugilola?

¹⁰ Si ha veye nomululu u duka kugitindira: Eunangwa ni bwaha u nyala kusingira imbiri wange?

¹¹ Ni bwaha wa tanga kuha inze kuduka ga ndukire kumutunga kandi? Ku vvosi vi reye isi weligulu lyosi no wange.

¹² Inze si nda kiring'ana mu vivero vivye mba, Kinga mu makuva getsingulu tsitsye tsinene, kinga ligondo lilye lilahi.

¹³ Ni bwaha u nyala kuginavula ingubo yayo yegulu? Ni bwaha wingira mu tsisaya tsyayo?

¹⁴ Ni bwaha u nyala kwigula miliango gyommoni mwayo? Amino gayo ga tihidzanga ku tsimbega tsyayo.

¹⁵ Amagamba gayo getsingulu noluyai lwayo, Kuli ga gerekana halala kuli ga homerwa nomuhuri.

¹⁶ Ga hambana halala Kuduka imbuudza si i nyala kuvita hagati.

¹⁷ Ga gerekana halala; Ga handirana halala si ga nyala kwavukanywa mba.

¹⁸ Ku lyasimula lyayo li ng'ereng'ananga ubulavu, Na tsimoni tsyayo tsi fwanana nevigohe vyomugamba.

¹⁹ Tsimuli tsyakanga tsi twulanga mmunwa gwayo, Na tsisese tsyomuliru tsi dumanga igulu.

²⁰ Mwoki gu twulanga mmolo gayo, Kuli gwenyingu i tavagiranga na mahunzu gaakanga muliru.

²¹ Myika gyayo gyadukidzanga amanda, Nolumemo lyomuliru lu twulanga mmunwa gwayo.

²² Mwigoti mwayo, tsingulu tsinyingi tsi menyi mu, Na litihidza li kinanga imbiri wayo.

²³ Misasu gyenyama yayo gyi hambanywa halala: Gya oinyirana kuyo; si gyi nyala kutwulidzwa.

²⁴ Mutima gwayo gwa handalala kuli ligina; Yee, gwa handalala kuli lugina.

²⁵ Lwa yeginga yene, avetsingulu va tidzanga; Kigira ubutii bwokutimulwaenkolo.

²⁶ Mulala na a gi tema nekivavi, si yekonya kindu; Kinga lusaka, kinga litimu, kinga makango amogi.

²⁷ I lolanga kivya kuli lulimu, Na mugasa kuli musala gwa gunda.

²⁸ Mubano gwo buta si gu nyala kugikunga: Na magina ga lasangwa nolukova kuyo, ga girunkananga kuva uluvuva.

²⁹ Tsindanga tsi validzangwa kuva uluvuva: Na i sekanga ku liluuma lyelitimu.

³⁰ Ku tsimbega tsyayo tsya isi i veye kuli tsimbuye tsinzogi: I kolanga kuli i vika kiju kyokuhula ubuswage ku madohi.

³¹ I kolanga luliva ku tavagira kuli myingu: I kolanga inyanza kuva kuli amaguta gokuvaka.

³² I kolanga inzira kung'ereng'ana inyima wayo; Luliva lu ganaganangwa kuva netsimbudzi.

³³ Ku lirova si ha veye na u leng'ana nayo, Ya lombwa i ta veye nobutii.

³⁴ A lolanga vyosi vyeginga igulu: A veye mwami ku avana vosi avoluyai.