Ayubu 31 - KITABU KITAKATIFU

¹ Nombi lilagana netsimoni tsyange; Kunangwa nyala ndi kuhenza mukana?

² Kigira kidieli kya Nyasaye ki twulanga igulu ki veye ki, Na miyandu ga uyu Wanyala Vyosi gyi twulanga igulu?

³ Si vi veye kivi ku yavo ava ta li avalungi, Nobwoneku ku yavo ava kolanga budamano?

⁴ Si a lolanga tsinzira tsyange, Nokuvalidza tsinduvatiru tsyange tsyosi?

⁵ Ni mba ni ng'endanga na ga vutswa, Na kirenge kyange ni ki va ni ki gendanga bwangu ku bugadi

⁶ (Nobulahi ngerwe ku tsiratili tsinungi, Nyasaye a duke kumanya ubulungi bwange);

⁷ Induvatiru yange ni i va ni i girunkana kuleka inzira, Nomwoyo gwange ni gu va ni gu londa tsimoni tsyange, Kandi Imbala kali indala ni i va ni i handi ku makono gange:

⁸ Hene yaho u ndeke midze, na wundi a lie; Yee, vya mera vyo mulimi gwange viifwe ligali.

⁹ Mwoyo gwange ni gu va ni gu goonywa ntsie ku mukali, Na inze ni mba ni ninda mu kiliango kyomutende wange;

¹⁰ Hene yaho mukali wange a sie ku wundi Navandi va mwinamire.

¹¹ Kigira nkano yaga ga veye lihyolo linene; Yee, ga veye ubudamano bu dukiranga kukalagirwa navakalagi:

¹² Kigira bu veye muliru gu sambanga kuduka ku Bwoneku, Kandi nkano bwihe limedeka lyange lyosi.

¹³ Ni mba ni ndega makuva gomutumekiri wange musatsa kinga mukana Lwa va hing'ana ninze;

¹⁴ Hene yaho nda kola ndi lwa Nyasaye a singira? Kandi lwa ya ndiguula, nda mu tivulira ki?

¹⁵ Uyu wa nombera mmunda, si ya lomba uyu kandi? Si ya li uyu mulala yeng'ine wakulongera vombi mmunda?

¹⁶ Ni mba ni ngaya avadaka ra vule kunyola kya venyanga, Kinga ni mba ni ngehidza ubulavu bwetsimoni tsyomukunzakali

¹⁷ Kinga ni mba ni ndagira kitonge kyange tsyeng'ine, Avabisandu va vuli kulagira kukyo

¹⁸ (Auwa, kutwula bwana bwange ya viruka halala ninze kuli mbeye dada wewe, Na inze mbeye mwimiriri womukali uyu kutwula munda mwa mama wange);

¹⁹ Ni mba ni ndola mundu ku vosi a diva kigira lidaka tsingubo, Kinga avadambi ni va va ni va ta veye nevyokwifwuma;

²⁰ Na kikenge kikye ni ki va ni ki vuli kungasidza, Kinga na a vula kunyola uluya mu bwoya bwamagondi gange;

²¹ Ni mba ni ng'inga mukono gwange ku avabisandu Kigira nda lola bukonyi bwange mu kiribwa:

²² Hene yaho livega lyange li tonye kutwula ku liliku, Na mukono gwange gu vunanywe kutwula ku kigumba kyagwo.

²³ Kigira kivi ki twulanga ku Nyasaye ki veye litihidza ku inze, Na kigira ubunene bwibwe si nyala kukola kindu.

²⁴ Ni mba ni nkola ithahabu kuva kyokusuuvira kyange, Nokuvolera ithahabu i siyeku, Ive u Deye kyokwesedema ku kyange;

²⁵ Ni mba ni nsangali kigira miyandu gyange gyi veye minyingi, Na kigira mukono gwange gu nyoye vindu vinyingi;

²⁶ Ni mba ni ndoli liuva lwa lya ng'ereng'ana, Kinga mweli gu tsitsagil'la mu ling'ereng'ana,

²⁷ Nomwoyo gwange gu goonyangwa makiriri, Neminwa gyange gyi busanga mukono gwange:

²⁸ Yaga kandi ga veye budamano bu kalagwa navakalagi; Kigira nkano mboleye Nyasaye u veye igulu ububehi.

²⁹ Ni mba ni nsangali ku budivi bwa uyu u ndunyira, Kinga ndeginga mwene lwa kivi ki mu nyola

³⁰ (Yee, si nda leka munwa gwange kukola bwoni Ku liteva livamwoyo lilye halala nelilaama);

³¹ Avandu vomulihema lyange ni va va ni va vula kuvola, Ni bwaha u nyala kunyola mulala u vuli kwiguta inyama yevyokulia vivye?

³² (Mugeni si a goni mu lihasi; Navulswa nziguliye wolugendo miliango gyange);

³³ Mba wa kunika amahyolo gange kuli Adamu, Ku livisa budamano bwange mu kiritu kyange,

³⁴ Kigira nda tia kiduma kinene, Na lilegwa lyobwiko lya ntihidza, Kuduka nda kiring'ana, na si nda Iwula mu kiliango.

³⁵ Nkano nda li nomulala kumbulira (Henza, kyokumanyira kyange ki veye hano, Wanyala Vyosi a ntivulire) Kandi nkano nda li neliyalwa lyomusigu wange u ng'odi

³⁶ Ligali nkano ndi ginge kwivega lyange Nkano ndi bohe ku mutwe gwange kuli itaji:

³⁷ Nkano nzivalidze kuye livalidzwa lyetsinduvatiru tsyange; Nkano nzisunde kuye kuli munene.

³⁸ Kivala kyange ni ki va ni ki kupa lwanga ku inze, Na tsinkumbe tsyakyo kulira halala;

³⁹ Ni mba ni mali kulia makuyu gakyo bugira kutunga ifetha, Kinga ni mba ni nkola avene vakyo va gotidze livamwoyo lyavo:

⁴⁰ Matagalu ga mere mbugono bwengano, Na indiva mbugono bweshairi. Makuva ga Ayubu ga heri hano.