Ayubu 26 - KITABU KITAKATIFU

¹ Hene yaho Ayubu ya tivula, na a vola

² U konyi ndi uyu u ta veye netsingulu U konyi ndi umukono gu ta veye nobunyali

³ U volera ndi uyu u ta veye nobu geeri, Nokwilwadza ubugeeri bweligali bunyingi

⁴ Wa volera bwaha makuva? Nomwoyo gwa bwaha gu twula ku ive?

⁵ Yavo avakudzu va degera Isi wamadzi manene, na ava menyi mugo;

⁶ Kihadisi ki veye kyere imbiri wewe, Ubwoneku si bu veve nelikunika.

⁷ Ya vambuula kasikasini igulu wobwiyangu bu ta veye ne kindu, Nokusunga lirova mu ki ta veye nekindu.

⁸ A bohanga madzi mu malesi gege maliduhu; Na lilesi zana si Ii tandulwa isi wago mba.

⁹ A visanga mmoni mwentebe yeye, Nokuvambuula lilesi lilye kuyo.

¹⁰ Ya vika lwako igulu mmoni mwamadzi manene, Kuduka ku kiheri kyobulavu nekisundi.

¹¹ Tsitiru tsyomwigulu tsi degeranga Na tsi genyanga ku ligondoka lilye.

¹² A buluganyanga inyanza nobunyali bwibwe A tumitanga Rahabu nobugeeri bwibwe.

¹³ Ya syahira ligulu na Roho wewe; Na mukono gwigwe gu tumiti inzoka yetsimbiru.

¹⁴ Henza, yitsi ni litanga vutswa lyetsinzira tsitsye: Navutswa nasindi limonya likekeke lya ku huliranga mmakuva gege Navutswa ni bwaha u nyala kumanya lihirigana lyetsingulu tsitsye?