Ayubu 4 - KITABU KITAKATIFU

¹ Hene yaho Elifazu Muteman, ya tivula, na a vola,

² Mundu na a geridza kuvolerana nive, u la lola ubudamano naho? Navutswa ni bwaha u nyala kwegaya a ta vola?

³ Henza, ive wegidze avanyingi, Na u viki tsingulu mmakono madedekere.

⁴ Amakuva gogo ga gumira uyu wa li na a gwiye, Na ive wa dinyeridza masigamo madedekere.

⁵ Navutswa kalunu yaga ga duki ku ive, na u kudzi mwoyo; Ga ku dira, na ive u hendanga.

⁶ Ubutii bubwo ku Nyasaye si bu veye buluviriri bubwo, Na lisuuvira lilyo si li veye ubulungi bwenzira yoyo?

⁷ Mwadza, widzulitse, ni bwaha wa diva vutswa na a veye bugira lihyolo? Kinga avalungi va kalagirwa haliha?

⁸ Kuli inze ndolanga, yavo ava limanga ubudamano, Noku midza kivi, va gesanga kya zana.

⁹ Va divanga ku mwika gwa Nyasaye Na va gotanga ku lifuuma lyobutima bwibwe.

¹⁰ Lifuuma lyeking'ang'a, nomwoyo gweking'ang'a kilulu, Na amino geving'ang'a visoleli, ga vuniki.

¹¹ Neking'ang'a kisakulu ki divi ku livula kunyola vyokuhima, Navana veking'ang'a kikali va salani.

¹² Nda leterwa likuva makiriri, Ugutu gwange gwa hulira limonya lyago.

¹³ Mu tsiganagani tsya twula mmalola gobudiku, Lwa tsindolo tsyamaveere tsi dukanga ku avandu,

¹⁴ Ubutii bwa ngwira, nokudegera, Bwa kola vigumba vyange vyosi kudengeya.

¹⁵ Hene yaho kigingi kya vita imbiri wange; Na maswa agombiri gwange ga singira,

¹⁶ Kigingi zana kya singira makiriri, navutswa si nda manya ligondo lyakyo mba; Kifwananyi kya li imbiri wetsi moni tsyange: Ha kiring'ana, na nda hulira mwoyo ni gu vola,

¹⁷ Umundu welikudza a la va nobulungi kuvita Nyasaye? Umundu a la va musiyeku kuvita Mulombi wewe?

¹⁸ Henza, uyu si a suuviranga vatumekiri veve; Netsingelosi veve a va lolanga kuva nobusiru:

¹⁹ Nasindi yavo ava menyanga mu tsinyumba tsyobudohi, Tsyemise gyatsyo gyi veye mu marova, Ava duvulangwa imbiri wetsisere

²⁰ Hagati homugamba nomgolova va shonolannyangwa: Va divanga mihiga nemihiga, kandi si ha veye na u vikanga mu mwoyo.

²¹ Mugoye gwelihema lyavo si gu lifwa muvo? Va kudza, kandi yaga bugira ubugeeri.