Ayubu 32 - KITABU KITAKATIFU

¹ Ma avandu vavaka yavo va leka kutivulira Ayubu, kigira ya li mulungi ku lilola lyetsimoni tsitsye mwene.

² Hene yaho ubutima bwa Elihu mwana wa Barakeli Mubuzi, mu ihiri ya Ramu, bwaaka: ubutima bwibwe bwaaka ku Ayubu, kigira ya li ni yehedza ubulungi mwene kuvita kuha Nyasaye ubulungi.

³ Kandi ubutima bwibwe bwaaka ku valina veve vavaka kigira si va nyola litivula, halala na yaga va li ni va kalagiye Ayubu ku va muhyoli.

⁴ Kunangwa Elihu ya li na a lindangira a volire Ayuba amakuva, kigira avandi va li vanene veve.

⁵ Na lwa Elihu ya lola si ha veye nelitivula mu minwa gyavandu vavaka yavo, ubutima bwibwe bwaaka.

⁶ Na Elihu mwana wa Barakeli Mubuzi ya tivula, na a vola, Inze mbeye musoleli, na mwinye mu veye avasakulu ligali; Kigira yaga ndegaya, ni ntia kuvuulira mwinye likuva lyange.

⁷ Nda vola, Ga dukiranga madiku ga vole Na ubunyingi bwemihiga kwegidza ubugeeri.

⁸ Navutswa mwoyo gu veye mu mundu, Na miyika gya Wanyala Vyosi gyi va hedzanga limanya.

⁹ Si va li yava avanene ava veye nobugeeri, Kandi si va li yava avasakulu ava veye nelimanya lyelikalaga.

¹⁰ Kunangwa nda vola, Mu hulire inze; Na inze nda mu vuulira lilola lyange.

¹¹ Henza, nda lindirira makuva genyu Nda huliridza livolerana lyenyu, Lwa mwenyanga agokuvola.

¹² Yee, nda hulira mwinye, Kandi si ha li nomulala wa lungikidza Ayubu, Kinga wa duka kutivula makuva gege hagati henyu.

¹³ Mwelinde, gase mu la vola, Ku nyoye ubugeeri; Nyasaye a nyala kumuguuta, si ha li nomundu kumuouula;

¹⁴ Kigira uyu si a yekidzi makuva gege ku inze; Kandi si nda mu tivulira namakuva genyu.

¹⁵ Va genya, si va tivula kandi; Si va veye nelikuva kuvola.

¹⁶ Na inze ninde, kigira livula kuvola lyavo, Kigira va singira makiriri, si va tivula kandi?

¹⁷ Na inze kandi nda tivula kidieli kyange Na nda vuula likuva lyange.

¹⁸ Kigira nzizuye amakuva; Mwoyo gu veye mu inze gu ntsuvanga.

¹⁹ Henza, inda yange i veye kuli iwaini i ta veye nobuherero; Kuli tsimuya tsimpya tsi veye himbi kutanduka.

²⁰ Nda vola, nduke kusosa; Nda kunula minwa gyange nokutivula.

²¹ Mwadza, u ta ndeka kwelidza mmoni mwomundu kali mulala Kandi si nda ha mundu ku vosi ameta gokumidzominya vutswa.

²² Kigira si manya kuha vandu ameta gelidzominywa vutswa; Kinga ni ga la veye ndiyo, Mulombi wange nkano u ntwulidze bwangu.