Ayubu 38 - KITABU KITAKATIFU

¹ Hene yaho Yahova ya tivulira Ayubu mu kihudzudzi, nokumuvolera

² Ni bwaha u vikanga kisundi ku makuva Ku makuva ga ta li nelimanya?

³ Webohe kikenge kikyo kuli mundu musatsa Kigira ndenya ku ive, na ive u mbolere.

⁴ Lwa nda tema muse gwelirova, ive wa li haliha? Vola, nu u va nu u veye nelimanya.

⁵ Ni bwaha wa laga vigero vyalyo, nu u va nu u manya? Kinga ni bwaha wa nyira mugoye kukyo?

⁶ Mise gyalyo gya dinyeridzwa ku kindu ki? Naho ni bwaha wa vika ligina lyolwiga lyalyo

⁷ Lwa tsing'ereng'ani tsyomugamba tsimba halala Navana vosi va Nyasaye lwa va hanzuka kigira isango?

⁸ Naho ni bwaha wa boha inyanza nemiliango, Lwa ya tigula gi twule, kuli kindu ki twulanga mmunda;

⁹ Lwa nda lomba lilesi kuva tsingubo tsyayo, Na kisundi kinene kuva ingubo yayo yobwana

¹⁰ Nokugilombera lwako lwange, Nokuvika miluguyu nemiliango,

¹¹ Nokugivolera, Ive u la duka hano, navutswa si u la vita mba; Na hano viguvuli vivyo vyoluyai vi ligalirwa?

¹² Ive wa laga mugamba kutwula lwa madiku gogo ga tanga, Nokumannya likya li manye ha bugono bwalyo

¹³ Li duke kugumira viheri vyelirova, Navadamano kuvungululwa kutwula kulyo?

¹⁴ Li girunkanywa kuli ubudohi isi womuhuri; Na vindu vyosi vi singira kyova havulavu kuli ingubo;

¹⁵ Kandi avadamano, ubulavu bwavo bwigaleywi, Na mukono gwobukumi gu wniki.

¹⁶ Wingiye mu visenukiru vyenyanza? Kinga u gendi mu ha viswa holuliva?

¹⁷ Viribwa vyelikudza vi mali kwigulwa ku ive? Kinga u loli viribwa vyekiriri kyelikudza?

¹⁸ U manyi buvambalalu bwelirova yili? Vola, nu u va nu u manyi vyosi.

¹⁹ Inzira yokuduka mbumenyo bwobulavu i veye haliha? Na makuva gekisundi, ubugono bwakyo bu veye haliha,

²⁰ Nkano u duke kukihila kuduka ku lwako lwakyo, Kandi nkano u manye tsinzira tsya ki tsiranga ku yengo wakyo?

²¹ Namusia wa manya, kigira wa li na u mali kwivulwa inyinga yeyo Na livalidzwa lyamadiku gogo li veye linene

²² Ive wingiye ha butugi bwelikonza, Kinga u loli ubutugi bwembula yamagina,

²³ Ya nda vika akiba ku inyinga yekivi Ku lidiku lyokulwana nobulwani?

²⁴ Ubulavu bwahulangwa na ki Kinga imbuudza yevugwi i salanyangwa na ki ku lirova lyosi?

²⁵ Ni bwaha wa tanya inzira yamadzi manene, Kinga inzira yoluheni lwelihirigana;

²⁶ Kukupidza imbula ku kivala ki ta li nomundu; Mu kyangalangwi, ki ta li nomundu mukyo;

²⁷ Kwigutidza kivala kyumu kyere, Nokumeridza ubulimu budoto?

²⁸ Imbula i veye na ise? Ni bwaha wivula tsingeregeridza tsyelime?

²⁹ Amagina gembula givulwa kutwula munda mwa bwaha? Na lime lyobukindu bwomigulu bwa bohidza ni bwaha wivula?

³⁰ Amadzi manene ga dinyiridzwa kuli ligina, Na mmoni mwoluliva mu dinyirani kigira ubukindu.

³¹ Ive u nyala kuboha lihambana lyetsing'ereng'ani tsya Pleiades, Kinga kudendeyidza kiboheru lya Orion?

³² U nyala kwimirira Mazarothu mu inyinga yatsyo? Kinga u nyala kwimirira Arkituru halala na avimali veve?

³³ U manya amalago geligulu lya lagwa? U nyala kudinyeridza lyameha lyalyo ku lirova?

³⁴ U nyala kuginga mwoyo gugwo kuduka ku malesi, Ubunyingi bwamadzi bu duke kukukunika?

³⁵ U nyala kutuma luheni, kutsia ihale, Nokukuvolera, Ku veye hano?

³⁶ Ni bwaha wa vika ubugeeri mugati? Kinga ni bwaha wa ha tsiganagani limanya?

³⁷ Ni bwaha u nyala kuvalidza malesi nobugeeri buiblre? Kinga ni bwaha u nyala kutsuka tsichupa tsyomigulu,

³⁸ Lwa lugukyi lu tsitsanga nokudinyerana, Na makindi kuhambana halala?

³⁹ Ive u nyala kuhimira king'ang'a kikali vyoluhidzi, Kinga u ligutidza inzala yeving'ang'a visoleli,

⁴⁰ Lwa vi gonekanga mu tsimpangaywa tsyavyo Nokumenya mu lyevisa, vi duke kuseta?

⁴¹ Ni bwaha u nyoleranga lijikolo vyokulia valyo, Lwa viminyu vyalyo vyaniranga Nyasaye, Nokuvoyavoya kigira lidaka vyokulia?